മൂന്ന് മാസം നീണ്ട ഇൻഡോർ കായിക മേളയിൽ കുറിച്ചത് 29 കോടിയിലേറെ കാൽവെപ്പുകൾ; ദുബായ് മാളിൽ 42 കിലോമീറ്റർ മാരത്തണോടെ സമാപനം.
ദുബായ്, സെപ്റ്റംബർ 19, 2026 : ദുബായ് കായിക കൗൺസിലും യുഎഇ പ്രതിരോധ മന്ത്രാലയവും സംയുക്തമായി സംഘടിപ്പിച്ച ‘ദുബായ് മല്ലത്തോൺ’ രണ്ടാം പതിപ്പിന് സമാപനമായി. ജൂൺ 15 മുതൽ സെപ്റ്റംബർ 15 വരെ നീണ്ടുനിന്ന മൂന്ന് മാസത്തെ കായിക മേളയിൽ 1,60,475 പേർ പങ്കെടുത്തു.
വേനൽക്കാലത്തെ കനത്ത ചൂടിലും ശാരീരികക്ഷമത നിലനിർത്താൻ ലക്ഷ്യമിട്ട് വാണിജ്യ കേന്ദ്രങ്ങളെ വേദിയാക്കി നടത്തിയ പദ്ധതിയിൽ പങ്കെടുക്കാനെത്തിയവർ ആകെ നടന്നത് 29 കോടിയിലധികം (290 മില്യൺ) കാൽവെപ്പുകളാണ്. യുഎഇ ഉപപ്രധാനമന്ത്രിയും പ്രതിരോധ മന്ത്രിയും ദുബായ് കിരീടാവകാശിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിന്റെ രക്ഷാകർതൃത്വത്തിലാണ് മല്ലത്തോൺ സംഘടിപ്പിച്ചത്.
ദുബായ് മാളിൽ നടന്ന 42.195 കിലോമീറ്റർ പൂർണ്ണ മാരത്തണും 21 കിലോമീറ്റർ ഹാഫ് മാരത്തണും സമാപന ദിവസത്തെ പ്രധാന ആകർഷണമായി. വിവിധ പ്രായക്കാരും മുൻനിര അത്‌ലറ്റുകളും ഇതിൽ പങ്കെടുത്തു. ദുബായ് ഹിൽസ് മാളിൽ നടന്ന പ്രത്യേക ചടങ്ങിൽ ദുബായ് സ്പോർട്സ് കൗൺസിൽ വൈസ് ചെയർമാൻ ഖൽഫാൻ ജുമ ബെൽഹൂൽ, പ്രതിരോധ മന്ത്രിയുടെ ഓഫീസ് ഡയറക്ടർ മേജർ ജനറൽ ഖലീഫ റാഷിദ് അൽ ഹംലി, പ്രമുഖ എമിറാത്തി കായികതാരങ്ങൾ തുടങ്ങിയവർ പങ്കെടുത്തു.
കാലാവസ്ഥ തടസ്സമാകാത്ത രീതിയിൽ വർഷം മുഴുവൻ വ്യായാമം ജീവിതശൈലിയാക്കാൻ ജനങ്ങളെ പ്രേരിപ്പിക്കുകയാണ് മല്ലത്തോണിന്റെ ലക്ഷ്യമെന്ന് ഖൽഫാൻ ജുമ ബെൽഹൂൽ വ്യക്തമാക്കി. ദുബായ് സ്പോർട്സ് സ്ട്രാറ്റജിക് പ്ലാൻ 2033, ദുബായ് ക്വാളിറ്റി ഓഫ് ലൈഫ് സ്ട്രാറ്റജി 2033 എന്നിവയുടെ ഭാഗമായാണ് ഇത് നടപ്പാക്കുന്നത്.
ഇത്തവണ ദുബായ് അന്താരാഷ്ട്ര വിമാനത്താവളം (ഡിഎക്സ്ബി), ദുബായ് ഇന്റർനാഷണൽ ഫിനാൻഷ്യൽ സെന്റർ (ഡിഐഎഫ്‌സി), ഇബ്ൻ ബത്തൂത്ത മാൾ എന്നിവ പുതുതായി പങ്കാളിത്ത വേദികളായി മാറി. ദുബായ് മാൾ, ദുബായ് ഹിൽസ് മാൾ, സിറ്റി സെന്റർ മിർദിഫ്, മാൾ ഓഫ് ദി എമിറേറ്റ്സ്, ദുബായ് ഫെസ്റ്റിവൽ സിറ്റി മാൾ, സിറ്റി സെന്റർ ദെയ്റ എന്നിവയായിരുന്നു മറ്റ് പ്രധാന കേന്ദ്രങ്ങൾ.
14-ലധികം പ്രതിവാര മത്സരങ്ങളും എമിറാത്തി വനിതാ ദിനത്തോട് അനുബന്ധിച്ചുള്ള പ്രത്യേക കായിക പരിപാടികളും ഇക്കാലയളവിൽ നടന്നു. അൽ അമീൻ സർവീസ്, മായ് ദുബായ്, ഹുവാവേ, യാംഗോ ഗ്രൂപ്പ് എന്നിവർ സഹകരണവുമായി ഒപ്പമുണ്ടായിരുന്നു.
2025-ൽ ആരംഭിച്ച ദുബായ് മല്ലത്തോൺ, മാളിനുള്ളിൽ ഏറ്റവും കൂടുതൽ ആളുകൾ ഓടിയ മത്സരമെന്ന ഗിന്നസ് ലോക റെക്കോർഡ് സ്വന്തമാക്കിയിരുന്നു. അന്ന് ദുബായ് ഹിൽസ് മാളിൽ നടന്ന ഒരൊറ്റ ഓട്ടത്തിൽ 1,300-ലധികം പേരാണ് പങ്കെടുത്തത്. യുഎഇയുടെ ‘ഇയർ ഓഫ് ദി ഫാമിലി 2026’ ആശയങ്ങൾക്ക് അനുസൃതമായി കുടുംബങ്ങൾക്ക് സുരക്ഷിതമായ അന്തരീക്ഷത്തിൽ ഒന്നിച്ചുകൂടാനുള്ള വേദി കൂടിയായി ഇത്തവണത്തെ പതിപ്പ് മാറി.
