ഭൂമിശാസ്ത്രപരമായ പ്രാധാന്യവും സർഗ്ഗാത്മക പങ്കാളിത്തവുമാണ് യുഎഇയെ തിരഞ്ഞെടുക്കാൻ കാരണമെന്ന് ‘ഡിസ്നി വേൾഡ്ബിൽഡേഴ്സ്’ ഡോക്യുമെന്ററിയിൽ വെളിപ്പെടുത്തൽ.
അബുദാബി, ഓഗസ്റ്റ് 20, 2026:മധ്യപൂർവേഷ്യയിലെ ആദ്യ ഡിസ്നി തീം പാർക്ക് റിസോർട്ടിനായി അബുദാബിയെ തിരഞ്ഞെടുത്തതിന് പിന്നിലെ പ്രധാന കാരണങ്ങൾ വെളിപ്പെടുത്തി ഡിസ്നി ചീഫ് എക്സിക്യൂട്ടീവ് ഓഫീസർ ബോബ് ഐഗർ. ഡിസ്നി പ്ലസിലൂടെ പുറത്തിറങ്ങിയ ‘ഡിസ്നി വേൾഡ്ബിൽഡേഴ്സ്’ എന്ന പുതിയ ഡോക്യുമെന്ററിയിലാണ് യുഎഇ തലസ്ഥാനമായ അബുദാബിയിലെ യാസ് ഐലൻഡ് പുതിയ പദ്ധതിക്കായി തീരുമാനിച്ചതിന്റെ തന്ത്രപരമായ കാരണങ്ങൾ ഐഗർ വ്യക്തമാക്കിയത്.
2025 മേയിലാണ് മിറാൽ (Miral) കമ്പനിയുമായി ചേർന്ന് അബുദാബിയിൽ വിനോദസഞ്ചാര കേന്ദ്രം നിർമ്മിക്കുമെന്ന് ഡിസ്നി പ്രഖ്യാപിച്ചത്. 2030-കളുടെ തുടക്കത്തിൽ പൊതുജനങ്ങൾക്കായി തുറന്നുകൊടുക്കാൻ ലക്ഷ്യമിടുന്ന ഈ കേന്ദ്രം, ലോകമെമ്പാടുമുള്ള ഡിസ്നിയുടെ ഏഴാമത്തെ തീം പാർക്ക് റിസോർട്ടാണ്.
ലോകത്തെ വിവിധ മേഖലകൾ പരിശോധിച്ച് വിലയിരുത്തിയ ശേഷമാണ് അബുദാബിയിലേക്ക് എത്തിയതെന്ന് ബോബ് ഐഗർ പറഞ്ഞു. ലോക ജനസംഖ്യയുടെ മൂന്നിലൊന്നിന് നാല് മണിക്കൂർ വിമാനയാത്ര കൊണ്ട് എത്തിച്ചേരാനാകുന്ന തന്ത്രപ്രധാന സ്ഥാനമാണ് അബുദാബിക്കുള്ളത്. അമേരിക്ക, യൂറോപ്പ്, ഏഷ്യ എന്നിവിടങ്ങളിലെ നിലവിലെ ഡിസ്നി പാർക്കുകൾക്ക് പുറമെ പുതിയൊരു വലിയ വിപണിയിലേക്ക് കടക്കാൻ ഇത് അവസരമൊരുക്കുന്നു.
വെറുമൊരു ഭൂമിശാസ്ത്രപരമായ അനുകൂല സാഹചര്യം മാത്രമല്ല, വലിയ പദ്ധതികൾ ആസൂത്രണം ചെയ്യാനും നടപ്പിലാക്കാനുമുള്ള അബുദാബിയുടെ ദീർഘവീക്ഷണവും നിർമ്മാണ രീതികളും പങ്കാളിത്തത്തിന് നിർണ്ണായകമായെന്ന് അദ്ദേഹം വ്യക്തമാക്കി. യാസ് ഐലൻഡിലെ തുറസ്സായ ഭൂമി സന്ദർശിക്കുന്ന ദൃശ്യങ്ങളോടെയാണ് ഡോക്യുമെന്ററി ഇത് വിശദീകരിക്കുന്നത്.y
സാംസ്കാരിക, വിനോദ മേഖലകളിൽ വൻ നിക്ഷേപം നടത്തുന്ന അബുദാബിയുടെ സാമ്പത്തിക കാഴ്ചപ്പാടും ഈ പങ്കാളിത്തത്തിന് കരുത്തേകുന്നു. സർഗ്ഗാത്മക വ്യവസായങ്ങളെ പ്രോത്സാഹിപ്പിക്കുന്നതിനും അന്താരാഷ്ട്ര തലത്തിലുള്ള അനുഭവങ്ങൾ തദ്ദേശീയമായി ലഭ്യമാക്കുന്നതിനുമാണ് ഡിസ്നിയുമായി സഹകരിക്കുന്നതെന്ന് അബുദാബി സാംസ്കാരിക വിനോദസഞ്ചാര വകുപ്പ് ചെയർമാനും മിറാൽ ചെയർമാനുമായ മുഹമ്മദ് ഖലീഫ അൽ മുബാറക് വ്യക്തമാക്കി.
ഓസ്കർ നാമനിർദ്ദേശം ലഭിച്ച ലെസ്ലി ഐവർക്സ് സംവിധാനം ചെയ്ത ഡോക്യുമെന്ററി, ഡിസ്നിയുടെ കഥാപാത്രങ്ങളും കഥകളും എങ്ങനെ യഥാർത്ഥ ലോകത്തേക്ക് മാറ്റപ്പെടുന്നു എന്ന് വ്യക്തമാക്കുന്നു. പദ്ധതിയുടെ നിർദ്ദിഷ്ട ഘടനയെക്കുറിച്ചോ റൈഡുകളെക്കുറിച്ചോ ഉള്ള വിവരങ്ങൾ പുറത്തുവിട്ടിട്ടില്ലെങ്കിലും, വരും വർഷങ്ങളിൽ യാസ് ഐലൻഡിന്റെ മുഖച്ഛായ മാറ്റുന്ന നിർമ്മാണ പ്രവർത്തനങ്ങൾക്ക് ഇത് വഴിതെളിക്കും.
