ദുബൈ: വിദേശത്ത് താമസിക്കുന്ന ഇന്ത്യൻ പൗരന്മാരുടെ വോട്ടവകാശം സംരക്ഷിക്കണമെന്നും, അകാരണമാക്കി നിരസിക്കപ്പെടുന്ന ഫോം 6എ അപേക്ഷകൾ പുനഃപരിശോധിച്ച് അംഗീകരിക്കണമെന്നും Kerala Muslim Cultural Centre ദുബൈ കാസർകോട് ജില്ലാ കമ്മിറ്റി ആവശ്യപ്പെട്ടു.
പ്രസിഡന്റ് സലാം കന്യപ്പാടി, ജനറൽ സെക്രട്ടറി ഹനീഫ് ടി.ആർ, ട്രഷറർ ഡോ. ഇസ്മായിൽ എന്നിവർ പുറത്തിറക്കിയ പ്രസ്താവനയിലാണ് ആവശ്യം ഉന്നയിച്ചത്.
ഓൺലൈൻ പോർട്ടൽ വഴി സമർപ്പിക്കുന്ന ഫോം 6എ അപേക്ഷകളിൽ ആവശ്യമായ എല്ലാ വിവരങ്ങളും വിസാ വിശദാംശങ്ങൾ ഉൾപ്പെടെ കൃത്യമായി രേഖപ്പെടുത്തി ബന്ധപ്പെട്ട രേഖകൾ അപ്ലോഡ് ചെയ്തിട്ടും അപേക്ഷകൾ അകാരണമാക്കി നിരസിക്കുന്ന പ്രവണത പ്രവാസികൾ ആശങ്കയോടെ കാണുന്നതായി നേതാക്കൾ പറഞ്ഞു.
സാധുവായ പാസ്പോർട്ട് പകർപ്പ്, അക്ക്നോളജ്മെന്റ് ഫോം എന്നിവ സമർപ്പിച്ച ശേഷവും ബി.എൽ.ഒ പരിശോധനയും ഫീൽഡ് വെരിഫിക്കേഷനും പൂർത്തിയായതിന് ശേഷമാണ് പല അപേക്ഷകളും തള്ളപ്പെടുന്നതെന്നും ഇത് ഗൗരവമായ വിഷയമാണെന്നും അവർ ചൂണ്ടിക്കാട്ടി.
ജനാധിപത്യത്തിന്റെ അടിസ്ഥാന അവകാശമായ വോട്ടവകാശം പ്രവാസി ഇന്ത്യക്കാർക്കും തുല്യമായി ലഭിക്കണം. സാങ്കേതിക പിഴവുകളോ അനാവശ്യ കാരണങ്ങളോ ചൂണ്ടിക്കാട്ടി അപേക്ഷകൾ തള്ളുന്നത് പ്രവാസി സമൂഹത്തിന്റെ അവകാശങ്ങൾ നിഷേധിക്കുന്നതിനു തുല്യമാണെന്നും പ്രസ്താവനയിൽ പറയുന്നു.
പ്രവാസി വോട്ടർമാരുടെ അവകാശ സംരക്ഷണത്തിനായി നിയമപരവും ജനാധിപത്യപരവുമായ എല്ലാ മാർഗങ്ങളും സ്വീകരിക്കുമെന്നും കെ.എം.സി.സി ഭാരവാഹികൾ അറിയിച്ചു.
