ചലച്ചിത്ര താരം ജ്യോതി ലക്ഷ്മിയും പ്രമുഖ വ്യക്തിത്വങ്ങളും പങ്കെടുത്തു; കലാവിരുന്നുകളും വിഭവസമൃദ്ധമായ ഓണസദ്യയുമായി പ്രവാസി കൂട്ടായ്മ.
ദുബായ് — വേൾഡ് മലയാളി കൗൺസിൽ (WMC) ദുബായ് പ്രൊവിൻസ് സംഘടിപ്പിച്ച ഓണാഘോഷ പരിപാടി ‘അർപ്പോ 2026’ സമാപിച്ചു. യുഎഇയിലെ മലയാളി പ്രവാസി സമൂഹത്തെ ഒന്നിപ്പിച്ച് വൈവിധ്യമാർന്ന സാംസ്കാരിക പരിപാടികളോടെയും പരമ്പരാഗത തനിമയോടെയുമാണ് മേള അരങ്ങേറിയത്.
പ്രവാസി മലയാളികളുടെ ഒത്തുചേരലായി മാറിയ വേൾഡ് മലയാളി കൗൺസിൽ (WMC) ദുബായ് പ്രൊവിൻസിന്റെ ‘അർപ്പോ 2026’ ഓണാഘോഷത്തിന് വർണ്ണാഭമായ സമാപനം. തനിമയാർന്ന കലാരൂപങ്ങൾ, സംഗീതവിരുന്ന്, വിഭവസമൃദ്ധമായ ഓണസദ്യ എന്നിവയോടെയാണ് ആഘോഷങ്ങൾ നടന്നത്.
ചലച്ചിത്ര താരം ജ്യോതി ലക്ഷ്മി, ഐ.എ.എസ്. ശ്രീനിവാസൻ, ഹരികുമാർ എന്നിവർ മുഖ്യാതിഥികളായി പങ്കെടുത്തു. പ്രവാസി സമൂഹത്തിന്റെ സാംസ്കാരിക കൂട്ടായ്മകൾ നാടിന്റെ പാരമ്പര്യം വരുംതലമുറയിലേക്ക് പകരുന്നതിൽ വലിയ പങ്ക് വഹിക്കുന്നുണ്ടെന്ന് വിശിഷ്ടാതിഥികൾ ചൂണ്ടിക്കാട്ടി.
ദുബായ് പ്രൊവിൻസ് പ്രസിഡന്റ് ലാൽ ഭാസ്കർ പൊതുസമ്മേളനത്തിൽ അധ്യക്ഷത വഹിച്ചു. ചെയർമാൻ വി.എസ്. ബിജുകുമാർ, ജനറൽ സെക്രട്ടറി ബേബി വർഗീസ്, ട്രഷറർ സുധീർ പൊയ്യാരാ, വൈസ് പ്രസിഡന്റ് (അഡ്മിൻ) അഡ്വ. ഹാഷിക് തൈക്കണ്ടി എന്നിവർ പരിപാടികൾക്ക് നേതൃത്വം നൽകി. അർപ്പോ 2026 ജനറൽ കൺവീനർ അനീഷ് ബാദ്ഷാ, പ്രോഗ്രാം ഡയറക്ടർ ലക്ഷ്മി ലാൽ എന്നിവരുടെ നേതൃത്വത്തിലാണ് വേദിയിലെ വിവിധ പരിപാടികൾ ഏകോപിപ്പിച്ചത്.
ഡബ്ല്യു.എം.സി. ഗ്ലോബൽ ചെയർമാൻ ഐസക് ജോൺ പട്ടാണിപ്പറമ്പിൽ, പ്രസിഡന്റ് ബേബി മാത്യു സോമതീരം, സെക്രട്ടറി ജനറൽ മൂസ കോയ, അംബാസഡർ ജോണി കുരുവിള, വൈസ് പ്രസിഡന്റ് (ഓർഗനൈസേഷൻ) ചാൾസ് പോൾ, നേതാക്കളായ സി.യു. മത്തായി, ഷാഹുൽ ഹമീദ്, എസ്തർ ഐസക്, സി.എ. ബിജു എന്നിവർ സന്നിഹിതരായിരുന്നു.
മിഡിൽ ഈസ്റ്റ് റീജിയണൽ ചെയർമാൻ സന്തോഷ് കേട്ടത്ത്, പ്രസിഡന്റ് വിനേഷ് മോഹൻ, ട്രഷറർ ജൂഡിൻ ഫെർണാണ്ടസ്, വൈസ് പ്രസിഡന്റ് (അഡ്മിൻ) തോമസ് ജോസഫ്, വൈസ് ചെയർപേഴ്സൺ റാണി സുധീർ എന്നിവരും ആശംസകൾ നേർന്നു. വനിതാ വിഭാഗം പ്രസിഡന്റ് ആശ ചാൾസ്, സെക്രട്ടറി അനീറ്റ ജൂഡിൻ, ട്രഷറർ മേരാ ബേബി തുടങ്ങിയ ഭാരവാഹികളും സജീവ സാന്നിധ്യമായി.
വേദിയിൽ അരങ്ങേറിയ ‘നാഗവല്ലി’ സ്കിറ്റ് കാണികളുടെ പ്രത്യേക ശ്രദ്ധ നേടി. വള്ളപ്പാട്ട്, കൊട്ടിപ്പാട്ട്, ഗാനമേള, ഫാഷൻ ഷോ, കുട്ടികളുടെ നൃത്ത-കലാപരിപാടികൾ, ഡി.ജെ എന്നിവ ആഘോഷങ്ങൾക്ക് മാറ്റുകൂട്ടി. പരമ്പരാഗത വിഭവങ്ങളോടെയുള്ള വിപുലമായ ഓണസദ്യയോടെയാണ് പരിപാടികൾക്ക് തിരശ്ശീല വീണത്.
