ദുബായ് : ദുബായ് ഗവൺമെന്റിന്റെ സേവന നയങ്ങൾ നടപ്പാക്കുന്നതിൽ മികച്ച പ്രകടനം കാഴ്ചവച്ചതിന് ദുബായ് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ്‌ (ജി ഡി ആർ എഫ് എ) ഹംദാൻ ബിൻ മുഹമ്മദ് സ്മാർട്ട് ഗവൺമെന്റ് ഫ്ലാഗ് കരസ്ഥമാക്കി . 360 സർവീസസ് പോളിസി മികച്ച രീതിയിൽ നടപ്പാക്കിയതിനാണ് അംഗീകാരം. ദുബൈ കിരീടാവകാശിയും യു എ ഇ ഉപപ്രധാനമന്ത്രിയും പ്രതിരോധ മന്ത്രിയും എക്‌സിക്യൂട്ടീവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാശിദ് അൽ മക്തൂമിൽ നിന്ന് ജി ഡി ആർ എഫ് എ ദുബായ് മേധാവി ലഫ്: ജനറൽ മുഹമ്മദ് അഹ്‌മദ്‌ അൽ മർറി ഫ്ലാഗ് സ്വീകരിച്ചു.ദുബായ് ഗവൺമെൻ്റ് നടപ്പാക്കിവരുന്ന ഒരു പ്രധാന നയമാണ് 360 സേവന നയം. എല്ലാ സർക്കാർ സേവനങ്ങളും പൂർണ്ണമായും സംയോജിപ്പിക്കുകയും ഉപഭോക്താക്കൾക്ക് എളുപ്പത്തിൽ ലഭ്യമാക്കുകയും ചെയ്യുക എന്നതാണ് ഈ നയത്തിൻ്റെ ലക്ഷ്യം. ഇതിലൂടെ സേവനങ്ങൾ കൂടുതൽ കാര്യക്ഷമവും തടസ്സമില്ലാത്തതുമാകുന്നു. ഉപഭോക്താക്കൾക്ക് നേരിട്ടുള്ള സന്ദർശനം ഒഴിവാക്കി ഡിജിറ്റൽ പ്ലാറ്റ്ഫോമുകൾ വഴി സേവനങ്ങൾ ലഭ്യമാക്കുന്നതിനും ഈ നയം ഊന്നൽ നൽകുന്നു.സമഗ്രവും ഉപഭോക്തൃ കേന്ദ്രീകൃതവുമായ സേവനങ്ങൾ ഏറ്റവും ഉയർന്ന കാര്യക്ഷമതയിലും നൂതനത്വത്തിലും എത്തിക്കാനുള്ള പ്രതിബദ്ധതയുടെ അംഗീകാരമാണ് ഈ ബഹുമതി. വിവേകമതികളായ നേതൃത്വത്തിന്റെ തുടർച്ചയായ പിന്തുണയുടെ പ്രതിഫലനമാണ് ഈ നേട്ടം. ഈ പുരസ്കാരം ദുബായുടെ ഭരണപരമായ കാര്യക്ഷമതക്കും നൂതന സേവന സമീപനത്തിനും അംഗീകാരമായി വിലയിരുത്തപ്പെടുന്നു.360 സർവീസസ് പോളിസി നടപ്പാക്കിയ അംഗീകാരത്തിനായി തെരഞ്ഞെടുത്തതിന് ലഫ്: ജനറൽ മുഹമ്മദ് അഹ്‌മദ്‌ അൽ മർറി ഭരണനേതൃത്വത്തോട് നന്ദി അറിയിച്ചു.
