അത്യാധുനിക എഐ, ലേസർ സാങ്കേതികവിദ്യകൾ പ്രയോജനപ്പെടുത്തി വാർഷിക അറ്റകുറ്റപ്പണി വിജയകരമായി പൂർത്തിയാക്കിയതായി റോഡ്സ് ആൻഡ് ട്രാൻസ്പോർട്ട് അതോറിറ്റി.
ദുബായ്, യുഎഇ — ദുബായിലെ പ്രധാന ഹൈവേകളിലെ തിരക്കേറിയ 20 കിലോമീറ്റർ സ്ലോ ലെയ്നുകളുടെ വാർഷിക അറ്റകുറ്റപ്പണികളും പുനരുദ്ധാരണ പ്രവർത്തനങ്ങളും പൂർത്തിയായതായി റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) അറിയിച്ചു.
അബുദാബി, ഷാർജ ദിശകളിലേക്കുള്ള ശൈഖ് മുഹമ്മദ് ബിൻ സായിദ് റോഡിന്റെ ഇരുവശങ്ങളിലും ലെഹ്ബാബ് റോഡിലുമാണ് പ്രധാനമായും നിർമാണ പ്രവർത്തനങ്ങൾ നടന്നത്. അൽ ഐനിൽ നിന്ന് ലെഹ്ബാബിലേക്ക് പോകുന്ന വാഹനങ്ങൾക്കായുള്ള ഫ്രീ-ഫ്ലോ ലെയ്ൻ, ജബൽ അലി-ലെഹ്ബാബ് ഇന്റർചേഞ്ചിലെ ടേണിങ് ലെയ്നുകൾ എന്നിവയ്ക്ക് പുറമെ ദുബായ്–അൽ ഐൻ റോഡ്, എമിറേറ്റ്സ് റോഡ്, അൽ റെബാത്ത് സ്ട്രീറ്റ് എന്നിവിടങ്ങളിലും അറ്റകുറ്റപ്പണികൾ പൂർത്തിയായി.
നഗരത്തിലെ ജനസംഖ്യാ-സാമ്പത്തിക വളർച്ചയ്ക്ക് അനുസൃതമായി റോഡ് ശൃംഖലയുടെ പ്രവർത്തനക്ഷമതയും സുരക്ഷയും ഉറപ്പുവരുത്തുന്ന വാർഷിക പ്രതിരോധ പരിപാലന പദ്ധതിയുടെ ഭാഗമായാണ് നവീകരണം നടപ്പാക്കിയത്.
രാജ്യാന്തര മാനദണ്ഡങ്ങൾക്കനുസൃതമായി റോഡുകളുടെ അവസ്ഥ മുൻകൂട്ടി വിലയിരുത്തിയാണ് വാർഷിക പദ്ധതികൾ തയ്യാറാക്കുന്നതെന്ന് ആർടിഎ ട്രാഫിക് ആൻഡ് റോഡ്സ് ഏജൻസിയിലെ റോഡ്സ് ആൻഡ് ഫെസിലിറ്റീസ് മെയിന്റനൻസ് ഡയറക്ടർ നബീൽ മുഹമ്മദ് വ്യക്തമാക്കി. ആധുനിക ലേസർ, ആർട്ടിഫിഷ്യൽ ഇന്റലിജൻസ് സാങ്കേതികവിദ്യകൾ ഉപയോഗിച്ച് റോഡുകളിലെ വിള്ളലുകളും കുഴികളും കണ്ടെത്തുകയും തുടർന്ന് അറ്റകുറ്റപ്പണികൾ നടത്തുകയുമാണ് ചെയ്യുന്നതെന്നും അദ്ദേഹം വിശദീകരിച്ചു.
പ്രവൃത്തികൾ നടക്കുന്ന ഘട്ടത്തിൽ ഏർപ്പെടുത്തിയ ഗതാഗത വഴിതിരിച്ചുവിടലുകൾ കൃത്യമായ പഠനങ്ങളുടെ അടിസ്ഥാനത്തിലായിരുന്നുവെന്ന് അധികൃതർ അറിയിച്ചു. വഴിതിരിച്ചുവിടലുകൾ ഉള്ള ഇടങ്ങളിൽ ഡ്രൈവർമാർ ജാഗ്രത പാലിക്കണമെന്നും മാർഗ്ഗനിർദ്ദേശ ബോർഡുകൾ കൃത്യമായി പിന്തുടരണമെന്നും ആർടിഎ നിർദ്ദേശിച്ചു.
