2026-2027 അധ്യയന വർഷത്തിൽ കർശന ട്രാഫിക് പരിശോധന; 47 ശതമാനം വിദ്യാർഥികളും സ്കൂളിലെത്തുന്നത് സ്വകാര്യ വാഹനങ്ങളിലെന്ന് സർവേ
ദുബായ് — സെപ്റ്റംബർ 1, 2026 : ദുബായിലെ സ്കൂൾ മേഖലകളിൽ 2010 മുതൽ ഇന്നുവരെ വാഹനാപകടങ്ങൾ മൂലമുള്ള മരണങ്ങൾ ഒന്നുമില്ലെന്ന റെക്കോർഡ് നിലനിർത്തിയതായി റോഡ്സ് ആൻഡ് ട്രാൻസ്പോർട്ട് അതോറിറ്റി (RTA). 2026-2027 പുതിയ അധ്യയന വർഷം ആരംഭിച്ച പശ്ചാത്തലത്തിൽ വിപുലമായ സുരക്ഷാ പദ്ധതികൾ പ്രഖ്യാപിച്ചുകൊണ്ടാണ് ആർടിഎ ഈ കണക്കുകൾ പുറത്തുവിട്ടത്.
യുഎഇ ആഭ്യന്തര മന്ത്രാലയത്തിന്റെ രാജ്യവ്യാപക സ്കൂൾ യാത്രാസുരക്ഷാ കാമ്പയിനുമായി ചേർന്നാണ് ആർടിഎ പുതിയ കർമപദ്ധതി നടപ്പാക്കുന്നത്. സ്കൂൾ പരിസരങ്ങളിൽ വേഗപരിധി പാലിക്കൽ, സീബ്രാലൈനുകളിലെ കാൽനടയാത്രക്കാരുടെ സുരക്ഷ, അശാസ്ത്രീയമായ പാർക്കിങ് തടയൽ എന്നിവയിലാണ് അതോറിറ്റി പ്രധാനമായും ശ്രദ്ധ കേന്ദ്രീകരിക്കുന്നത്.
കഴിഞ്ഞ അധ്യയന വർഷത്തിൽ ഇരുപതിനായിരത്തിലധികം രക്ഷിതാക്കൾക്കിടയിൽ നടത്തിയ സർവേയിലെ വിവരങ്ങളും ആർടിഎ പുറത്തുവിട്ടു. ഇതുപ്രകാരം 47 ശതമാനം വിദ്യാർഥികൾ സ്വകാര്യ വാഹനങ്ങളിലും 44 ശതമാനം പേർ സ്കൂൾ ബസുകളിലുമാണ് യാത്ര ചെയ്യുന്നത്. ബാക്കി ഒൻപത് ശതമാനം കുട്ടികൾ കാൽനടയായും പൊതുഗതാഗത സംവിധാനങ്ങൾ വഴിയുമാണ് സ്കൂളുകളിൽ എത്തുന്നത്. രക്ഷിതാക്കളിൽ 91 ശതമാനം പേരും സ്കൂളുകൾ നിശ്ചയിച്ചിട്ടുള്ള പാർക്കിങ് ബേകൾ ഉപയോഗിക്കുന്നതായും സർവേ വ്യക്തമാക്കുന്നു.
തുടർച്ചയായ ബോധവത്കരണവും സ്കൂൾ പരിസരങ്ങളിലെ റോഡ് എൻജിനീയറിങ് നവീകരണവുമാണ് 2010 മുതലുള്ള സുരക്ഷാ നേട്ടം കൈവരിക്കാൻ സഹായിച്ചതെന്ന് ആർടിഎ ട്രാഫിക് ആൻഡ് റോഡ്സ് ഏജൻസി സിഇഒ ഹുസൈൻ അൽ ബന്ന വ്യക്തമാക്കി.
വിദ്യാർഥികൾക്കായി മൂന്ന് തലങ്ങളിലുള്ള പരിശീലന പരിപാടികൾ ആർടിഎ പുനരാരംഭിച്ചു:
- പ്രൈമറി തലം വരെ: “ഹലോ, മൈ സ്കൂൾ”
- മിഡിൽ സ്കൂൾ തലം: “ഗോൾഡൻ റൂൾസ് ഫോർ ജനറേഷൻസ് സേഫ്റ്റി”
- സെക്കൻഡറി തലം: “വെർച്വൽ ഡ്രൈവിംഗ് ലൈസൻസ്”
സ്കൂൾ കവാടങ്ങളിൽ ഇരട്ട വരിയായി വാഹനം നിർത്തുന്നതും റോഡിന്റെ മധ്യഭാഗത്ത് കുട്ടികളെ ഇറക്കുന്നതും ഒഴിവാക്കണമെന്ന് ഡ്രൈവർമാർക്ക് കർശന നിർദേശമുണ്ട്. സീബ്രാലൈനുകൾക്ക് സമീപം വേഗത കുറയ്ക്കണമെന്നും സ്കൂൾ പരിസരങ്ങളിൽ മൊബൈൽ ഫോൺ ഉപയോഗിക്കരുതെന്നും മുന്നറിയിപ്പുണ്ട്.
