2026–2027 സീസണിലെ റേസിംഗ് കാർണിവലിലും ദുബായ് വേൾഡ് കപ്പിലും മെയ്ദാനിൽ അത്യാധുനിക ആരോഗ്യ പരിശോധനകളും വെൽനസ് സേവനങ്ങളും ലഭ്യമാക്കും
ദുബായ്, യു.എ.ഇ — 2026–2027 ദുബായ് റേസിംഗ് കാർണിവലിന്റെയും 2027 ദുബായ് വേൾഡ് കപ്പിന്റെയും ഔദ്യോഗിക വെൽനസ് പങ്കാളിയായി മെഡ്കെയർ ഹോസ്പിറ്റൽസ് ആൻഡ് മെഡിക്കൽ സെന്റേഴ്സ് ദുബായ് റേസിംഗ് ക്ലബ്ബുമായി കൈകോർക്കുന്നു. കുതിരപ്പന്തയ പ്രേമികൾക്കായി മെയ്ദാൻ റേസ്‌കോഴ്‌സിൽ നേരിട്ട് ആരോഗ്യ-പ്രതിരോധ പരിശോധനകളും വെൽനസ് സേവനങ്ങളും ഒരുക്കുകയാണ് ഈ സംരംഭത്തിന്റെ ലക്ഷ്യം.
ആർട്ടിഫിഷ്യൽ ഇന്റലിജൻസ് അധിഷ്ഠിത ഹെൽത്ത് സ്ക്രീനിംഗുകൾ, പ്രാഥമിക ആരോഗ്യ പരിശോധനകൾ, വെൽനസ് ഐ.വി ഡ്രിപ്പുകൾ, ബ്യൂട്ടി-സൗന്ദര്യവർദ്ധക സേവനങ്ങൾ എന്നിവ റേസ് കോഴ്സിലെ പ്രത്യേക വെൽനസ് കേന്ദ്രങ്ങളിൽ ലഭ്യമാക്കും. റേസിംഗ് വേദിയിലെ സേവനങ്ങൾക്ക് പുറമെ, മെഡ്‌കെയറിന്റെ ആശുപത്രികളിലും മെഡിക്കൽ സെന്ററുകളിലും ഉപയോഗിക്കാവുന്ന സൗജന്യ ആരോഗ്യ സേവനങ്ങളും സന്ദർശകർക്ക് ലഭിക്കും.
മെയ്ദാനിലെത്തുന്ന കാണികൾക്ക് കായിക വിനോദത്തോടൊപ്പം മികച്ച ആരോഗ്യ പരിചരണവും ഉറപ്പാക്കുകയാണ് ഈ സഹകരണത്തിലൂടെ ലക്ഷ്യമിടുന്നതെന്ന് ദുബായ് റേസിംഗ് ക്ലബ് ബോർഡ് അംഗവും സി.ഇ.ഒയുമായ എച്ച്.ഇ. അലി അൽ അലി വ്യക്തമാക്കി.
ആളുകൾ ഒത്തുചേരുന്ന പ്രധാന കായിക വേദികളിൽത്തന്നെ ആരോഗ്യ അവബോധം എത്തിക്കുകയാണ് ലക്ഷ്യമെന്ന് ആസ്റ്റർ ഡി.എം ഹെൽത്ത്‌കെയർ ജി.സി.സി മാനേജിംഗ് ഡയറക്ടറും ഗ്രൂപ്പ് സി.ഇ.ഒയുമായ അലീഷ മൂപ്പൻ പറഞ്ഞു. പ്രതിരോധ ആരോഗ്യപരിപാലന ശീലങ്ങൾ ജീവിതശൈലിയുടെ ഭാഗമാക്കാൻ ഇത് പ്രയോജനപ്പെടുമെന്നും അവർ കൂട്ടിച്ചേർത്തു.
പ്രാഥമിക പരിശോധനകളിലൂടെയും സ്ക്രീനിംഗുകളിലൂടെയും ആരോഗ്യ സംരക്ഷണത്തിലേക്ക് ആദ്യപടിയെടുക്കാൻ ആളുകളെ പ്രോത്സാഹിപ്പിക്കുകയാണ് തങ്ങളുടെ ലക്ഷ്യമെന്ന് മെഡ്കെയർ ഹോസ്പിറ്റൽസ് ആൻഡ് മെഡിക്കൽ സെന്റേഴ്സ് സി.ഇ.ഒ ഡോ. ഷനില ലൈജു പറഞ്ഞു. ട്രാക്കിലെ പ്രാഥമിക ചർച്ചകളിൽ തുടങ്ങി മെഡ്‌കെയറിന്റെ ആശുപത്രി ശൃംഖല വഴി സമഗ്രമായ തുടർചികിത്സയും ഉറപ്പാക്കും.
