ശാസ്ത്ര ദൗത്യങ്ങളിൽ നിന്ന് വ്യവസായ നിക്ഷേപത്തിലേക്ക്: ബഹിരാകാശ രംഗത്ത് വൻ സാമ്പത്തിക കുതിപ്പുമായി യുഎഇ

ദേശീയ ബഹിരാകാശ നയം 2031 വഴി ഉപഗ്രഹ നിർമ്മാണവും ഡാറ്റാ വ്യവസായവും ആഗോള പങ്കാളിത്തവും വിപുലീകരിച്ച് അബുദാബി; വരുമാനം ഇരട്ടിയാക്കാൻ ലക്ഷ്യം.

അബുദാബി —ശാസ്ത്രീയ ഗവേഷണങ്ങൾക്കും പര്യവേക്ഷണങ്ങൾക്കുമപ്പുറം ബഹിരാകാശ മേഖലയെ രാജ്യത്തിന്റെ സുപ്രധാന സാമ്പത്തിക-വ്യാവസായിക അടിത്തറയാക്കി മാറ്റുന്ന വിപുലമായ പദ്ധതികളുമായി യുണൈറ്റഡ് അറബ് എമിറേറ്റ്സ്. ഉപഗ്രഹ നിർമ്മാണം, ഡാറ്റാ അനലിറ്റിക്സ്, അടിസ്ഥാന സൗകര്യ വികസനം എന്നിവ ലക്ഷ്യമിട്ട് കോടിക്കണക്കിന് ഡോളറിന്റെ ആഗോള നിക്ഷേപങ്ങളാണ് രാജ്യം സമാഹരിക്കുന്നത്.

2026 മാർച്ച് 29-ന് യുഎഇ മന്ത്രിസഭ അംഗീകരിച്ച ‘ദേശീയ ബഹിരാകാശ നയം 2031’ (National Space Strategy 2031) ഈ മേഖലയിലെ വാണിജ്യ സാധ്യതകൾക്ക് മുൻഗണന നൽകുന്നു. ബഹിരാകാശ മേഖലയിൽ നിന്നുള്ള വരുമാനം ഇരട്ടിയാക്കുക, സമ്പദ്‌വ്യവസ്ഥയിലേക്കുള്ള സംഭാവന 60 ശതമാനം വർധിപ്പിക്കുക, സ്വദേശി സ്റ്റാർട്ടപ്പുകളുടെ എണ്ണം ഇരട്ടിയാക്കുക എന്നിവയാണ് പ്രധാന ലക്ഷ്യങ്ങൾ. ഇതിനകം 30 ഉപഗ്രഹങ്ങൾ വിജയകരമായി വിക്ഷേപിച്ച യുഎഇയിൽ 170-ലധികം ബഹിരാകാശ അനുബന്ധ സ്ഥാപനങ്ങൾ സജീവമായി പ്രവർത്തിക്കുന്നുണ്ട്.

ഉപഗ്രഹങ്ങൾ വിക്ഷേപിക്കുന്നതിനപ്പുറം അവയിൽ നിന്നുള്ള വിവരങ്ങൾ വാണിജ്യ ആവശ്യങ്ങൾക്ക് ഉപയോഗപ്പെടുത്തുന്നതിലാണ് അബുദാബി ഇപ്പോൾ ശ്രദ്ധ കേന്ദ്രീകരിക്കുന്നത്. യുഎഇയുടെ ബഹിരാകാശ സാങ്കേതിക സ്ഥാപനമായ ‘സ്പേസ്42’ (Space42) ഫോർസൈറ്റ്-3, 4, 5 ഉപഗ്രഹങ്ങളുടെ പ്രവർത്തനം ഈ വർഷം ജൂണിൽ പൂർണ്ണതോതിലാക്കി. ഫിൻലൻഡ് ആസ്ഥാനമായുള്ള ‘ഐസിഐ’ (ICEYE) യുമായി സഹകരിച്ച് നിർമ്മിച്ച ഈ ഭൗമനിരീക്ഷണ ശൃംഖല, അടിയന്തര രക്ഷാപ്രവർത്തനങ്ങൾ ഏകോപിപ്പിക്കുന്നതിനും കൃത്യതയാർന്ന ഭൗമ വിവരങ്ങൾ അതിവേഗം ലഭ്യമാക്കുന്നതിനും സഹായകരമാകുന്നു.

രാജ്യാന്തര ഗവേഷണ വികസന പങ്കാളിത്തങ്ങൾക്കായി 100 കോടി ദിർഹത്തിന്റെ (AED 1 Billion) പ്രത്യേക ഫണ്ട് യുഎഇ പ്രഖ്യാപിച്ചിരുന്നു. ഇതിനുപിന്നാലെ മാർലാൻ സ്പേസ്, ലോഫ്റ്റ് ഓർബിറ്റൽ എന്നീ കമ്പനികൾ സംയുക്തമായി ഫ്രാൻസുമായി ചേർന്ന് 100 കോടി ഡോളറിന്റെ നിക്ഷേപ പദ്ധതി പ്രഖ്യാപിച്ചു. ഇതിന്റെ ഭാഗമായി വികസിപ്പിക്കുന്ന 50 ഉപഗ്രഹങ്ങളിൽ ആദ്യ ഘട്ടത്തിലുള്ള 10 എണ്ണത്തിന്റെ നിർമ്മാണം അബുദാബിയിലെ അത്യാധുനിക പ്ലാന്റിൽ ഇതിനകം ആരംഭിച്ചു കഴിഞ്ഞു.

മൊബൈൽ നെറ്റ്‌വർക്കുകൾ ഇല്ലാത്ത വിദൂര മേഖലകളിലും കണക്റ്റിവിറ്റി ഉറപ്പാക്കാൻ സ്പേസ്42, വയാസാറ്റ് (Viasat) എന്നിവർ ചേർന്ന് ‘ഇക്വറ്റിസ്’ (Equatys) എന്ന പ്ലാറ്റ്‌ഫോമിനും രൂപം നൽകി. 100 കോടി ഡോളറാണ് ഇതിന്റെ പ്രാരംഭ മൂലധന നിക്ഷേപം.

ശാസ്ത്രീയ ദൗത്യങ്ങളിലും രാജ്യം മുന്നേറ്റം തുടരുകയാണ്. ചൊവ്വാ ദൗത്യമായ ‘ഹോപ്പ് പ്രോബി’ന്റെ (Hope Probe) കാലാവധി മൂന്ന് വർഷത്തേക്ക് കൂടി നീട്ടി. 10 ടെറാബൈറ്റിലധികം വിവരങ്ങളാണ് പേടകം ഇതുവരെ ശേഖരിച്ചത്. 13 വർഷം നീളുന്ന ഛിന്നഗ്രഹ ദൗത്യത്തിന്റെ (EMA) 50 ശതമാനം കരാറുകളും യുഎഇയിലെ സ്വകാര്യ കമ്പനികൾക്കാണ് നീക്കിവെച്ചിരിക്കുന്നത്. 100 കോടി ഡോളർ ചെലവ് പ്രതീക്ഷിക്കുന്ന ഈ ദൗത്യം ഏഴ് ഛിന്നഗ്രഹങ്ങളെയാണ് നിരീക്ഷിക്കുക.

ചന്ദ്രന്റെ വിദൂര ഭാഗം പര്യവേക്ഷണം ചെയ്യുന്നതിനുള്ള ‘റാഷിദ് റോവർ 2’ൽ ഭൂഗർഭ റഡാർ ട്രാൻസ്മിറ്ററായ ‘ആർടിഎക്സ്’ (RTx) സജ്ജീകരിക്കുന്ന നടപടികൾ മുഹമ്മദ് ബിൻ റാഷിദ് സ്പേസ് സെന്റർ പൂർത്തിയാക്കി. ഉപരിതലത്തിന് 100 മീറ്റർ താഴെ വരെയുള്ള ഘടന പരിശോധിക്കാൻ ഇതിന് ശേഷിയുണ്ട്. നാസയുമായി ചേർന്നുള്ള ചാന്ദ്ര ഗവേഷണങ്ങളിലും ഈ സാങ്കേതികവിദ്യ പ്രയോജനപ്പെടുത്തും.

സാങ്കേതിക മുന്നേറ്റങ്ങൾക്ക് ആവശ്യമായ വിദഗ്ധരെ വാർത്തെടുക്കാൻ സർവകലാശാലകളിൽ പ്രത്യേക കോഴ്‌സുകളും നാഷണൽ സ്പേസ് അക്കാദമിയും സജീവമാണ്. വിക്ഷേപണങ്ങൾക്കപ്പുറം ഡാറ്റാ സർവീസുകളും നിർമ്മാണ ശൃംഖലകളും സ്വന്തമാക്കി ആഗോള ബഹിരാകാശ സമ്പദ്‌വ്യവസ്ഥയിൽ തന്ത്രപ്രധാനമായ സ്ഥാനമാണ് യുഎഇ ഉറപ്പിക്കുന്നത്.