അജ്മാൻ: ഭാവിയിൽ പോലീസ് ഉദ്യോഗസ്ഥരാകണമെന്ന സ്വപ്നം മനസിൽ സൂക്ഷിച്ചിരുന്ന നിശ്ചയദാർഢ്യമുള്ള രണ്ട് വിദ്യാർഥികളുടെ ആഗ്രഹം സഫലമാക്കി അജ്മാൻ പോലീസ്. അജ്മാൻ മസ്ഫൂത്തിലെ അബു സയീദ് അൽ-ഖുദ്രി സ്കൂളിലെ വിദ്യാർഥികൾക്ക് പോലീസ് സേവനങ്ങളോടും യൂണിഫോമിനോടും ഉണ്ടായിരുന്ന പ്രത്യേക താൽപര്യമാണ് ഹൃദയസ്പർശിയായ ഈ സംരംഭത്തിന് വഴിയൊരുക്കിയത്.
വിദ്യാർഥികൾക്ക് പോലീസ് ഉദ്യോഗസ്ഥരുടെ ജോലികൾ അടുത്തറിയാനും അവരുടെ ദൈനംദിന പ്രവർത്തനങ്ങൾ നേരിൽ കാണാനും ആഗ്രഹമുണ്ടെന്ന വിവരം ലഭിച്ചതിനെ തുടർന്ന് മസ്ഫൂത്ത് പോലീസ് സ്റ്റേഷൻ അധികൃതർ സ്കൂൾ ഭരണസമിതിയുമായി ചേർന്ന് പ്രത്യേക പരിപാടി സംഘടിപ്പിക്കുകയായിരുന്നു.
കുട്ടികളുടെ സ്വപ്നങ്ങൾക്ക് കൂടുതൽ നിറം പകരുന്നതിനായി ഔദ്യോഗിക പോലീസ് യൂണിഫോമിനോട് സാമ്യമുള്ള രണ്ട് പ്രത്യേക യൂണിഫോമുകളും ഒരുക്കി. തുടർന്ന് വിദ്യാർഥികളെ മസ്ഫൂത്ത് പോലീസ് സ്റ്റേഷനിലേക്ക് ക്ഷണിച്ച് സ്വീകരണം നൽകുകയും വിവിധ വിഭാഗങ്ങളുടെ പ്രവർത്തനങ്ങൾ പരിചയപ്പെടുത്തുകയും ചെയ്തു.
മസ്ഫൂത്ത് പോലീസ് സ്റ്റേഷൻ മേധാവി ലെഫ്റ്റനന്റ് കേണൽ അബ്ദു റഹ്മാൻ ഹായി അൽ കഅബി വിദ്യാർഥികളെ നേരിട്ട് സ്വാഗതം ചെയ്തു. പോലീസ് സേവനങ്ങൾ, സുരക്ഷാ നടപടികൾ, വിവിധ വിഭാഗങ്ങളുടെ പ്രവർത്തനങ്ങൾ, പൊതുജനങ്ങൾക്ക് നൽകുന്ന സേവനങ്ങൾ എന്നിവയെക്കുറിച്ച് അദ്ദേഹം കുട്ടികൾക്ക് വിശദമായി പരിചയപ്പെടുത്തി.
ട്രാഫിക് പട്രോളിംഗ് വിഭാഗത്തിന്റെ പ്രവർത്തനങ്ങൾ, റോഡ് സുരക്ഷ ഉറപ്പാക്കുന്നതിൽ പോലീസിന്റെ പങ്ക്, നിയമങ്ങൾ പാലിക്കുന്നതിന്റെ പ്രാധാന്യം എന്നിവയും വിദ്യാർഥികൾക്ക് മനസ്സിലാക്കിക്കൊടുത്തു. സമൂഹത്തിൽ സുരക്ഷയും ക്രമസമാധാനവും നിലനിർത്താൻ പോലീസ് ഉദ്യോഗസ്ഥർ നടത്തുന്ന പ്രവർത്തനങ്ങളെക്കുറിച്ചും വിശദീകരണം നൽകി.
കുടുംബ മൂല്യങ്ങൾ ശക്തിപ്പെടുത്തുകയും സമൂഹത്തിലെ എല്ലാ വിഭാഗങ്ങളെയും ഉൾക്കൊള്ളുകയും ചെയ്യുക എന്ന ലക്ഷ്യത്തോടെ യു.എ.ഇ ആചരിക്കുന്ന “കുടുംബ വർഷം” പദ്ധതിയുടെ ഭാഗമായാണ് അജ്മാൻ പോലീസിന്റെ ഈ മാതൃകാപരമായ പ്രവർത്തനം. കുട്ടികളുടെ സ്വപ്നങ്ങൾക്ക് പിന്തുണ നൽകുകയും അവരെ പ്രചോദിപ്പിക്കുകയും ചെയ്ത ഈ നടപടി സമൂഹത്തിൽ ഏറെ ശ്രദ്ധ നേടുകയാണ്.
