ദുബായ്, ജൂലൈ 8, 2026:ലണ്ടനിൽ നടന്ന പ്രശസ്തമായ അന്താരാഷ്ട്ര ഗ്രീൻവിച്ച് ഒളിമ്പ്യാഡിൽ (International Greenwich Olympiad) സ്വർണ്ണ മെഡൽ നേടിയ ദുബായ് സ്കൂൾസ് – അൽ ഖവാനീജിലെ നാല് എമിറാത്തി വിദ്യാർത്ഥികളെ ദുബായ് കിരീടാവകാശിയും, ഉപപ്രധാനമന്ത്രിയും, പ്രതിരോധ മന്ത്രിയും, ദുബായ് എക്സിക്യൂട്ടീവ് കൗൺസിൽ ചെയർമാനുമായ എച്ച്.എച്ച്. ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അഭിനന്ദിച്ചു.
2026 ജൂൺ 14 മുതൽ 20 വരെ നടന്ന ഈ ആഗോള മത്സരത്തിൽ എൺപതിലധികം രാജ്യങ്ങളിൽ നിന്നുള്ള പ്രതിഭാശാലികളായ വിദ്യാർത്ഥികളാണ് പങ്കെടുത്തത്.
യുവപ്രതിഭകളിൽ നിക്ഷേപം നടത്തുന്നത് രാജ്യത്തിന്റെ തന്ത്രപരമായ മുൻഗണനയാണെന്ന് ഷെയ്ഖ് ഹംദാൻ വ്യക്തമാക്കി. “സർഗ്ഗാത്മകമായ ചിന്തകളാണ് നമ്മുടെ ഏറ്റവും വലിയ ദേശീയ സമ്പത്ത്. അറിവിനെ നൂതനമായ പരിഹാരങ്ങളാക്കി മാറ്റുന്നതിലൂടെ, അവർ പുതിയ അവസരങ്ങൾ സൃഷ്ടിക്കുകയും സുസ്ഥിരമായ പുരോഗതിക്ക് വഴിയൊരുക്കുകയും ചെയ്യുന്നു,” അദ്ദേഹം പറഞ്ഞു.
അലി അൽ ജർവാൻ, ഖലീഫ അൽ മർസൂഖി, ഒമർ അൽ ബലൂഷി, സയീദ് അബു അൽ ഷവാരെബ് എന്നിവരടങ്ങുന്ന വിജയികളായ സംഘം തങ്ങൾ വികസിപ്പിച്ച “സ്മാർട്ട് ഇറിഗേഷൻ ട്രെയിൻ” (Smart Irrigation Train) എന്ന പ്രോജക്റ്റിനെക്കുറിച്ച് കിരീടാവകാശിയോട് വിശദീകരിച്ചു. വിദൂര കാർഷിക മേഖലകളിൽ ജലവിഭവ മാനേജ്‌മെന്റ് മെച്ചപ്പെടുത്തുന്നതിനായി ഇന്റർനെറ്റ് ഓഫ് തിങ്സ് (IoT), സൗരോർജ്ജം, സ്മാർട്ട് അഗ്രികൾച്ചർ സാങ്കേതികവിദ്യകൾ എന്നിവ സമന്വയിപ്പിച്ചാണ് ഈ പ്രോജക്റ്റ് തയ്യാറാക്കിയിരിക്കുന്നത്.
ദുബായിക്കും യുഎഇക്കും അഭിമാനം കൈവരുത്തിയ വിദ്യാർത്ഥികളെ പ്രശംസിച്ച ഷെയ്ഖ് ഹംദാൻ, തുടർന്നും ശാസ്ത്രീയ ഗവേഷണങ്ങളുമായി മുന്നോട്ട് പോകാനും മറ്റ് യുവാക്കൾക്ക് മാതൃകയാകാനും അവരെ പ്രോത്സാഹിപ്പിച്ചു.
യുണൈറ്റഡ് നേഷൻസിന്റെ സുസ്ഥിര വികസന ലക്ഷ്യങ്ങൾ 2030 (UN Sustainable Development Goals 2030) മുന്നിൽക്കണ്ട് സയൻസ്, ടെക്നോളജി, എൻജിനീയറിങ്, മാത്സ് (STEM), കല, മീഡിയ എന്നിവയിൽ വിദ്യാർത്ഥികളുടെ നൂതനമായ ആശയങ്ങൾ അവതരിപ്പിക്കുന്ന പ്രമുഖ ആഗോള മത്സരമാണ് അന്താരാഷ്ട്ര ഗ്രീൻവിച്ച് ഒളിമ്പ്യാഡ്.
