ദുബൈ: യു.എ.ഇ പ്രസിഡന്റ് ശൈഖ് മുഹമ്മദ് ബിന് സായിദ് അല് നഹ്യാന് പ്രഖ്യാപിച്ച ‘2026 കുടുംബ വര്ഷം’ ആശയത്തെ ആസ്പദമാക്കി പ്രഗത്ഭ വാഗ്മിയും പാര്ലിമെന്റേറിയനുമായ ഡോ. എം.പി അബ്ദുസമദ് സമദാനി എം.പി ഫെബ്രുവരി 21 ശനിയാഴ്ച (റമദാൻ 4) രാത്രി 8.30ന് ദുബൈ അല്ബറാഹയിലെ വിമന്സ് അസോസിയേഷന് ഓഡിറ്റോറിയത്തില് പ്രഭാഷണം നടത്തും.
“കുടുംബം: മാനവത്വത്തിന്റെ അടിസ്ഥാനം” എന്ന വിഷയത്തിലാണ് പ്രഭാഷണം. മാനുഷിക മൂല്യങ്ങളുടെ ആദ്യ പാഠശാലയും പൈതൃകത്തിൻ്റെയും സംസ്കാരത്തിൻ്റെയും ഉറവിടവുമായ കുടുംബം വ്യക്തിത്വ രൂപീകരണത്തില് നിര്ണായകമാണെന്ന ആശയം ചര്ച്ചയാകും. സമൂഹത്തിന്റെയും രാഷ്ട്രത്തിന്റെയും ക്ഷേമത്തിന് ശക്തമായ കുടുംബ സംവിധാനം അനിവാര്യമാണെന്ന യു.എ.ഇ സര്ക്കാരിന്റെ നിലപാടും വിശദീകരിക്കും.
ബഹുസ്വരത, കുടുംബമാഹാത്മ്യം, മൈത്രി, സാമൂഹിക സുസ്ഥിരത എന്നിവ പ്രമേയമാക്കി പതിറ്റാണ്ടുകളായി പ്രഭാഷണങ്ങൾ നടത്തുന്ന സമദാനിയുടെ വാഗ്ധോരണികൾ പഴയതലമുറയിലും പുതുതലമുറയിലും വലിയ സ്വാധീനം ചെലുത്തിയിട്ടുണ്ട്. “മലയാളത്തിന്റെ വശ്യ വചസ്” എന്നാണ് സാഹിത്യകാരന് എം.ടി. വാസുദേവൻ നായർ സമദാനിയെ വിശേഷിപ്പിച്ചത്.
മലയാളം, ഇംഗ്ലീഷ്, അറബിക്, ഉറുദു, പേർഷ്യൻ, സംസ്കൃതം തുടങ്ങി നിരവധി ഭാഷകളിൽ പ്രാവീണ്യമുള്ള സമദാനി മുമ്പ് യു.എ.ഇയിലും അബുദാബിയിലും വിവിധ വേദികളിൽ പ്രഭാഷണം നടത്തിയിട്ടുണ്ട്. റമദാനിന്റെ ആദ്യ ദിനങ്ങളിൽ സംഘടിപ്പിക്കുന്ന പരിപാടിയെന്ന നിലയിലും ഈ പ്രഭാഷണത്തിന് പ്രത്യേക പ്രസക്തിയുണ്ട്.
സംഘാടനം: റിസോഴ്സ് ആന്റ് ഇന്റലക്ട് ലേണിംഗ് ഇനീഷ്യറ്റീവ് (RAIN).
സ്ത്രീകൾക്കായി പ്രത്യേക സൗകര്യം ഒരുക്കിയിട്ടുണ്ട്. അബൂബക്കർ സിദ്ദീഖ് മെട്രോ സ്റ്റേഷനിൽ നിന്ന് ബസ് സൗകര്യം ഉണ്ടായിരിക്കും.
സംഘാടക സമിതി ചെയർമാൻ സി.പി അബ്ദുസ്സമദ് (ബാബു എടക്കുളം), ജനറൽ കൺവീനർ അബ്ദുസലാം പരി തുടങ്ങിയവർ വാർത്താസമ്മേളനത്തിൽ ഒരുക്കങ്ങൾ പൂർത്തിയായതായി അറിയിച്ചു.
ബന്ധപ്പെടുക: 0555322566 | 0525462662 | 0508211847
