റാസൽഖൈമ: റാക് പോലീസ് മീഡിയ & പബ്ലിക് റിലേഷൻസ് വിഭാഗം പുതിയ പ്രവർത്തന പദ്ധതികൾക്ക് രൂപം നൽകിയതായി അധികൃതർ അറിയിച്ചു.
കഴിഞ്ഞ ദിവസം സംഘടിപ്പിച്ച ശൈത്യകാല സംഗമത്തിലാണ് പദ്ധതികൾ അവതരിപ്പിച്ചതെന്ന് മീഡിയ ആൻഡ് പബ്ലിക് റിലേഷൻസ് ഡയറക്ടർ കേണൽ ഹമദ് അബ്ദുള്ള അൽ അവ്ദി പറഞ്ഞു. ജീവനക്കാരും ഉദ്യോഗസ്ഥരും തമ്മിലുള്ള ആശയവിനിമയം ശക്തിപ്പെടുത്തുകയും ടീം വർക്ക് മനോഭാവം വളർത്തുകയും ചെയ്യുന്നതായിരുന്നു സംഗമത്തിന്റെ പ്രധാന ലക്ഷ്യം.
രാജ്യ നേതൃത്വത്തിന്റെ ദൗത്യങ്ങൾക്ക് പിന്തുണ നൽകുന്ന രീതിയിൽ ആധുനിക മീഡിയ പദ്ധതികൾ നടപ്പാക്കാനാണ് തീരുമാനം. റാക് പോലീസ് സേനയുടെ മീഡിയ സാന്നിധ്യം ശക്തിപ്പെടുത്തി സുരക്ഷാ–സാമൂഹിക സന്ദേശങ്ങൾക്ക് കൂടുതൽ വ്യാപക പ്രചാരണം ഉറപ്പാക്കുമെന്നും അധികൃതർ വ്യക്തമാക്കി.
പുതിയ ആശയങ്ങൾ അവതരിപ്പിക്കാനും മീഡിയ പ്രവർത്തനം കൂടുതൽ കാര്യക്ഷമമാക്കാനും ശൈത്യകാല സംഗമം വേദിയായി. ജോലിസമ്മർദ്ദങ്ങളിൽ നിന്ന് മാറി സൗഹൃദപരമായ അന്തരീക്ഷത്തിൽ സമയം ചെലവഴിക്കാൻ ജീവനക്കാർക്ക് അവസരം ലഭിച്ചതായും ഹമദ് അബ്ദുള്ള കൂട്ടിച്ചേർത്തു.
റാക് പോലീസ് ഓപ്പറേഷൻസ് ഡയറക്ടർ ബ്രിഗേഡിയർ ഡോ. അബ്ദുള്ള ബിൻ സൽമാൻ അൽ നുഐമിയും മറ്റു ഉദ്യോഗസ്ഥരും ജീവനക്കാരും സംഗമത്തിൽ പങ്കെടുത്തു.
