മനേജ്നായാ സ്ക്വയറിൽ പരമ്പരാഗത കൈത്തൊഴിൽ പ്രദർശനങ്ങളും യുനെസ്കോ അംഗീകൃത കലാരൂപങ്ങളും അണിനിരത്തി അഞ്ചുദിവസത്തെ പ്രദർശനം.
മോസ്കോ, ഓഗസ്റ്റ് 20, 2026:യുഎഇയുടെ പാരമ്പര്യവും സംസ്കാരവും വിനോദസഞ്ചാര മേഖലകളും റഷ്യൻ തലസ്ഥാനത്തിന് പരിചയപ്പെടുത്തുന്ന അഞ്ചുദിവസത്തെ ‘ഡിസ്കവർ അബുദാബി’ സാംസ്കാരിക മഹോത്സവം മോസ്കോയിലെ മനേജ്നായാ സ്ക്വയറിൽ ആരംഭിച്ചു.
അബുദാബി സാംസ്കാരിക വിനോദസഞ്ചാര വകുപ്പും റഷ്യയിലെ യുഎഇ എംബസിയും ചേർന്നാണ് ഓഗസ്റ്റ് 23 വരെ നീളുന്ന ഈ പരിപാടി സംഘടിപ്പിക്കുന്നത്. മോസ്കോ ഗവൺമെന്റിന്റെ ‘സമ്മർ ഇൻ മോസ്കോ’ പദ്ധതിയുടെ ഭാഗമായി നടത്തുന്ന ഈ പ്രദർശനത്തിലേക്ക് എല്ലാ ദിവസവും രാവിലെ 10 മുതൽ രാത്രി 9 വരെ പൊതുജനങ്ങൾക്ക് പ്രവേശനം സൗജന്യമാണ്.
യുനെസ്കോയുടെ അദൃശ്യ സാംസ്കാരിക പൈതൃക പട്ടികയിൽ ഇടംപിടിച്ച അൽ-അയ്യാല, അൽ ഹർബിയ തുടങ്ങിയ എമിറാത്തി നാടോടി കലാരൂപങ്ങളും സംഗീത പരിപാടികളും ദിവസവും ഇവിടെ അരങ്ങേറുന്നുണ്ട്. അബുദാബിയുടെ ചരിത്രവും പാരമ്പര്യവും വ്യക്തമാക്കുന്ന പ്രത്യേക പവലിയനുകളും മനേജ്നായാ സ്ക്വയറിൽ സജ്ജീകരിച്ചിട്ടുണ്ട്:
- ഹൗസ് ഓഫ് ആർട്ടിസാൻസ്: പരമ്പരാഗത തെയ്തു നിർമ്മാണ രീതികളായ സാദു, തല്ലി, ഈന്തപ്പനയോല നെയ്ത്തായ ഖോസ്, മൺപാത്ര നിർമ്മാണം എന്നിവ നേരിട്ട് കണ്ടുമനസ്സിലാക്കാനും പരിശീലിക്കാനും ഇവിടെ സൗകര്യമുണ്ട്.
- ബൈത്ത് അൽ ഗഹ്വ: എമിറാത്തി സൽക്കാരശൈലിയുടെ പ്രതീകമായ അറബിക് കോഫി തയ്യാറാക്കുന്നതും വിളമ്പുന്നതുമായ പരമ്പരാഗത ശൈലികൾ അവതരിപ്പിക്കുന്നു.
- മാരിടൈം പവലിയൻ: മുത്തുചിപ്പി ശേഖരണ ഉപകരണങ്ങൾ, പരമ്പരാഗത വലകൾ, ഗാർഗൂർ മീൻപിടുത്തക്കൂടുകൾ എന്നിവയിലൂടെ അബുദാബിയുടെ കടലോര പൈതൃകം പ്രദർശിപ്പിക്കുന്നു.
അബുദാബിയിലെ പ്രധാന വിനോദസഞ്ചാര കേന്ദ്രങ്ങളും ചരിത്രസ്മാരകങ്ങളും 360 ഡിഗ്രി ഡിജിറ്റൽ പ്രൊജക്ഷനിലൂടെ തത്സമയം അനുഭവിച്ചറിയാൻ കഴിയുന്ന ഡോം പവലിയനാണ് മേളയുടെ പ്രധാന ആകർഷണം. പരമ്പരാഗത എമിറാത്തി വിഭവങ്ങൾ രുചിക്കാനും സുഗന്ധദ്രവ്യങ്ങളും കരകൗശല വസ്തുക്കളും സുവനീറുകളായി വാങ്ങാനും പ്രത്യേക കേന്ദ്രങ്ങളും ഒരുക്കിയിട്ടുണ്ട്.
