ഓഫീസ്-ലോജിസ്റ്റിക്സ് ഇടങ്ങളിൽ 96 ശതമാനം ഡിമാൻഡ്; ഇ-കൊമേഴ്‌സ് മേഖലയ്ക്ക് കരുത്തേകാൻ പുതിയ ആറ് സമുച്ചയങ്ങളും ലംബ വെയർഹൗസും വരുന്നു.
ദുബായ്, ഒക്ടോബർ 5, 2026 : ആഗോള ഡിജിറ്റൽ വാണിജ്യ രംഗത്തെ മുൻനിര കേന്ദ്രമായി മാറാനുള്ള ദുബായുടെ പദ്ധതികൾക്ക് കരുത്തുപകർന്ന്, ദുബായ് കോമേഴ്‌സിറ്റിയിൽ (ഡിസിസി) 180 കോടി ദിർഹത്തിന്റെ (1.8 ബില്യൺ ദിർഹം) രണ്ടാം ഘട്ട വികസന പദ്ധതികൾ പ്രഖ്യാപിച്ചു.
മേഖലയിലെ പ്രഥമ സമഗ്ര ഡിജിറ്റൽ വാണിജ്യ ഫ്രീസോണായ ദുബായ് കോമേഴ്‌സിറ്റിയിൽ നിലവിലുള്ള ഓഫീസ്, വെയർഹൗസ്, വാണിജ്യ ഇടങ്ങളിലെല്ലാം തന്നെ 96 ശതമാനത്തോളം ബുക്കിംഗ് പൂർത്തിയായ പശ്ചാത്തലത്തിലാണ് വൻതോതിലുള്ള വിപുലീകരണം.
ദുബായ് ഇന്റഗ്രേറ്റഡ് ഇക്കണോമിക് സോൺസ് അതോറിറ്റിയും (DIEZ) വസൽ (Wasl) ഗ്രൂപ്പും സംയുക്തമായാണ് പദ്ധതി യാഥാർത്ഥ്യമാക്കുന്നത്. 2027-ന്റെ ഒന്നാം പാദം മുതൽ നിർമ്മാണം പൂർത്തിയാക്കിത്തുടങ്ങുന്ന പദ്ധതികൾ 2028 അവസാന പാദത്തോടെ പൂർണ്ണതോതിൽ പ്രവർത്തനസജ്ജമാകും. ദുബായുടെ സാമ്പത്തിക വളർച്ച ഇരട്ടിയാക്കുകയെന്ന ലക്ഷ്യത്തോടെ നടപ്പാക്കുന്ന ഡി33 (D33) അജണ്ടയുടെ ഭാഗമായാണ് ഈ നിക്ഷേപം.
ആഗോള സാമ്പത്തിക വെല്ലുവിളികൾക്കിടയിലും സുസ്ഥിരമായ നിക്ഷേപങ്ങൾ ആകർഷിക്കാൻ എമിറേറ്റിന് സാധിക്കുന്നുണ്ടെന്ന് DIEZ ചെയർമാൻ ശൈഖ് അഹമ്മദ് ബിൻ സഈദ് അൽ മക്തൂം വ്യക്തമാക്കി. ഡിജിറ്റൽ സമ്പദ്‌വ്യവസ്ഥയുടെ ആഗോള കേന്ദ്രമാക്കി ദുബായെ മാറ്റാൻ ഈ പദ്ധതി വഴിയൊരുക്കുമെന്നും അദ്ദേഹം പറഞ്ഞു.
ബിസിനസ്, ലോജിസ്റ്റിക്സ്, സോഷ്യൽ ക്ലസ്റ്ററുകളിലായി 91,000 ചതുരശ്ര മീറ്ററിലധികം അധിക വിസ്തൃതിയാണ് രണ്ടാം ഘട്ടത്തിൽ കൂട്ടിച്ചേർക്കുന്നത്.
ഇതിൽ ബിസിനസ്, സോഷ്യൽ ക്ലസ്റ്ററുകൾക്കായി മാത്രം 86,000 ചതുരശ്ര മീറ്റർ വിനിയോഗിക്കും. ആറ് പുതിയ വാണിജ്യ കെട്ടിടങ്ങളാണ് ബിസിനസ് ക്ലസ്റ്ററിൽ ഉയരുക. സ്റ്റാർട്ടപ്പുകൾക്കും വൻകിട കമ്പനികൾക്കും അനുയോജ്യമായ ‘പ്ലഗ് ആൻഡ് പ്ലേ’ ഓഫീസുകളും ഷെൽ-ആൻഡ്-കോർ ഇടങ്ങളും ഇവിടെ ലഭിക്കും. ആദ്യ ഘട്ട കെട്ടിടങ്ങൾ 2027 ആദ്യപാദത്തിലും ശേഷിക്കുന്നവ 2028 തുടക്കത്തിലും കൈമാറും. ജീവനക്കാർക്കും സന്ദർശകർക്കുമായി റീട്ടെയിൽ ഔട്ട്‌ലെറ്റുകൾ, റസ്റ്റോറന്റുകൾ, കഫേകൾ എന്നിവ സോഷ്യൽ ക്ലസ്റ്ററിൽ സജ്ജീകരിക്കും.
ലോജിസ്റ്റിക്സ് ക്ലസ്റ്ററിൽ ഒരുങ്ങുന്ന ‘ദി ഹൈവ്’ (The Hive) ആണ് ഈ വികസനത്തിലെ മറ്റൊരു പ്രധാന ആകർഷണം. കുറഞ്ഞ സ്ഥലത്ത് കൂടുതൽ സൗകര്യങ്ങൾ ഉൾക്കൊള്ളുന്ന ലംബമായ (വെർട്ടിക്കൽ) രൂപകൽപ്പനയിലാണ് 5,600 ചതുരശ്ര മീറ്ററിലുള്ള ഈ വെയർഹൗസ് നിർമ്മിക്കുന്നത്.
ചെറുകിട ഇ-കൊമേഴ്‌സ് സംരംഭകർക്ക് പ്രയോജനകരമാകുന്ന 5 ചതുരശ്ര മീറ്റർ മുതലുള്ള 181 ഫ്ലെക്സിബിൾ യൂണിറ്റുകൾ ഇവിടെയുണ്ടാകും. പൂർണ്ണമായും ശീതീകരിച്ച സ്റ്റോറേജ് സൗകര്യം, ഡിജിറ്റൽ ലോഡിംഗ്-അൺലോഡിംഗ് പോയിന്റുകൾ, ഇലക്ട്രിക് വാഹന ചാർജിംഗ് കേന്ദ്രങ്ങൾ എന്നിവയും ഹരിത മാനദണ്ഡങ്ങൾ പാലിച്ച് ലീഡ് (LEED) സർട്ടിഫിക്കേഷനോടെ ഇതിൽ ഉൾക്കൊള്ളിച്ചിട്ടുണ്ട്.
ഡിജിറ്റൽ സാങ്കേതിക കമ്പനികളുടെ പ്രാദേശിക ആവശ്യങ്ങൾ നിറവേറ്റുന്നതിൽ നിർണായക ചുവടുവെപ്പാണ് ഈ വികസനമെന്ന് DIEZ എക്സിക്യൂട്ടീവ് ചെയർമാനും ദുബായ് കോമേഴ്‌സിറ്റി ബോർഡ് ചെയർമാനുമായ ഡോ. മുഹമ്മദ് അൽ സറൂണി പറഞ്ഞു. വ്യവസായ സൗഹൃദ അന്തരീക്ഷം കൂടുതൽ മെച്ചപ്പെടുത്താൻ പുതിയ അടിസ്ഥാന സൗകര്യങ്ങൾ സഹായിക്കുമെന്ന് വസൽ ഗ്രൂപ്പ് സിഇഒ ഹിഷാം അബ്ദുല്ല അൽ ഖാസിമും വ്യക്തമാക്കി.
കഴിഞ്ഞ ഒരു വർഷത്തിനിടെ ദുബായ് കോമേഴ്‌സിറ്റി വഴിയുള്ള പാർസൽ നീക്കത്തിൽ 152 ശതമാനത്തിന്റെ വർധന രേഖപ്പെടുത്തിയിരുന്നു. ഡിസിസി വേ (DCC Way) ട്രാൻസിറ്റ് പ്ലാറ്റ്‌ഫോം വഴിയുള്ള ചരക്കുനീക്കം 14 ശതമാനവും ഉയർന്നു. ഈ വളർച്ചാ നിരക്കാണ് ഫ്രീസോണിന്റെ ശേഷി അടിയന്തരമായി വിപുലീകരിക്കാൻ അധികൃതരെ പ്രേരിപ്പിച്ചത്.
