നവംബർ 24 മുതൽ ഡിസംബർ ഒന്നു വരെ എമിറേറ്റ്സ് ഹാളിൽ നടക്കുന്ന മേളയിൽ പ്രവേശനം സൗജന്യമാണ്; തിരഞ്ഞെടുത്ത പുസ്തകങ്ങൾക്ക് 90 ശതമാനം വരെ വിലക്കിഴിവ് ലഭിക്കും.
അജ്മാൻ, യുഎഇ — ബിഗ് ബാഡ് വുൾഫ് ബുക്ക് സെയിൽ 2026 നവംബർ 24 ചൊവ്വാഴ്ച മുതൽ ഡിസംബർ ഒന്ന് ചൊവ്വാഴ്ച വരെ അജ്മാനിൽ നടക്കും. അൽ ജുർഫ് രണ്ടിലെ എമിറേറ്റ്സ് ഹാളിൽ (എമിറേറ്റ്സ് ഹോസ്പിറ്റാലിറ്റി സെന്റർ) എട്ട് ദിവസങ്ങളിലായി നടക്കുന്ന മേളയിൽ അഞ്ച് ലക്ഷത്തിലധികം പുസ്തകങ്ങളാണ് വായനക്കാരെ കാത്തിരിക്കുന്നത്. തിരഞ്ഞെടുത്ത പുസ്തകങ്ങൾക്ക് 90 ശതമാനം വരെ വിലക്കിഴിവ് ലഭിക്കും.
മേളയിലേക്ക് പ്രവേശനം പൂർണ്ണമായും സൗജന്യമാണ്. എല്ലാ ദിവസവും രാവിലെ 10 മണി മുതൽ അർദ്ധരാത്രി 12 മണി വരെയാണ് പ്രവർത്തന സമയം. അജ്മാൻ കൾച്ചർ സെന്ററിൽ നടന്ന വാർത്താസമ്മേളനത്തിലാണ് സംഘാടകർ ഇക്കാര്യം അറിയിച്ചത്. അജ്മാൻ ടൂറിസം, കൾച്ചർ ആൻഡ് മീഡിയ വകുപ്പുമായി സഹകരിച്ചും ഷാർജ ബുക്ക് അതോറിറ്റിയുടെ (എസ്.ബി.എ) പിന്തുണയോടെയുമാണ് മേള സംഘടിപ്പിക്കുന്നത്.
അജ്മാൻ കിരീടാവകാശി ഷെയ്ഖ് അമ്മാർ ബിൻ ഹുമൈദ് അൽ നുഐമി കഴിഞ്ഞ മാസം അംഗീകരിച്ച ‘അജ്മാൻ ലൈഫ്ലോങ് ലേണിംഗ് സ്ട്രാറ്റജിക് ഫ്രെയിംവർക്ക്’ ലക്ഷ്യങ്ങൾക്ക് കരുത്തുപകരുന്നതാണ് ഈ പുസ്തകമേളയെന്ന് ഷാർജ ബുക്ക് അതോറിറ്റി ഇൻവെസ്റ്റ്മെന്റ് ആൻഡ് പാർട്ണർഷിപ്പ് ഡയറക്ടറും ബിഗ് ബാഡ് വുൾഫ് ബുക്സ് യുഎഇ ബോർഡ് അംഗവുമായ മാജിദ് അൽ നുഐമി പറഞ്ഞു. എല്ലാ പ്രായക്കാർക്കും വായനയും അറിവും എളുപ്പത്തിൽ ലഭ്യമാക്കാൻ ഇത്തരം മേളകൾ സഹായിക്കുമെന്നും അദ്ദേഹം വ്യക്തമാക്കി.
പ്രസാധകരെയും വായനക്കാരെയും തമ്മിൽ ബന്ധിപ്പിക്കുന്ന സുപ്രധാന വേദിയാണ് ബിഗ് ബാഡ് വുൾഫ് ബുക്ക് സെയിലെന്ന് അജ്മാൻ ടൂറിസം, കൾച്ചർ ആൻഡ് മീഡിയ വകുപ്പിലെ ഇവന്റ്സ്, പ്രോഗ്രാംസ് ആൻഡ് ടാലന്റ്സ് വിഭാഗം ഡയറക്ടർ അബ്ദുള്ള അൽഒബൈദ്ലി പറഞ്ഞു. വൈവിധ്യമാർന്ന പുസ്തകങ്ങൾ ജനങ്ങളിലേക്ക് എത്തിക്കുന്നതിലൂടെ വായനാശീലം വളർത്താൻ സാധിക്കുമെന്നും അദ്ദേഹം അഭിപ്രായപ്പെട്ടു.
പതിനായിരത്തിലധികം വ്യത്യസ്ത ശീർഷകങ്ങളിലുള്ള പുസ്തകങ്ങളാണ് ഇത്തവണ ഒരുക്കിയിട്ടുള്ളത്. ഇതിൽ 58 ശതമാനം പുസ്തകങ്ങളും അജ്മാനിലെ മുൻ പതിപ്പുകളിൽ ഇല്ലാതിരുന്ന പുതിയ ശേഖരമാണ്. ചിത്രകഥകൾ, കോമിക്സ്, യംഗ് അഡൾട്ട് ഫിക്ഷൻ, ത്രില്ലറുകൾ, ശാസ്ത്രം, ചരിത്രം, ജീവചരിത്രങ്ങൾ, വ്യക്തിത്വ വികസനം, ജീവിതശൈലി എന്നിവയ്ക്ക് പുറമെ കുട്ടികൾക്കായുള്ള ആക്ടിവിറ്റി ബുക്കുകളും കളറിംഗ് ബുക്കുകളും മേളയിലുണ്ടാകും.
പ്രധാന പുസ്തകങ്ങളും വിലവിവരങ്ങളും താഴെ പറയുന്നവയാണ്:
- ജെ.കെ. റൗളിംഗിന്റെ ഹാരി പോട്ടർ സമ്പൂർണ്ണ ബോക്സ് സെറ്റ്: 200 ദിർഹം (യഥാർത്ഥ വില 1,265 ദിർഹം)
- ജെഫ് കിന്നിയുടെ 12 പുസ്തകങ്ങളടങ്ങിയ ഡയറി ഓഫ് എ വിംപി കിഡ് ബോക്സ് സെറ്റ്: 200 ദിർഹം (യഥാർത്ഥ വില 544 ദിർഹം)
- റേച്ചൽ റെനീ റസ്സലിന്റെ ഡോർക്ക് ഡയറീസ് 15: 40 ദിർഹം
- പോക്കിമോൻ സെർച്ച് ആൻഡ് ഫൈൻഡ്: 27 ദിർഹം
- ബ്ലൂയി ആൻഡ് ഫ്രണ്ട്സ് സ്റ്റിക്കർ ആൻഡ് ആക്ടിവിറ്റി ബുക്ക്: 18 ദിർഹം
- ഫ്രീഡ മക്ഫാഡന്റെ ദി ഹൗസ്മെയ്ഡ്: 27 ദിർഹം
- സതോഷി യാഗിസാവയുടെ ഡെയ്സ് അറ്റ് ദി മൊറിസാക്കി ബുക്ക്ഷോപ്പ്: 49 ദിർഹം
- ജെയിംസ് ക്ലിയറിന്റെ അറ്റോമിക് ഹാബിറ്റ്സ്: 65 ദിർഹം
- ജയ് ഷെട്ടിയുടെ 8 റൂൾസ് ഓഫ് ലവ്: 35 ദിർഹം
- വാൾട്ടർ ഐസക്സൺ രചിച്ച ഇലോൺ മസ്ക് ജീവചരിത്രം: 49 ദിർഹം (യഥാർത്ഥ വില 212 ദിർഹം)
ബിഗ് ബാഡ് വുൾഫ് ബുക്സിൽ രജിസ്റ്റർ ചെയ്ത അംഗങ്ങൾക്ക് രണ്ട് ദിർഹം മുതൽ ആരംഭിക്കുന്ന പ്രത്യേക പ്രൊമോഷണൽ പുസ്തകങ്ങൾ വാങ്ങാൻ അവസരമുണ്ട്. ഒരാൾക്ക് രണ്ട് പുസ്തകങ്ങൾ എന്ന പരിധിക്ക് വിധേയമായാണ് ഇവ ലഭിക്കുക. കൂടാതെ, ഒറ്റ ബില്ലിൽ 200 മുതൽ 299.99 ദിർഹം വരെ ചെലവഴിക്കുന്ന അംഗങ്ങൾക്ക് 10 ദിർഹവും, 300 മുതൽ 399.99 ദിർഹം വരെ ചെലവഴിക്കുന്നവർക്ക് 20 ദിർഹവും, 400 ദിർഹമോ അതിൽ കൂടുതലോ ചെലവഴിക്കുന്നവർക്ക് 35 ദിർഹവും തൽക്ഷണ കിഴിവ് (റിബേറ്റ്) ലഭിക്കും.
വിദ്യാർത്ഥികൾ, അധ്യാപകർ, ലൈബ്രേറിയന്മാർ, അംഗീകൃത ലൈബ്രറി അംഗങ്ങൾ എന്നിവർക്ക് കുറഞ്ഞത് മൂന്ന് പുസ്തകങ്ങൾ വാങ്ങുമ്പോൾ അഞ്ച് ശതമാനം കിഴിവ് ലഭിക്കും. അംഗീകൃത സ്ഥാപനങ്ങൾക്ക് 2,000 ദിർഹത്തിന് മുകളിലുള്ള പർച്ചേസുകൾക്ക് എട്ട് ശതമാനവും, ബൾക്ക് ബയർമാർക്ക് 8,000 ദിർഹത്തിന് മുകളിലുള്ള പർച്ചേസുകൾക്ക് 10 ശതമാനവും ഇളവ് അനുവദിച്ചിട്ടുണ്ട്. ഈ ആനുകൂല്യങ്ങൾ മറ്റ് ഓഫറുകളുമായി സംയോജിപ്പിക്കാൻ കഴിയില്ല.
മേളയ്ക്ക് മുന്നോടിയായി നവംബർ 17 മുതൽ 21 വരെ ഇൻസ്റ്റാഗ്രാമിൽ പ്രത്യേക മത്സരം സംഘടിപ്പിക്കുന്നുണ്ട്. 18 വയസ്സിന് മുകളിലുള്ള യുഎഇ നിവാസികൾക്ക് @bigbadwolf.uae എന്ന അക്കൗണ്ട് ഫോളോ ചെയ്തും മത്സര പോസ്റ്റ് ലൈക്ക് ചെയ്ത് സ്റ്റോറിയിൽ ഷെയർ ചെയ്തും കമന്റിൽ രണ്ട് സുഹൃത്തുക്കളെ ടാഗ് ചെയ്തും ഇതിൽ പങ്കെടുക്കാം. തിരഞ്ഞെടുക്കപ്പെടുന്ന മൂന്ന് വിജയികൾക്ക് 150 ദിർഹം വീതമുള്ള ബുക്ക് വൗച്ചറുകൾ സമ്മാനമായി ലഭിക്കും. നവംബർ 23-ന് വിജയികളെ പ്രഖ്യാപിക്കും.










