ദുബായ്:ദുബായിൽ സ്വന്തമായി വസ്തുവകകൾ ഉള്ളവർക്കും, നിക്ഷേപകർക്കും സന്തോഷവാർത്ത. ദുബായിലെ റിയൽ എസ്റ്റേറ്റ് വിസയുമായി ബന്ധപ്പെട്ട നടപടിക്രമങ്ങൾ കൂടുതൽ എളുപ്പമാക്കുന്നതിനായി ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സും (GDRFA), ദുബായ് ലാൻഡ് ഡിപ്പാർട്ട്‌മെന്റും (DLD) തമ്മിൽ നിർണായകമായ ധാരണാപത്രത്തിൽ ഒപ്പുവെച്ചു.സർക്കാർ സേവനങ്ങൾ കൂടുതൽ കാര്യക്ഷമമാക്കുക, നിക്ഷേപകർക്ക് കൂടുതൽ ആത്മവിശ്വാസം നൽകുക എന്നിവ ലക്ഷ്യമിട്ടാണ് ഇരു വകുപ്പുകളും കൈകോർക്കുന്നത്.
മാറ്റം വരുന്ന മൂന്ന് പ്രധാന സേവനങ്ങൾ
പുതിയ കരാർ പ്രകാരം, ദുബായ് ലാൻഡ് ഡിപ്പാർട്ട്‌മെന്റ് നൽകിയിരുന്ന സുപ്രധാനമായ മൂന്ന് റിയൽ എസ്റ്റേറ്റ് റെസിഡൻസി സേവനങ്ങൾ ഇനിമുതൽ നേരിട്ട് ജിഡിആർഎഫ്എയുടെ സിസ്റ്റത്തിലേക്ക് മാറ്റും.ഗോൾഡൻ റെസിഡൻസി (Golden Residency),റിട്ടയർമെന്റ് റെസിഡൻസി (Retiree Residency),പ്രോപ്പർട്ടി റെസിഡൻസി (Property Residency) എന്നീ സേവനങ്ങളാണ് ഇത്തരത്തിൽ മാറ്റുക.
ഈ നിയമം പ്രാബല്യമാകുന്നതോടെ, പഴയതുപോലെ ഇനി വ്യത്യസ്ത ഓഫീസുകളോ പ്ലാറ്റ്‌ഫോമുകളോ കയറിയിറങ്ങേണ്ടതില്ല. ഈ സേവനങ്ങൾ എല്ലാം ഇനിമുതൽ ഒരൊറ്റ വഴിയുലുടെ ഉപഭോക്താക്കൾക്ക് ലഭ്യമാകും. വകുപ്പുകൾ തമ്മിലുള്ള ഡാറ്റാ കൈമാറ്റം എളുപ്പമാകുന്നതോടെ വിസ നടപടിക്രമങ്ങൾ കൂടുതൽ വേഗത്തിലാകുകയും സുതാര്യമാകുകയും ചെയ്യുമെന്ന് അധികൃതർ അറിയിച്ചു.
ജിഡിആർഎഫ്എ ദുബായ് മേധാവി ജനറൽ ലഫ്റ്റനന്റ് ജനറൽ മുഹമ്മദ് അഹ്‌മദ്‌ അൽ മർറിയും ദുബായ് ലാൻഡ് ഡിപ്പാർട്ട്‌മെന്റ് ഡയറക്ടർ ജനറൽ ഒമർ ഹമദ് ബു ഷെഹാബുമാണ് ഇത് സംബന്ധിച്ചുള്ള സുപ്രധാന കരാറിൽ ഒപ്പുവെച്ചത്.ഉപഭോക്താക്കൾക്ക് ഏറ്റവും മികച്ച സേവനം നൽകാനും അവരുടെ ജീവിതനിലവാരം ഉയർത്താനുമുള്ള ദുബായിയുടെ പ്രതിബദ്ധതയാണ് ഈ നീക്കത്തിലൂടെ വ്യക്തമാകുന്നതെന്ന് ലഫ്റ്റനന്റ് ജനറൽ അൽ മർറി പറഞ്ഞു. ഡിജിറ്റൽവൽക്കരണം, സേവനങ്ങൾ ഓട്ടോമാറ്റിക് ആക്കുന്ന പ്രക്രിയ, റിയൽ എസ്റ്റേറ്റ് ടോക്കണൈസേഷൻ എന്നിവയിലെ ലാൻഡ് ഡിപ്പാർട്ട്‌മെന്റിന്റെ 2026-ലെ തന്ത്രപരമായ മുന്നേറ്റങ്ങളെ അദ്ദേഹം പ്രശംസിക്കുകയും ചെയ്തു.
സർക്കാർ വകുപ്പുകൾ തമ്മിലുള്ള ഏകോപനത്തിന്റെ മികച്ച ഉദാഹരണമാണിതെന്നും, റിയൽ എസ്റ്റേറ്റ് മേഖലയിലെ ഉപഭോക്താക്കൾക്ക് ഇത് വലിയ ആശ്വാസമാകുമെന്ന് ദുബായ് ലാൻഡ് ഡിപ്പാർട്ട്‌മെന്റ് ഡയറക്ടർ ജനറൽ ഒമർ ഹമദ് ബു ഷെഹാബ് വ്യക്തമാക്കി.
ദുബായിൽ കൂടുതൽ നിക്ഷേപങ്ങൾ ആകർഷിക്കാനും ബിസിനസ്സ് അന്തരീക്ഷം കൂടുതൽ മെച്ചപ്പെടുത്താനും ഈ കൂട്ടായ്മ സഹായിക്കും. ദുബായുടെ സാമ്പത്തിക രംഗം ഇരട്ടിയാക്കാൻ ലക്ഷ്യമിട്ടുള്ള ‘ദുബായ് ഇക്കണോമിക് അജണ്ട D33’-യുടെ ഭാഗമായാണ് പുതിയ പരിഷ്കാരങ്ങൾ. ഏത് സാഹചര്യത്തിലും ജോലി ചെയ്യാനും താമസിക്കാനും ലോകത്തിലെ തന്നെ ഏറ്റവും മികച്ച നഗരമായി ദുബായിയെ നിലനിർത്തുക എന്നതാണ് ഈ പുതിയ മാറ്റങ്ങളിലൂടെ ഗവൺമെന്റ് ലക്ഷ്യമിടുന്നത്.
