23 സർവകലാശാലകളും ഉന്നതവിദ്യാഭ്യാസ സ്ഥാപനങ്ങളും അണിനിരന്ന ആറുദിവസത്തെ കരിയർ മേളയിൽ വിദ്യാർഥികൾക്കായി പുതിയ അഭിരുചി നിർണയ സംവിധാനങ്ങളും ശിൽപശാലകളും ഒരുക്കി.
ഷാർജ, യു.എ.ഇ : ഉന്നതവിദ്യാഭ്യാസ തെരഞ്ഞെടുപ്പുകൾക്കും കരിയർ മാർഗനിർദേശങ്ങൾക്കുമായി ഷാർജ പബ്ലിക് ലൈബ്രറീസ് സംഘടിപ്പിച്ച എട്ടാമത് യൂണിവേഴ്സിറ്റി മേജേഴ്സ് എക്സിബിഷനിൽ 7,200 സന്ദർശകർ പങ്കെടുത്തു.
ഷാർജ ബുക്ക് അതോറിറ്റി ആസ്ഥാനത്ത് ആറുദിവസങ്ങളിലായി നടന്ന എക്സിബിഷനിൽ പ്രമുഖ സർവകലാശാലകളും അക്കാദമിക് സ്ഥാപനങ്ങളും ഉൾപ്പെടെ 23 കേന്ദ്രങ്ങൾ പങ്കെടുത്തു. “പാത്ത് ടു ദ ഫ്യൂച്ചർ: വെയർ ആംബിഷൻ മീറ്റ്സ് അച്ചീവ്മെന്റ്” എന്ന പ്രമേയത്തിലാണ് ഇത്തവണ മേള സംഘടിപ്പിച്ചത്. സ്കൂൾ വിദ്യാഭ്യാസം പൂർത്തിയാക്കിയവർക്കും അവരുടെ രക്ഷിതാക്കൾക്കും നേരിട്ടെത്തി വിവിധ കോഴ്സുകൾ, പ്രവേശന നിബന്ധനകൾ, സ്കോളർഷിപ്പ് അവസരങ്ങൾ എന്നിവയെക്കുറിച്ച് വ്യക്തത നേടാൻ മേള അവസരമൊരുക്കി.
2018-ൽ 683 പേരുമായി ആരംഭിച്ച പ്രദർശനത്തിൽ വർഷംതോറും വൻ വർധനവാണ് രേഖപ്പെടുത്തുന്നത്. 2023-ൽ 3,133 പേരും 2024-ൽ 4,530 പേരും എത്തിയ മേളയിൽ കഴിഞ്ഞ വർഷം (2025) 6,000 സന്ദർശകരായിരുന്നു പങ്കെടുത്തത്. ഇത്തവണ അത് 7,200 ആയി ഉയർന്നത് യു.എ.ഇയിലെ വിദ്യാർഥികൾക്കിടയിൽ കരിയർ ആസൂത്രണത്തിനുള്ള പ്രാധാന്യം വർധിച്ചുവരുന്നതിന്റെ തെളിവാണെന്ന് സംഘാടകർ വ്യക്തമാക്കി.
വിദ്യാർഥികൾ വെറും കണക്കുകൾക്കപ്പുറം കൃത്യമായ വിവരങ്ങളുടെയും അഭിരുചിയുടെയും അടിസ്ഥാനത്തിൽ ഉപരിപഠന വിഷയങ്ങൾ തെരഞ്ഞെടുക്കണമെന്ന് ഷാർജ പബ്ലിക് ലൈബ്രറീസ് ഡയറക്ടർ ഈമാൻ ബുശുലൈബി പറഞ്ഞു. മാറിക്കൊണ്ടിരിക്കുന്ന തൊഴിൽ വിപണിക്ക് അനുയോജ്യമായ അക്കാദമിക് കോഴ്സുകൾ കണ്ടെത്താൻ സർവകലാശാലാ പ്രതിനിധികളുമായി നേരിട്ടുള്ള സംവാദം വിദ്യാർഥികളെ സഹായിച്ചതായി അവർ ചൂണ്ടിക്കാട്ടി.
വിദ്യാർഥികളുടെ വ്യക്തിഗത അഭിരുചികൾ തിരിച്ചറിഞ്ഞ് അനുയോജ്യമായ പഠനശാഖകളും തൊഴിൽ മേഖലകളും നിർദേശിക്കുന്ന “മിഖ്യാസ്” (Miqyas) എന്ന ഇന്ററാക്ടീവ് ടൂൾ ഈ പതിപ്പിൽ അവതരിപ്പിച്ചു. അതോടൊപ്പം ‘ഫ്യൂച്ചർ ഡയലോഗ്സ്’, ‘പൾസ് ഓഫ് ദ മേജർ’ എന്നീ രണ്ട് പ്രത്യേക വിഭാഗങ്ങളിലായി 36 സെഷനുകളും പരിശീലന കളരികളും നടന്നു.
മേളയുടെ അവസാന ദിനത്തിൽ രാജ്യാന്തര സ്കൂളുകളിലെ വിദ്യാർഥികൾക്കായി ഇംഗ്ലീഷ് ഭാഷയിലാണ് സെഷനുകൾ ക്രമീകരിച്ചത്. അഡ്മിഷൻ ഇന്റർവ്യൂകൾ നേരിടാനുള്ള തയാറെടുപ്പുകൾ, സ്കോളർഷിപ്പ് ലഭിക്കാനുള്ള മാനദണ്ഡങ്ങൾ എന്നിവ ഇതിൽ വിശദീകരിച്ചു. അബ്ദുല്ല അൽ ഗുറൈർ ഫൗണ്ടേഷന്റെ നേതൃത്വത്തിൽ സ്കോളർഷിപ്പ് സാധ്യതകളെക്കുറിച്ചുള്ള പ്രത്യേക മാർഗനിർദേശ സെഷനും സംഘടിപ്പിച്ചു. ലൈബ്രറി അംഗത്വ ഫീസിൽ 50 ശതമാനം ഇളവും പരിപാടിയുടെ ഭാഗമായി പ്രഖ്യാപിച്ചിരുന്നു.
