ദുബായ്: ആധുനിക ഗതാഗത സംവിധാനങ്ങളുടെ കാര്യക്ഷമമായ ഏകോപനത്തിലൂടെ ലോകത്തെ ഏറ്റവും മികച്ച നഗരങ്ങളിലൊന്നായി മാറാനുള്ള ദുബായിയുടെ യാത്രയ്ക്ക് അക്കങ്ങളിലൂടെ അടിവരയിടുകയാണ് ആർടിഎയുടെ പുതിയ റിപ്പോർട്ട്. നഗരത്തിലെ ജനജീവിതത്തിന്റെ വേഗം വർധിപ്പിച്ചുകൊണ്ട് പ്രതിദിനം ശരാശരി 22 ലക്ഷം പേരാണ് ഇപ്പോൾ ഈ സേവനങ്ങളെ ആശ്രയിക്കുന്നത്. ദുബായ് മെട്രോ, ട്രാം, പൊതു ബസുകൾ, ജലഗതാഗത മാർഗങ്ങൾ, ഷെയർഡ് മൊബിലിറ്റി, ടാക്സികൾ എന്നിവയെല്ലാം ഉൾപ്പെടുന്ന വിപുലമായ ശൃംഖലയുടെ കരുത്തിലാണ് ഈ നേട്ടം സ്വന്തമാക്കിയത്. മൊത്തം യാത്രക്കാരിൽ 37 ശതമാനവും മെട്രോയെ തങ്ങളുടെ പ്രധാന യാത്രാമാർഗമായി തിരഞ്ഞെടുത്തു എന്നത് ശ്രദ്ധേയമാണ്.
ദുബായ് മെട്രോ തന്നെയാണ് നഗരത്തിന്റെ യാത്രാശൃംഖലയിൽ നട്ടെല്ലായി നിലകൊള്ളുന്നത്. റെഡ്, ഗ്രീൻ ലൈനുകളിലായി 29.47 കോടി ആളുകൾ കഴിഞ്ഞ വർഷം മെട്രോയിൽ യാത്ര ചെയ്തു. ഇതിൽ ബുർജുമാൻ, അൽ റിഗ്ഗ എന്നീ സ്റ്റേഷനുകളിലാണ് ഏറ്റവും കൂടുതൽ യാത്രക്കാർ എത്തിയത്. ടാക്സികളിൽ 20.9 കോടി പേരും ബസുകളിൽ 19.72 കോടി പേരും യാത്ര ചെയ്തു. ഷെയർഡ് മൊബിലിറ്റി സേവനങ്ങളിൽ 30 ശതമാനത്തിന്റെ വൻ വർധനവുണ്ടായപ്പോൾ 7.29 കോടി പേർ ഈ സംവിധാനം ഉപയോഗപ്പെടുത്തി. ഒക്ടോബർ മാസത്തിലാണ് ഏറ്റവും കൂടുതൽ യാത്രക്കാർ ഗതാഗത സംവിധാനങ്ങൾ ഉപയോഗിച്ചത്; ഏകദേശം 7.28 കോടി പേർ.
പൊതുഗതാഗത സംവിധാനം ദുബായിലെ ജനങ്ങളുടെ ആദ്യ ചോയിസ് ആയി മാറ്റുകയാണ് തങ്ങളുടെ ലക്ഷ്യമെന്ന് ആർടിഎ ഡയറക്ടർ ജനറലും ബോർഡ് ഓഫ് എക്സിക്യൂട്ടീവ് ഡയറക്ടർ ചെയർമാനുമായ മത്താർ അൽ തായർ പറഞ്ഞു. ഇൻഫ്രാസ്ട്രക്ചർ വികസനത്തിലും സ്മാർട്ട് സാങ്കേതികവിദ്യകളിലും നടത്തിയ ദീർഘകാല നിക്ഷേപത്തിന്റെ ഫലമാണിതെന്ന് അദ്ദേഹം കൂട്ടിച്ചേർത്തു. വരും വർഷങ്ങളിൽ ബസുകൾക്കും ടാക്സികൾക്കുമായി 13 കിലോമീറ്റർ നീളത്തിൽ ആറ് പുതിയ പ്രത്യേക ലെയ്നുകൾ കൂടി നിർമ്മിക്കുമെന്ന് അദ്ദേഹം പ്രഖ്യാപിച്ചു. ഇത് യാത്രാസമയം 41 ശതമാനം വരെ കുറയ്ക്കാനും ബസുകളുടെ കൃത്യനിഷ്ഠ 42 ശതമാനം വരെ മെച്ചപ്പെടുത്താനും സഹായിക്കും.
കൂടാതെ, ദുബായിലെ എട്ട് പ്രധാന കേന്ദ്രങ്ങളെ ബന്ധിപ്പിച്ചുകൊണ്ട് ട്രാക്ക് രഹിത ട്രാം (Trackless Tram) പദ്ധതി നടപ്പിലാക്കുന്നതിനെക്കുറിച്ചുള്ള പഠനങ്ങളും പുരോഗമിക്കുകയാണ്. ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള സാങ്കേതിക വിദ്യകൾ ഉപയോഗിച്ച് യാത്രാ സൗകര്യങ്ങൾ കൂടുതൽ മെച്ചപ്പെടുത്തുന്നതോടെ ലോകത്തെ ഏറ്റവും മികച്ച നഗരമെന്ന ദുബായുടെ പദവി കൂടുതൽ ശക്തമാകും. സുസ്ഥിരമായ നഗരാസൂത്രണത്തിന്റെയും കാര്യക്ഷമമായ ഏകോപനത്തിന്റെയും ഉത്തമ ഉദാഹരണമായി ദുബായിലെ ഗതാഗത മേഖല മാറിക്കഴിഞ്ഞു. ഭാവിയിലെ വർധിച്ചുവരുന്ന ജനസംഖ്യയെയും സാമ്പത്തിക വളർച്ചയെയും ഉൾക്കൊള്ളാൻ തക്കവണ്ണം സജ്ജമാണ് ദുബായിലെ ഗതാഗത ശൃംഖലയെന്ന് ഈ കണക്കുകൾ അടിവരയിടുന്നു.
