അബൂദബി: സജീവമായ ജീവിതശൈലി പ്രോത്സാഹിപ്പിക്കുക, പോഷകാഹാരം മെച്ചപ്പെടുത്തുക, സമൂഹാരോഗ്യം ശക്തിപ്പെടുത്തുക തുടങ്ങിയ ലക്ഷ്യങ്ങളോടെ ‘ആരോഗ്യകരമായ ജീവിത നയം’ എന്ന പുതിയ സംരംഭം നടപ്പാക്കാൻ അബൂദബി സർക്കാർ ഒരുങ്ങുന്നു.
ശൈഖ് ഖാലിദ് ബിന് മുഹമ്മദ് ബിന് സായിദ് ആല് നഹ്യാന് അംഗീകാരം നൽകിയ പദ്ധതിക്ക് അബൂദബി എക്സിക്യൂട്ടീവ് കൗണ്സില് പിന്തുണ പ്രഖ്യാപിച്ചു. സാംക്രമികേതര രോഗങ്ങളെ ചെറുക്കുന്നതിനുള്ള മുൻകരുതൽ നടപടികൾ പ്രോത്സാഹിപ്പിക്കുകയും ആരോഗ്യകരമായ തിരഞ്ഞെടുപ്പുകൾ എല്ലാവർക്കും ലളിതമാക്കുകയും ചെയ്യുന്നതാണ് പദ്ധതിയുടെ പ്രധാന ലക്ഷ്യം.
സർക്കാരും സ്വകാര്യ മേഖലാ പങ്കാളികളും ചേർന്ന് 25 പദ്ധതികളെ ഏകോപിപ്പിക്കുന്നതാണ് ‘Healthy Living Strategy’. ശാരീരിക പ്രവർത്തനങ്ങൾ വർധിപ്പിക്കൽ, മെച്ചപ്പെട്ട പോഷകാഹാരം, സുസ്ഥിരമായ പെരുമാറ്റ മാറ്റങ്ങൾ എന്നിവയ്ക്ക് പ്രാധാന്യം നൽകും.
അമിതവണ്ണം, പ്രമേഹം, ഹൃദ്രോഗം, അർബുദം തുടങ്ങിയ പകർച്ചവ്യാധിയല്ലാത്ത രോഗങ്ങൾ നിയന്ത്രിക്കാൻ പ്രത്യേക പ്രവർത്തനങ്ങളും പദ്ധതിയിൽ ഉൾപ്പെടുത്തിയിട്ടുണ്ട്. വ്യക്തികളെ ആരോഗ്യപൂർണമായ ജീവിതത്തിലേക്ക് പ്രാപ്തരാക്കുകയാണ് സംരംഭത്തിന്റെ ദീർഘകാല ദർശനം.
ആദ്യഘട്ടത്തിൽ വ്യായാമം വർധിപ്പിക്കുന്നതിലും പോഷകാഹാര ബോധവൽക്കരണത്തിലുമാണ് ശ്രദ്ധ കേന്ദ്രീകരിക്കുന്നത്. ഉറക്കം, മാനസിക ക്ഷേമം തുടങ്ങിയ വിഷയങ്ങളും ഈ വർഷം തന്നെ പദ്ധതിയുടെ ഭാഗമാക്കുമെന്ന് മന്സൂര് ഇബ്രാഹിം അല് മന്സൂരി അറിയിച്ചു.
അബൂദബി, അൽ ഐൻ, അൽ ദഫ്റ എന്നിവിടങ്ങളിൽ കഴിഞ്ഞ ഒക്ടോബർ മുതൽ വ്യായാമപരിപാടികൾ ആരംഭിച്ചിട്ടുണ്ട്. 7,700-ലേറെ പേർ ഇതിനകം പങ്കെടുത്തു. ആറ് ജില്ലകളിലായി സംഘടിപ്പിച്ച ‘Dgaayig Fitness Festival’ൽ 1,400-ലേറെ പേർ പങ്കാളികളായി. ഈ വർഷം രണ്ട് മാസം കൂടി ഫെസ്റ്റിവലുകൾ നടത്താനാണ് പദ്ധതി.
സമഗ്രമായ ആരോഗ്യപരിപാലനത്തിലൂടെ ജീവിതനിലവാരം ഉയർത്തുക എന്നതാണ് അബൂദബി സർക്കാരിന്റെ പുതിയ ആരോഗ്യനയത്തിന്റെ ദർശനം.
English Summary:
Abu Dhabi has approved a new “Healthy Living Strategy” aimed at promoting active lifestyles, better nutrition, and overall community well-being. The initiative integrates 25 programs in collaboration with government and private sectors to prevent non-communicable diseases such as obesity, diabetes, heart disease, and cancer. The first phase focuses on increasing physical activity and improving dietary awareness across the emirate.
