സുസ്ഥിര ജനസംഖ്യാ ആസൂത്രണ നയത്തിനും ഡിജിറ്റൽ ഓതറൈസേഷൻ സംവിധാനത്തിനും അംഗീകാരം
ദുബായ്: നഗരവികസനം, ജനസംഖ്യാ ആസൂത്രണം, ഡിജിറ്റൽ സർക്കാർ സേവനങ്ങൾ എന്നിവയുമായി ബന്ധപ്പെട്ട സുപ്രധാന തീരുമാനങ്ങളുമായി ദുബായ് എക്സിക്യൂട്ടീവ് കൗൺസിൽ യോഗം. ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിന്റെ അധ്യക്ഷതയിൽ ചേർന്ന യോഗത്തിൽ ശൈഖ് മക്തൂം ബിൻ മുഹമ്മദ് ബിൻ റാഷിദ് അൽ മക്തൂമും ശൈഖ് അഹമ്മദ് ബിൻ മുഹമ്മദ് ബിൻ റാഷിദ് അൽ മക്തൂമും പങ്കെടുത്തു.
ദുബായിലെ നഗരകേന്ദ്രങ്ങളെ സമഗ്ര സൗകര്യങ്ങളുള്ള ജനവാസ മേഖലകളായി വികസിപ്പിക്കുന്നതിനുള്ള അർബൻ സെന്റേഴ്സ് ഡെവലപ്മെന്റ് പ്ലാനിന് യോഗം അംഗീകാരം നൽകി. പദ്ധതിയിലൂടെ ലക്ഷ്യമിടുന്ന നഗരകേന്ദ്രങ്ങളിലെ റിയൽ എസ്റ്റേറ്റ് മൂല്യം 20 ബില്യൺ ദിർഹം (2,000 കോടി ദിർഹം) വർധിപ്പിക്കുകയാണ് ലക്ഷ്യം.
സാമ്പത്തിക വളർച്ചയും ജനസംഖ്യാ വർധനയും തമ്മിൽ സന്തുലിതാവസ്ഥ ഉറപ്പാക്കുന്നതിനുള്ള സുസ്ഥിര ജനസംഖ്യാ ആസൂത്രണ നയത്തിനും കൗൺസിൽ അംഗീകാരം നൽകി. ദുബായുടെ ഭാവി ആവശ്യങ്ങൾക്കനുസരിച്ച് സേവനങ്ങളും അടിസ്ഥാന സൗകര്യങ്ങളും വികസിപ്പിക്കാൻ ഈ നയം വഴിയൊരുക്കും.
സർക്കാർ സേവനങ്ങൾ കൂടുതൽ ലളിതവും വിശ്വസനീയവുമാക്കുന്നതിനുള്ള ഡിജിറ്റൽ ഓതറൈസേഷൻ സംവിധാനത്തിനും അംഗീകാരം ലഭിച്ചു. സമൂഹത്തിന്റെയും ബിസിനസ് മേഖലയുടെയും ആവശ്യങ്ങൾ നിറവേറ്റുന്ന ഏകീകൃത ഡിജിറ്റൽ സർക്കാർ സേവനാനുഭവം ഒരുക്കുകയാണ് ഇതിന്റെ ലക്ഷ്യം.
നഗരവികസനം, ജനസംഖ്യാ ആസൂത്രണം, ഡിജിറ്റൽ പരിവർത്തനം എന്നീ മേഖലകളിൽ ദുബായുടെ ദീർഘകാല വളർച്ചയ്ക്ക് പിന്തുണ നൽകുന്നതാണ് കൗൺസിലിന്റെ ഈ തീരുമാനങ്ങൾ.
