ദുബായ്: സുരക്ഷാ-നിയമനിർവഹണ രംഗത്തെ മികവിനൊപ്പം സാമൂഹിക പ്രതിബദ്ധതയിലും തങ്ങൾ മുൻപന്തിയിലാണെന്ന് തെളിയിച്ച് ദുബായ് ഇമിഗ്രേഷൻ (ജി.ഡി.ആർ.എഫ്.എ). ദുബായ് ഹെൽത്തുമായി സഹകരിച്ച് ഇമിഗ്രേഷൻ ആസ്ഥാനത്ത് സംഘടിപ്പിച്ച രക്തദാന ക്യാമ്പ് ജീവനക്കാരുടെ പങ്കാളിത്തം കൊണ്ട് ശ്രദ്ധേയമായി. സഹജീവികളോടുള്ള കരുതലും ജീവൻ രക്ഷാ പ്രവർത്തനങ്ങളിൽ പങ്കാളികളാകാനുള്ള സന്നദ്ധതയും ഉയർത്തിപ്പിടിച്ചാണ് ഇമിഗ്രേഷൻ വകുപ്പിലെ ഉദ്യോഗസ്ഥരും ജീവനക്കാരും ക്യാമ്പിൽ അണിനിരന്നത്. ദുബായ് സർക്കാരിന്റെ “സജീവ സമൂഹ പങ്കാളിത്തം” എന്ന വിശാലമായ കാഴ്ചപ്പാടിന്റെ ഭാഗമായാണ് ഈ ഉദ്യമം സംഘടിപ്പിച്ചത്.
ജി.ഡി.ആർ.എഫ്.എ ആസ്ഥാനത്ത് നടന്ന ക്യാമ്പിൽ വിവിധ തസ്തികകളിലുള്ള നിരവധി ജീവനക്കാർ രക്തം ദാനം ചെയ്തു. ഒരു സർക്കാർ സ്ഥാപനം എന്ന നിലയിൽ ഔദ്യോഗിക കൃത്യനിർവഹണത്തിന് പുറമെ, സമൂഹത്തിന്റെ ക്ഷേമത്തിനായി പ്രവർത്തിക്കേണ്ടത് തങ്ങളുടെ ഉത്തരവാദിത്തമാണെന്ന് അധികൃതർ വ്യക്തമാക്കി. രക്തദാനത്തിലൂടെ ഒരാളുടെ ജീവൻ രക്ഷിക്കാൻ സാധിക്കുമെന്ന ബോധ്യം ജീവനക്കാർക്കിടയിൽ വലിയ രീതിയിലുള്ള പ്രതികരണം സൃഷ്ടിച്ചു. സേവന മനോഭാവവും സാമൂഹിക ഉത്തരവാദിത്തബോധവും വളർത്തുന്നതിൽ ഇത്തരം പരിപാടികൾ വലിയ പങ്കുവഹിക്കുന്നുണ്ട്.
ദുബായ് ഇമിഗ്രേഷൻ വകുപ്പ് കേവലം ഒരു പാസ്പോർട്ട് നിയന്ത്രണ വിഭാഗം എന്നതിലുപരി, മാനുഷിക മൂല്യങ്ങൾക്ക് വിലകൽപ്പിക്കുന്ന ഒരു ഡിപ്പാർട്ട്മെന്റാണെന്ന് ജനറൽ ഡയറക്ടറേറ്റ് വാർത്താക്കുറിപ്പിൽ അറിയിച്ചു. ജീവനക്കാരുടെ കൂട്ടായ പ്രവർത്തനത്തിലൂടെ സമൂഹത്തോടുള്ള ഐക്യദാർഢ്യം പ്രകടമാക്കാൻ സാധിച്ചു. വരും വർഷങ്ങളിലും സമാനമായ ആരോഗ്യ-സാമൂഹിക പ്രവർത്തനങ്ങൾ കൂടുതൽ ഊർജ്ജിതമായി തുടരാനാണ് വകുപ്പിന്റെ തീരുമാനം. ദുബായ് ഭരണകൂടം വിഭാവനം ചെയ്യുന്ന സുസ്ഥിരവും കരുതലുളളതുമായ ഒരു സമൂഹത്തിന്റെ നിർമ്മാണത്തിൽ തങ്ങൾ എന്നും പങ്കാളികളായിരിക്കുമെന്ന് അധികൃതർ ഉറപ്പുനൽകുന്നു.
രക്തദാനം പോലുള്ള മഹാദാനങ്ങൾ ഔദ്യോഗിക തിരക്കുകൾക്കിടയിലും ഏറ്റെടുത്ത ദുബായ് ഇമിഗ്രേഷൻ ജീവനക്കാരുടെ മാതൃക മറ്റ് സ്ഥാപനങ്ങൾക്കും പ്രചോദനമാണ്. ഓരോ തുള്ളി രക്തവും മറ്റൊരു ജീവിതത്തിന് വെളിച്ചമാകുമെന്ന സന്ദേശം ഈ ക്യാമ്പിലൂടെ സമൂഹത്തിന് കൈമാറാൻ സാധിച്ചു. മനുഷ്യത്വം എന്ന വികാരം അതിരുകളില്ലാതെ പ്രവഹിക്കുമ്പോൾ അത് ലോകത്തെ കൂടുതൽ സുന്ദരമാക്കുന്നു എന്ന തിരിച്ചറിവോടെയാണ് ക്യാമ്പ് സമാപിച്ചത്.
