ദുബായ് — ജൂലൈ 8, 2026: ഉമ്മു സുഖീം, ജുമൈറ, കൂടാതെ പരിസര പ്രദേശങ്ങളിലെയും താമസക്കാരെ പങ്കെടുപ്പിച്ചു കൊണ്ട് ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) കസ്റ്റമേഴ്സ് കൗൺസിൽ യോഗം സംഘടിപ്പിച്ചു. ആർ.ടി.എയിലെ പ്രമുഖ സി.ഇ.ഒമാരും ഡയറക്ടർമാരും പങ്കെടുത്ത യോഗത്തിൽ, യാത്രാ-റോഡ് സൗകര്യങ്ങൾ കൂടുതൽ മെച്ചപ്പെടുത്തുന്നതിനായി പൊതുജനങ്ങളുടെ അഭിപ്രായങ്ങളും നിർദ്ദേശങ്ങളും നേരിട്ട് സ്വീകരിച്ചു.
നിലവിലുള്ളതും വരാനിരിക്കുന്നതുമായ വികസന പദ്ധതികളിൽ ജന പങ്കാളിത്തം ഉറപ്പാക്കുക എന്ന ആർ.ടി.എയുടെ സുതാര്യമായ നയത്തിന്റെ ഭാഗമായാണ് ഈ കൗൺസിൽ സംഘടിപ്പിച്ചത്. പ്രധാന റോഡുകളുടെ നവീകരണം, ആഭ്യന്തര റോഡുകളുടെ വികസനം, തെരുവ് വിളക്കുകൾ സ്ഥാപിക്കൽ, കാൽനടയാത്രക്കാർക്കും സൈക്ലിംഗിനുമുള്ള ട്രാക്കുകൾ വ്യാപിപ്പിക്കൽ എന്നിവ യോഗത്തിൽ ചർച്ചയായി.
ജുമൈറ, അൽ വാസൽ, ഉമ്മു സുഖീം, അൽ സഫ എന്നീ തെരുവുകളുടെ നവീകരണവും, ഷെയ്ഖ് സായിദ് റോഡ്, ഹെസ്സ സ്ട്രീറ്റ് എന്നിവടങ്ങളിൽ നടക്കുന്ന വികസന പ്രവർത്തനങ്ങളും യോഗത്തിൽ വിശദീകരിച്ചു. ഈ പദ്ധതികൾ ഗതാഗതക്കുരുക്ക് കുറയ്ക്കാനും പൊതുഗതാഗത സംവിധാനങ്ങളുമായി റസിഡൻഷ്യൽ ഏരിയകളെ ബന്ധിപ്പിക്കാനും സഹായിക്കും.
ദുബായ് 2040 അർബൻ മാസ്റ്റർ പ്ലാനിന്റെ ഭാഗമായ ദുബായ് മെട്രോ ബ്ലൂ ലൈൻ പദ്ധതിയെക്കുറിച്ചും നിലവിലെ ബസ് ശൃംഖലകൾ വഴി ഉമ്മു സുഖീം, അൽ സഫ, ജുമൈറ നിവാസികളെ എങ്ങനെ മെട്രോ സ്റ്റേഷനുകളുമായി ബന്ധിപ്പിക്കുന്നു എന്നതിനെക്കുറിച്ചും അധികൃതർ വിശദീകരിച്ചു. ഗതാഗതം നിയന്ത്രിക്കേണ്ടതിന്റെ ആവശ്യകതയെക്കുറിച്ചും പുതിയ യാത്രാ സൗകര്യങ്ങളെക്കുറിച്ചും താമസക്കാർ തങ്ങളുടെ നിർദ്ദേശങ്ങൾ കൗൺസിലിൽ പങ്കുവെച്ചു. ആർ.ടി.എയുടെ ഈ സുതാര്യമായ ഇടപെടലിനെ ജനങ്ങൾ അഭിനന്ദിച്ചു.
