ഇൻഫിനിറ്റി പാലത്തിനും ദേരയ്ക്കുമിടയിൽ തടസ്സമില്ലാത്ത യാത്രാസൗകര്യമൊരുക്കി ആറുവരി തുരങ്കപ്പാത; അൽ ശിന്ദഗ കോറിഡോർ പദ്ധതിയിൽ നിർണായക പുരോഗതി.
ദുബായ്, യു.എ.ഇ — അൽ ശിന്ദഗ കോറിഡോർ വികസന പദ്ധതിയുടെ ഭാഗമായി നിർമിച്ച 1,650 മീറ്റർ നീളമുള്ള അൽ ഖലീജ് സ്ട്രീറ്റ് തുരങ്കപ്പാത റോഡ്സ് ആൻഡ് ട്രാൻസ്‌പോർട്ട് അതോറിറ്റി (ആർ.ടി.എ) ഗതാഗതത്തിനായി തുറന്നുനൽകി. ഇരുവശങ്ങളിലേക്കുമായി ആറുവരികളുള്ള പാതയിലൂടെ മണിക്കൂറിൽ 12,000 വാഹനങ്ങൾക്ക് കടന്നുപോകാനാകും.
ദേരയിലെ ഇൻഫിനിറ്റി ബ്രിഡ്ജ് റാമ്പിൽനിന്ന് ആരംഭിച്ച് അൽ ഖലീജ് സ്ട്രീറ്റ് – അൽ വുഹൈദ സ്ട്രീറ്റ് ജങ്ഷൻ വരെയാണ് തുരങ്കം നീളുന്നത്. നഗരവൽക്കരണവും ജനസംഖ്യാ വർധനവും കണക്കിലെടുത്ത് ദുബായുടെ അടിസ്ഥാന സൗകര്യങ്ങൾ നവീകരിക്കുന്നതിന്റെ ഭാഗമായാണ് പദ്ധതി പൂർത്തിയാക്കിയത്.
ശൈഖ് റാഷിദ് റോഡ്, അൽ മിന സ്ട്രീറ്റ്, അൽ ഖലീജ് സ്ട്രീറ്റ്, കെയ്‌റോ സ്ട്രീറ്റ് എന്നിവ ഉൾപ്പെടുന്ന 13 കിലോമീറ്റർ ദൈർഘ്യമുള്ള അൽ ശിന്ദഗ കോറിഡോർ വികസനത്തിലെ പ്രധാന നാഴികക്കല്ലാണിതെന്ന് ആർ.ടി.എ ഡയറക്ടർ ജനറലും ബോർഡ് ഓഫ് എക്സിക്യൂട്ടീവ് ഡയറക്ടേഴ്സ് ചെയർമാനുമായ മത്താർ അൽ തായർ പറഞ്ഞു. പദ്ധതി പൂർണമായി യാഥാർഥ്യമാകുന്നതോടെ ഈ മേഖലയിലെ യാത്രാസമയം ഒരു മണിക്കൂർ 44 മിനിറ്റിൽനിന്ന് 16 മിനിറ്റായി ചുരുങ്ങും. പത്ത് ലക്ഷത്തോളം ആളുകൾക്ക് പദ്ധതിയുടെ പ്രയോജനം ലഭിക്കും.
ഇൻഫിനിറ്റി ബ്രിഡ്ജിൽനിന്ന് ദേര, അൽ മംസാർ ഭാഗങ്ങളിലേക്കും തിരിച്ചുമുള്ള ഗതാഗതം തുരങ്കപ്പാത വഴി സുഗമമാകും. ഇതിന്റെ ഭാഗമായി കെയ്‌റോ സ്ട്രീറ്റ്, അൽ വുഹൈദ സ്ട്രീറ്റ് എന്നിവിടങ്ങളിലെ റൗണ്ട് എബൗട്ടുകൾ സിഗ്നൽ നിയന്ത്രിത ജങ്ഷനുകളാക്കി മാറ്റി. ദുബായ് ഐലൻഡ്‌സിൽനിന്നുള്ള പാലം പുതിയ തുരങ്കവുമായി ബന്ധിപ്പിച്ചിട്ടുണ്ട്. അബു ഹൈൽ, അൽ വുഹൈദ, അൽ മംസാർ, ദുബായ് ഐലൻഡ്‌സ്, വാട്ടർഫ്രണ്ട് മാർക്കറ്റ്, അൽ ഹംരിയ പോർട്ട് തുടങ്ങിയ മേഖലകളിലേക്കുള്ള പ്രവേശനവും എളുപ്പമാകും.
ഒരു അപകടവും റിപ്പോർട്ട് ചെയ്യാതെ 1.1 കോടി തൊഴിൽ മണിക്കൂറുകൾ പിന്നിട്ടാണ് നിർമാണം പൂർത്തിയാക്കിയത്. 2,200 എൻജിനീയർമാരും തൊഴിലാളികളും 350 യന്ത്രസാമഗ്രികളും നിർമാണത്തിൽ പങ്കാളികളായി. തുരങ്ക നിർമാണത്തിനായി ഖനനം ചെയ്തതിൽ 77 ശതമാനം വസ്തുക്കളും (ഏകദേശം 5,22,000 ക്യുബിക് മീറ്റർ) മറ്റ് പദ്ധതികൾക്കായി പുനരുപയോഗിച്ചു.
‘ദുബായ് ടണൽസ്’ സംരംഭത്തിന്റെ ഭാഗമായി എമിറാത്തി ആർട്ടിസ്റ്റ് മറിയം അൽ ഹത്ബൂർ രൂപകൽപ്പന ചെയ്ത ചുവർചിത്രങ്ങൾ തുരങ്കത്തിനുള്ളിൽ ക്രമീകരിച്ചിട്ടുണ്ട്. കറൻസി നോട്ടുകളിലെ ചിത്രീകരണ ശൈലിയിൽ തയാറാക്കിയ ഈ കലാസൃഷ്ടിയിൽ ഇൻഫിനിറ്റി ബ്രിഡ്ജ് ഉൾപ്പെടെയുള്ള നഗരത്തിന്റെ അടയാളങ്ങൾ ആലേഖനം ചെയ്തിരിക്കുന്നു. 3.6 കോടി മൊസൈക് കഷണങ്ങൾ ഉപയോഗിച്ചാണ് ഈ ചുമർചിത്രം തയാറാക്കിയത്.
2025-ൽ ബർദുബായിലെ കോറിഡോർ നിർമാണങ്ങൾ പൂർത്തിയാക്കിയ ആർ.ടി.എ, ദുബായ് ഐലൻഡ്‌സിനെയും ബർദുബായിയെയും ബന്ധിപ്പിക്കുന്ന പുതിയ പാലത്തിന്റെ പ്രവൃത്തികൾ തുടരുകയാണ്. ക്രീക്കിന് കുറുകെ 1,425 മീറ്റർ നീളത്തിലും നാലുവരികളിലുമായി നിർമിക്കുന്ന ഈ പാലത്തിലൂടെ മണിക്കൂറിൽ 16,000 വാഹനങ്ങൾക്ക് സഞ്ചരിക്കാനാകും. ജലഗതാഗതത്തിനായി 18.5 മീറ്റർ ഉയരവും 75 മീറ്റർ വീതിയുമുള്ള ചാനലും കാൽനട-സൈക്കിൾ പാതകളും ഈ പാലത്തിൽ സജ്ജീകരിക്കും.
