ദുബൈ: സാമ്പത്തിക രംഗത്തിന് കൂടുതൽ കരുത്തേകാനും ബിസിനസുകൾക്ക് ആശ്വാസം നൽകാനും ദുബൈ സർക്കാർ 100 കോടി ദിർഹത്തിന്റെ പ്രത്യേക പ്രോത്സാഹന പദ്ധതി പ്രഖ്യാപിച്ചു. ദുബൈ കിരീടാവകാശിയും ഉപപ്രധാനമന്ത്രിയും പ്രതിരോധമന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാശിദ് ആൽ മക്തൂമാണ് പദ്ധതിക്ക് അംഗീകാരം നൽകിയത്.
ദുബൈ എക്സിക്യൂട്ടീവ് കൗൺസിൽ യോഗത്തിലാണ് ഈ നിർണായക തീരുമാനം എടുത്തത്. ഏപ്രിൽ 1 മുതൽ പ്രാബല്യത്തിൽ വരുന്ന പദ്ധതി 3 മുതൽ 6 മാസം വരെ നടപ്പിലാക്കാനാണ് ലക്ഷ്യമിടുന്നത്.
ഈ പദ്ധതിയുടെ ഭാഗമായി ബിസിനസുകൾക്കും വ്യക്തികൾക്കും നേരിടുന്ന സാമ്പത്തിക സമ്മർദം കുറയ്ക്കാൻ വിവിധ സർക്കാർ ഫീസുകൾ താൽക്കാലികമായി നീട്ടിവെക്കാൻ തീരുമാനിച്ചു. ഇതോടെ ചെറുകിട, ഇടത്തരം സംരംഭങ്ങൾക്കും വലിയ ആശ്വാസമാകും.
അതേസമയം, ഹോട്ടൽ മേഖലയ്ക്ക് 100 ശതമാനം സെയിൽസ് ഫീസ് താൽക്കാലികമായി ഒഴിവാക്കുകയും ടൂറിസം മേഖലയിലെ ‘ടൂറിസം ദിർഹം’ ഫീസ് അടയ്ക്കുന്നതിനും ഇളവ് നൽകുകയും ചെയ്യും. ഇതോടെ വിനോദസഞ്ചാര മേഖലയിലും ഉണർവ് പ്രതീക്ഷിക്കുന്നു.
കൂടാതെ, കസ്റ്റംസ് ക്ലിയറൻസിനുള്ള ഗ്രേസ് പീരിയഡ് 30 ദിവസത്തിൽ നിന്ന് 90 ദിവസമായി ഉയർത്തിയിട്ടുണ്ട്. ആവശ്യമെങ്കിൽ ഇത് കൂടുതൽ നീട്ടാനും സാധ്യതയുണ്ടെന്ന് അധികൃതർ വ്യക്തമാക്കി.
ഇതിനൊപ്പം, റെസിഡൻസി പെർമിറ്റ് നൽകുന്നതിനും പുതുക്കുന്നതിനും നടപടികൾ ലളിതമാക്കുന്നതും പദ്ധതിയിൽ ഉൾപ്പെടുത്തിയിട്ടുണ്ട്. ഇത് പ്രവാസികൾക്കും കമ്പനികൾക്കും കാര്യങ്ങൾ എളുപ്പമാക്കും.
സാമ്പത്തിക വളർച്ചയുടെ കാര്യത്തിലും ദുബൈ മുന്നേറുകയാണ്. കഴിഞ്ഞ വർഷം നാലാം പാദത്തിൽ 6.4 ശതമാനം വളർച്ചയാണ് രേഖപ്പെടുത്തിയത്. 2025ഓടെ ജിഡിപി 5.4 ശതമാനം ഉയർന്ന് 937 ബില്യൺ ദിർഹമായി.
അതേസമയം, സാമ്പത്തിക കണക്കുകൾ കൂടുതൽ കൃത്യമായി വിലയിരുത്താൻ ജിഡിപി കണക്കാക്കുന്ന രീതിയും പുതുക്കാൻ തീരുമാനിച്ചിട്ടുണ്ട്. കൂടാതെ, ദുബൈ കസ്റ്റംസ് മേൽനോട്ടത്തിലുള്ള ‘വെർച്വൽ വെയർഹൗസ്’ പദ്ധതിയിലൂടെ ഉയർന്ന മൂല്യമുള്ള സാധനങ്ങളുടെ താൽക്കാലിക ഇറക്കുമതി എളുപ്പമാക്കും. ആർട്ട് വർക്ക് ഉൾപ്പെടെയുള്ള വസ്തുക്കൾക്ക് കസ്റ്റംസ് തീരുവയിൽ ഇളവും അനുവദിക്കും.
സാമൂഹിക മേഖലകളിലും ശ്രദ്ധ കേന്ദ്രീകരിച്ചാണ് പുതിയ നീക്കങ്ങൾ. ഇമാറാത്തി കുടുംബങ്ങളുടെ ജീവിതനിലവാരം ഉയർത്താനും തൊഴിൽ അവസരങ്ങൾ വർധിപ്പിക്കാനും വീട്ടിൽ നിന്നുള്ള സംരംഭങ്ങൾ പ്രോത്സാഹിപ്പിക്കാനുമുള്ള ‘ദുബൈ എംപവർമെന്റ് സ്ട്രാറ്റജി’ക്കും അംഗീകാരം നൽകി.
ഇതോടൊപ്പം, തൊഴിലാളികളുടെ താമസ സൗകര്യങ്ങൾ മെച്ചപ്പെടുത്തുന്നതിനുള്ള ഹെൽത്ത് ആൻഡ് സേഫ്റ്റി പദ്ധതിയും പ്രഖ്യാപിച്ചു. 2033ഓടെ എല്ലാ തൊഴിലാളികൾക്കും മികച്ച താമസ സൗകര്യങ്ങളും സുരക്ഷാ മാനദണ്ഡങ്ങളും ഉറപ്പാക്കുകയാണ് ലക്ഷ്യം.
ഈ എല്ലാ നടപടികളും വ്യക്തികൾക്കും കുടുംബങ്ങൾക്കും ബിസിനസുകൾക്കും നേരിട്ട് സഹായകരമാകുമെന്ന് ശൈഖ് ഹംദാൻ വ്യക്തമാക്കി. ദുബൈയുടെ സാമ്പത്തിക സ്ഥിരതയും ആഗോള മത്സരക്ഷമതയും കൂടുതൽ ശക്തിപ്പെടുത്തുന്നതിനുള്ള നീക്കമാണിതെന്നും അദ്ദേഹം കൂട്ടിച്ചേർത്തു.
