യുഎൻ വസ്തുതാന്വേഷണ സമിതി റിപ്പോർട്ടിന് മറുപടിയുമായി യുഎഇ; സുഡാനിൽ ഉടനീളം ആയുധ ഉപരോധം വേണമെന്ന് ആവശ്യം
അബുദാബി — സെപ്റ്റംബർ 4, 2026 : സുഡാനിൽ തുടരുന്ന ആഭ്യന്തരയുദ്ധത്തിൽ ഒരു പക്ഷത്തിനും ആയുധങ്ങളോ സൈനിക ഉപകരണങ്ങളോ നൽകിയിട്ടില്ലെന്ന് യുണൈറ്റഡ് അറബ് എമിറേറ്റ്സ് വ്യക്തമാക്കി. രാജ്യത്തെ സായുധ സംഘങ്ങൾക്ക് ലഭിക്കുന്ന എല്ലാവിധ ബാഹ്യ സൈനിക പിന്തുണകളും ഉടനടി അവസാനിപ്പിക്കണമെന്നും യുഎഇ ആവശ്യപ്പെട്ടു.
ജനീവയിലെ യുഎൻ ദൗത്യകാര്യാലയം വഴിയാണ് യുഎഇ തങ്ങളുടെ ഔദ്യോഗിക നിലപാട് വ്യക്തമാക്കിയത്. 2023 ഏപ്രിലിൽ സുഡാൻ സൈന്യവും റാപ്പിഡ് സപ്പോർട്ട് ഫോഴ്‌സും (ആർഎസ്എഫ്) തമ്മിൽ ഏറ്റുമുട്ടൽ ആരംഭിച്ചതു മുതൽ ഒരു കക്ഷിക്കും ആയുധമോ അനുബന്ധ സാമഗ്രികളോ നൽകിയിട്ടില്ലെന്ന് മന്ത്രാലയം അടിവരയിട്ടു. സുഡാനിലെ മനുഷ്യാവകാശ ലംഘനങ്ങളെക്കുറിച്ച് അന്വേഷിക്കുന്ന യുഎൻ വസ്തുതാന്വേഷണ സമിതിയുടെ റിപ്പോർട്ടിന് മറുപടിയായാണ് ഈ പ്രസ്താവന.
യുഎൻ സമിതിയുമായി സുതാര്യമായ രീതിയിലാണ് രാജ്യം സഹകരിച്ചതെന്ന് യുഎഇ ചൂണ്ടിക്കാട്ടി. അനധികൃത ഇടപാടുകൾ തടയുന്നതിനും സ്വകാര്യ സ്ഥാപനങ്ങളെ നിയന്ത്രിക്കുന്നതിനുമുള്ള യുഎഇയുടെ ശക്തമായ നിയമസംവിധാനങ്ങൾ യുഎൻ സമിതി പരിഗണിച്ചിട്ടുണ്ട്. എന്നാൽ, സംഘർഷവുമായി ബന്ധപ്പെട്ട് ഉന്നയിക്കപ്പെടുന്ന ആരോപണങ്ങൾ നിഷ്പക്ഷവും വ്യക്തമായ തെളിവുകളുടെ അടിസ്ഥാനത്തിലും മാത്രമേ വിലയിരുത്താവൂ എന്ന് യുഎൻ മിഷൻ ഓർമ്മിപ്പിച്ചു.
സുഡാൻ സൈന്യവും ആർഎസ്എഫും നടത്തുന്ന അന്താരാഷ്ട്ര മനുഷ്യാവകാശ ലംഘനങ്ങളെ യുഎഇ ശക്തമായി അപലപിച്ചു. യുഎൻ രക്ഷാസമിതി പ്രഖ്യാപിച്ചിട്ടുള്ള ഉപരോധങ്ങൾ പൂർണമായി പാലിക്കാൻ രാജ്യം പ്രതിജ്ഞാബദ്ധമാണ്. ദാർഫൂരിൽ മാത്രം നിലനിൽക്കുന്ന ആയുധ ഉപരോധം സുഡാനിലുടനീളം വ്യാപിപ്പിക്കണമെന്നും ഇരുവിഭാഗങ്ങൾക്കും ലഭിക്കുന്ന ബാഹ്യ സഹായങ്ങൾ പൂർണമായും തടയണമെന്നും യുഎഇ ആവശ്യപ്പെട്ടു.
സുഡാനിൽ ഉപാധികളില്ലാത്ത അടിയന്തര വെടിനിർത്തലും മാനുഷിക സഹായങ്ങൾ എത്തിക്കാനുള്ള താത്കാലിക സമാധാനവുമാണ് അനിവാര്യം. ഇരു സൈനിക വിഭാഗങ്ങളുടെയും തീവ്രവാദ ഗ്രൂപ്പുകളുടെയും സ്വാധീനമില്ലാത്ത, ജനകീയ നേതൃത്വത്തിലുള്ള രാഷ്ട്രീയ പരിഹാരത്തിലൂടെ മാത്രമേ സുഡാനിൽ ശാശ്വത സമാധാനം സാധ്യമാകൂ എന്നും യുഎഇ വ്യക്തമാക്കി.
