ദുബൈ: യു.എ.ഇയിലെ വിമാന സർവിസുകൾ പതിയെ സാധാരണ നിലയിലേക്ക് മടങ്ങുന്നു. മാർച്ച് 7 മുതൽ 83 ലക്ഷ്യസ്ഥാനങ്ങളിലേക്ക് പ്രതിദിനം 106 വിമാന സർവിസുകൾ നടത്തുമെന്ന് Emirates പ്രഖ്യാപിച്ചു.
എമിറേറ്റ്സിന്റെ മൊത്തം റൂട്ടുകളുടെ ഏകദേശം 60 ശതമാനം സർവിസുകളാണ് ഇപ്പോൾ പുനരാരംഭിക്കുന്നത്. യു.എ.ഇയുടെ വ്യോമപാതകൾ ഭാഗികമായി തുറന്നതിന് ശേഷം അടിയന്തര സർവിസുകൾ മാത്രമായിരുന്നു കമ്പനി നടത്തിവന്നത്. മേഖലയിൽ സംഘർഷം കുറയുന്ന സാഹചര്യത്തിലാണ് കൂടുതൽ സർവിസുകൾ പ്രഖ്യാപിച്ചത്. വരും ദിവസങ്ങളിൽ 100 ശതമാനം സർവിസുകളും പുനരാരംഭിക്കാനാകുമെന്നാണ് അധികൃതർ പ്രതീക്ഷിക്കുന്നത്.
അതേസമയം, ഷാർജ ആസ്ഥാനമായുള്ള Air Arabia യു.എ.ഇയിൽ നിന്നുമുള്ളതും തിരിച്ചുമുള്ളതുമായ പരിമിത സർവിസുകൾ തുടരുമെന്ന് അറിയിച്ചു. മുൻപ് യാത്ര റദ്ദാക്കിയ യാത്രക്കാർക്ക് ടിക്കറ്റിൽ മാറ്റം വരുത്തുകയോ റീഫണ്ട് ഉപയോഗിക്കുകയോ ചെയ്തിട്ടില്ലെങ്കിൽ വീണ്ടും ബുക്കിംഗ് നടത്താമെന്നും കമ്പനി അറിയിച്ചു.
ടിക്കറ്റുകൾ എയർ അറേബ്യയുടെ വെബ്‌സൈറ്റ്, മൊബൈൽ ആപ്പ്, അംഗീകൃത ട്രാവൽ ഏജൻസികൾ എന്നിവ വഴി ലഭ്യമാണ്. സർവിസ് റദ്ദാക്കിയ യാത്രക്കാർക്ക് ബദൽ ഓപ്ഷനുകളുമായി ബന്ധപ്പെട്ട വിവരങ്ങൾ ഇ-മെയിൽ അല്ലെങ്കിൽ എസ്‌എം‌എസ് വഴി നേരിട്ട് ലഭിക്കും.
ഇതിനിടെ കൂടുതൽ വിമാന കമ്പനികൾ സർവിസുകൾ പുനരാരംഭിച്ചതോടെ Dubai Airport വീണ്ടും തിരക്കിലേക്ക് മടങ്ങിയിട്ടുണ്ട്. കഴിഞ്ഞ 84 മണിക്കൂറിനിടെ ദുബൈയും ആൽ മക്തൂം അന്താരാഷ്ട്ര വിമാനത്താവളവും ചേർന്ന് 1,140 വിമാന സർവിസുകൾ നടത്തിയതായി അധികൃതർ അറിയിച്ചു.
മാർച്ച് 2 മുതൽ 5 വരെ ഈ വിമാനത്താവളങ്ങളിൽ നിന്ന് 500ലധികം വിമാനങ്ങൾ പുറപ്പെടുകയും 80ലധികം രാജ്യങ്ങളിൽ നിന്നുള്ള 1.5 ലക്ഷം യാത്രക്കാർക്ക് ടിക്കറ്റുകൾ ലഭിക്കുകയും ചെയ്തു. വരും ദിവസങ്ങളിൽ വിമാന സർവിസുകളുടെ എണ്ണം കൂടുതൽ വർധിപ്പിക്കുമെന്നും അധികൃതർ അറിയിച്ചു.
യാത്രക്കാർ ബുക്കിംഗ് സ്ഥിരീകരിക്കാതെ വിമാനത്താവളങ്ങളിലേക്ക് യാത്ര ചെയ്യരുതെന്നും, പുതിയ വിവരങ്ങൾക്കായി ബന്ധപ്പെട്ട എയർലൈൻ കമ്പനികളുമായി ബന്ധപ്പെടണമെന്നും അധികൃതർ അഭ്യർഥിച്ചു.
English Summary : Flight operations in the UAE are gradually returning to normal, with Emirates Airline announcing 106 daily flights to 83 destinations starting March 7. This represents about 60% of the airline’s total routes being restored. Meanwhile, Air Arabia will continue limited services. Increased airline activity has also brought Dubai International Airport back to busy operations, with over 1,140 flights handled in the past 84 hours.
