തെക്കുകിഴക്കൻ യൂറോപ്പിന്റെ സാഹിത്യ പാരമ്പര്യവും വൈവിധ്യമാർന്ന സാംസ്കാരിക പൈതൃകവും യുഎഇ തലസ്ഥാനത്ത് ശ്രദ്ധാകേന്ദ്രമാകുന്നു.
അബുദാബി, ഓഗസ്റ്റ് 29:അബുദാബി അന്താരാഷ്ട്ര പുസ്തകോത്സവത്തിന്റെ (ADIBF) 35-ാമത് പതിപ്പിൽ ബാൾക്കൻ മേഖലയെ ഗസ്റ്റ് ഓഫ് ഓണറായി തെരഞ്ഞെടുത്തു. അറബ് ലോകവും തെക്കുകിഴക്കൻ യൂറോപ്യൻ രാജ്യങ്ങളും തമ്മിലുള്ള സാംസ്കാരിക സഹകരണം, പ്രസാധന പങ്കാളിത്തം, പുസ്തക തർജ്ജമ എന്നിവ ശക്തിപ്പെടുത്തുന്നതിന്റെ ഭാഗമായാണ് ഈ നീക്കം.
അബുദാബി സാംസ്കാരിക വിനോദസഞ്ചാര വകുപ്പിന് കീഴിലുള്ള അബുദാബി ലാംഗ്വേജ് സെന്റർ സംഘടിപ്പിക്കുന്ന മേളയിൽ ബാൾക്കൻ മേഖലയുടെ ചരിത്രപരവും സാഹിത്യപരവുമായ സംഭാവനകൾക്ക് പ്രത്യേക പ്രാധാന്യമാണ് നൽകുന്നത്. നൂറ്റാണ്ടുകളിലൂടെ രൂപപ്പെട്ട വൈവിധ്യമാർന്ന ഭാഷകളും കലാ-സാഹിത്യ പാരമ്പര്യങ്ങളും സമന്വയിക്കുന്ന സാംസ്കാരിക പൈതൃകമാണ് ബാൾക്കൻ പ്രദേശത്തിന്റേത്.
1961-ൽ സാഹിത്യത്തിനുള്ള നൊബേൽ സമ്മാനം നേടിയ ഇവോ ആൻഡ്രിച്ച് ഉൾപ്പെടെയുള്ള പ്രശസ്ത എഴുത്തുകാരുടെ കൃതികളും ചിന്തകളും വായനക്കാർക്കായി മേളയിൽ ഒരുക്കിയിട്ടുണ്ട്. അദ്ദേഹത്തിന്റെ ‘ദി ബ്രിഡ്ജ് ഓൺ ദി ഡ്രിന’ എന്ന പ്രശസ്തമായ നോവൽ ഉൾപ്പെടെയുള്ള സൃഷ്ടികൾ ഈ വിഭാഗത്തിലെ പ്രധാന ആകർഷണമാണ്. സാഹിത്യത്തിന് പുറമേ പ്രദേശത്തിന്റെ സംഗീതം, ദൃശ്യകലകൾ, വാസ്തുവിദ്യ, നാടോടി പാരമ്പര്യങ്ങൾ എന്നിവയും പ്രദർശനത്തിൽ അവതരിപ്പിക്കുന്നുണ്ട്.
റിപ്പബ്ലിക് ഓഫ് നോർത്ത് മാസിഡോണിയ ഉൾപ്പെടെയുള്ള ബാൾക്കൻ രാജ്യങ്ങളിൽ നിന്നുള്ള പ്രതിനിധി സംഘങ്ങൾ പുസ്തകോത്സവത്തിൽ പങ്കെടുക്കുന്നുണ്ട്. അറബ് പ്രസാധകരുമായും സാംസ്കാരിക സ്ഥാപനങ്ങളുമായും നേരിട്ട് ബന്ധപ്പെടാനും പുസ്തകങ്ങളുടെ മൊഴിമാറ്റം, കോ-പബ്ലിഷിംഗ് എന്നിവയ്ക്കുള്ള പുതിയ കരാറുകളിൽ ഏർപ്പെടാനും ഇത് വഴിമരുന്നിടും. തെക്കുകിഴക്കൻ യൂറോപ്യൻ സാഹിത്യം അറബ് വായനക്കാരിലേക്ക് എത്തിക്കുന്നതിനും അറബ് കൃതികൾ മറ്റ് ഭാഷകളിലേക്ക് വിവർത്തനം ചെയ്യുന്നതിനും ഈ സഹകരണം സഹായകരമാകും.
ആഗോള പ്രസാധന രംഗത്ത് സാംസ്കാരിക സംവാദങ്ങൾക്കും അറിവ് പങ്കുവെക്കലിനുമുള്ള പ്രധാന കേന്ദ്രമായി അബുദാബി പുസ്തകോത്സവം മാറിക്കഴിഞ്ഞു. സാഹിത്യത്തിലൂടെയും കലയിലൂടെയും രാജ്യങ്ങൾ തമ്മിലുള്ള ബന്ധം കൂടുതൽ ദൃഢമാക്കുക എന്ന ലക്ഷ്യത്തോടെയാണ് ഈ വർഷത്തെ പരിപാടികൾ ആസൂത്രണം ചെയ്തിരിക്കുന്നത്.
