അബുദാബി ഹുദൈരിയാത്ത് 321 സ്പോർട്സ് ഗ്രൗണ്ടിൽ നടന്ന ആവേശപ്പോരാട്ടത്തിൽ എതിരില്ലാത്ത രണ്ട് ഗോളുകൾക്ക് ജയം; മാറ്റുരച്ചത് 16 പ്രവാസി ടീമുകൾ.
അബുദാബി, ഒക്ടോബർ 21, 2026 : അബുദാബി ഹുദൈരിയാത്ത് ദ്വീപിലെ 321 സ്പോർട്സ് ഗ്രൗണ്ടിൽ നടന്ന പ്രഥമ ‘എസ്.എസ്.സി.എ.എ.ഡി സോക്കർ ഫെസ്റ്റ് 2026’ ഫുട്ബോൾ ടൂർണമെന്റിൽ ഡി.ഡി.പി ഫ്രൈറ്റ് ഹസ്ലേഴ്സ് ചാമ്പ്യന്മാരായി. ഫൈനൽ പോരാട്ടത്തിൽ കെയ്നസ് എഫ്.സിയെ എതിരില്ലാത്ത രണ്ട് ഗോളുകൾക്കാണ് ഹസ്ലേഴ്സ് പരാജയപ്പെടുത്തിയത്.
തളിപ്പറമ്പ് സർ സയ്യിദ് കോളേജ് അലുംനി അബുദാബി ചാപ്റ്റർ (SSCAAD) സംഘടിപ്പിച്ച ടൂർണമെന്റിൽ യു.എ.ഇയിലെ പ്രമുഖരായ 16 പ്രവാസി ടീമുകൾ പങ്കെടുത്തു. കേരള എക്സ്പാറ്റ് ഫുട്ബോൾ അസോസിയേഷൻ (KEFA) സാങ്കേതിക മേൽനോട്ടവും മത്സര നിയന്ത്രണവും നിർവഹിച്ചു. ശനിയാഴ്ച രാത്രി എട്ടുമണിക്ക് തുടങ്ങിയ മത്സരങ്ങൾ പുലർച്ചെ 3:30 വരെ നീണ്ടുനിന്നു.
ലാലു ഗ്രൂപ്പ് അബുദാബി ഡയറക്ടറും ചാപ്റ്റർ ചെയർമാനുമായ അജയ് കുമാർ ടൂർണമെന്റ് ഉദ്ഘാടനം ചെയ്തു. മുഖ്യ പ്രായോജകരായ ഇൻഫിനിറ്റി ഇൻഫ്രാ എനർജി മാനേജിങ് ഡയറക്ടർ ഹാഷിം അബ്ദുൽ അസീസ് പുൽസാരകത്ത് മുഖ്യാതിഥിയായി പങ്കെടുത്തു.
ടൂർണമെന്റിനൊപ്പം അലുംനി പ്രവർത്തകരെയും കുടുംബാംഗങ്ങളെയും ഉൾപ്പെടുത്തി വിപുലമായ അനുബന്ധ പരിപാടികളും നടന്നു. എസ്.എസ്.സി.ഒ.ടി.എ (SSCOTA), എസ്.എസ്.സി.എ.എ.ഡി (SSCAAD) ടീമുകൾ തമ്മിൽ നടന്ന സൗഹൃദ മത്സരം കായികപ്രേമികൾക്ക് ആവേശം പകർന്നു. അറുനൂറിലധികം കാണികളാണ് മത്സരങ്ങൾ വീക്ഷിക്കാൻ ഹുദൈരിയാത്ത് ഗ്രൗണ്ടിലെത്തിയത്.
കുടുംബങ്ങൾക്കായി സംഘടിപ്പിച്ച സ്നാക്സ് പാചക മത്സരത്തിൽ നദീറ ഷഹബാസ് ഒന്നാം സമ്മാനം നേടി. റെംനി അഷ്റഫ് രണ്ടും ഫർസാന അസീസ് മൂന്നും സ്ഥാനങ്ങൾ കരസ്ഥമാക്കി. മെഹന്ദി ഡിസൈനിങ് മത്സരത്തിൽ റഫ്ഷ അഷ്റഫ് ഒന്നാമതെത്തിയപ്പോൾ മുനീറ നൗഫൽ രണ്ടാം സ്ഥാനവും, മൻസിയ സഫ്വാന, നദീറ ഷഹബാസ് എന്നിവർ മൂന്നാം സ്ഥാനവും പങ്കിട്ടു.
അബുദാബി ഇന്ത്യൻ ഇസ്ലാമിക് സെന്റർ ആക്ടിങ് പ്രസിഡന്റും അലുംനി സ്ഥാപക ചെയർമാനുമായ വി.പി.കെ. അബ്ദുള്ള, ജനറൽ സെക്രട്ടറിയും മുൻ അലുംനി ഭാരവാഹിയുമായ അഡ്വ. കെ.വി. മുഹമ്മദ് കുഞ്ഞി എന്നിവർ സമാപന ചടങ്ങിൽ പങ്കെടുത്ത് ആശംസകൾ അറിയിച്ചു.
വിജയികൾക്കുള്ള ട്രോഫികളും പുരസ്കാരങ്ങളും വർക്കിങ് ചെയർമാൻ മുഹമ്മദലി സി.എച്ച്. മാങ്കടവ്, ജനറൽ സെക്രട്ടറി നൗഫൽ സി.പി., ട്രഷറർ സൽസബീൽ ഹംസ, ജനറൽ കൺവീനർ ഷക്കീർ അഹമ്മദ്, കോർഡിനേറ്റർ റഫീഖ് എസ്.എൽ.പി. എന്നിവർ ചേർന്ന് വിതരണം ചെയ്തു. എക്സിക്യൂട്ടീവ് അംഗങ്ങളായ കാസിം അബൂബക്കർ, മുസ്തഫ മൈദാനി, അഷ്റഫ് കെ.വി., നൗഷാദ് മാഹി എന്നിവർ പങ്കെടുത്തു.
മത്സര നടത്തിപ്പിന് ഇബ്രാഹിം കെ.എൻ., അഫ്സൽ കെ.സി., അബ്ദുൽ നാസർ, റാഷിദ് ഹമീദ്, ഹബീബ് റഹ്മാൻ വി., അഷ്റഫ് അഹമ്മദ്, മുഹമ്മദ് സാദിഖ് കെ., അൻസാർ അഞ്ചില്ലത്ത്, സയീദ് വി. പുതിയങ്ങാടി, സുബൈർ പി.വി., നസീബ് കൊവ്വ, ഷബീർ അള്ളാംകുളം, രഞ്ജിത്ത് രാമചന്ദ്രൻ, സഹീദ് വി., ഫാത്തിമ നാസർ, ഷബ്റീന കാസിം, ഷബീന ശകീർ, സൽമ സബീൽ, ജിഫ്ഷാന മുഹമ്മദ് അലി, ഫെബിന റഫീഖ് എന്നിവർ നേതൃത്വം നൽകി.
