കോഴിക്കോട്: ബേപ്പൂർ മണ്ഡലത്തിൽ ഇത്തവണത്തെ തെരഞ്ഞെടുപ്പ് രാഷ്ട്രീയമായി അതീവ ശ്രദ്ധേയമാകുകയാണ്. ദീർഘകാലമായി എൽ.ഡി.എഫിന്റെ ശക്തികേന്ദ്രമായിരുന്ന മണ്ഡലത്തിൽ പി.വി. അൻവറിന്റെ വരവ് മത്സരം കടുപ്പമാക്കി.
മുഖ്യമന്ത്രി പിണറായി വിജയനെതിരെ ആരോപണങ്ങൾ ഉയർത്തിയതിനെ തുടർന്ന് എം.എൽ.എ സ്ഥാനം രാജിവെച്ച് എൽ.ഡി.എഫ് വിട്ട അൻവർ, മന്ത്രിയും നിലവിലെ എൽ.ഡി.എഫ് സ്ഥാനാർഥിയുമായ പി.എ. മുഹമ്മദ് റിയാസിനെതിരെയാണ് മത്സര രംഗത്തിറങ്ങുന്നത്. “പിണറായിക്കും മരുമോനുമെതിരായ പോരാട്ടം” എന്നാണ് അൻവർ തന്റെ പ്രചാരണത്തിൽ ആവർത്തിക്കുന്നത്.
1977-ൽ അവസാനമായി യു.ഡി.എഫ് വിജയിച്ച ബേപ്പൂരിൽ പിന്നീട് ഇടതുപക്ഷം മേൽക്കോയ്മ നിലനിർത്തി. ഇത്തവണ അൻവറിന്റെ സാന്നിധ്യം യു.ഡി.എഫ് ക്യാമ്പുകളിൽ ആത്മവിശ്വാസം വർധിപ്പിച്ചിരിക്കുകയാണ്. അൻവർ സ്ഥാനാർഥിയാകുമെന്ന് മുൻകൂട്ടി അറിഞ്ഞതോടെ യു.ഡി.എഫ് അകത്ത് സീറ്റ് തർക്കങ്ങൾ ഒഴിവായത് കൂടി അവരുടെ അനുകൂല ഘടകമായി വിലയിരുത്തപ്പെടുന്നു.
കഴിഞ്ഞ തിരഞ്ഞെടുപ്പിൽ 28,747 വോട്ടുകളുടെ ഭൂരിപക്ഷത്തിലാണ് മുഹമ്മദ് റിയാസ് കോൺഗ്രസിലെ പി.എം. നിയാസിനെ പരാജയപ്പെടുത്തിയത്. എന്നാൽ 2011-ൽ ഈ ഭൂരിപക്ഷം 5,311 വോട്ടുകളായി കുറയാൻ യു.ഡി.എഫിന് കഴിഞ്ഞിരുന്നു.
കഴിഞ്ഞ രണ്ട് മാസമായി മണ്ഡലത്തിൽ സജീവമായി പ്രചാരണം നടത്തുന്ന അൻവർ, വികസന വിഷയങ്ങളും ഭരണവിരുദ്ധ വികാരവും ഉയർത്തിക്കാട്ടിയാണ് മുന്നേറുന്നത്. അതേസമയം, വാട്ടർഫെസ്റ്റ് ഉൾപ്പെടെയുള്ള വിനോദസഞ്ചാര പദ്ധതികളും അടിസ്ഥാന സൗകര്യ വികസനങ്ങളും മുന്നോട്ട് വെച്ചാണ് റിയാസ് വോട്ടർമാരെ സമീപിക്കുന്നത്.
മണ്ഡലത്തിലെ ഭൂരിഭാഗം കോർപ്പറേഷൻ വാർഡുകളും കടലുണ്ടി പഞ്ചായത്തും നിലവിൽ എൽ.ഡി.എഫിന്റെ നിയന്ത്രണത്തിലാണ്. ഫറോക്ക്, രാമനാട്ടുകര നഗരസഭകൾ ഉൾപ്പെടെ ചില മേഖലകൾ യു.ഡി.എഫിനൊപ്പം തുടരുന്നു. ഒരു വാർഡിൽ എൻ.ഡി.എയും സാന്നിധ്യമറിയിക്കുന്നു.
ഇത്തവണ എൻ.ഡി.എ സ്ഥാനാർഥിയായി കെ.പി. പ്രകാശ്ബാബുവും രംഗത്തുണ്ട്. കേന്ദ്ര സർക്കാരിന്റെ പദ്ധതികളും ശബരിമല സ്വർണക്കൊള്ള വിവാദവും ഉയർത്തിയാണ് എൻ.ഡി.എ പ്രചാരണം നടത്തുന്നത്.
ബേപ്പൂരിൽ എൽ.ഡി.എഫിന്റെ പരമ്പരാഗത ശക്തി നിലനിർത്താനാകുമോ, അതോ അൻവറിന്റെ വരവ് രാഷ്ട്രീയ സമവാക്യം മാറ്റുമോ എന്നതാണ് ഇപ്പോഴത്തെ പ്രധാന ചോദ്യമായി ഉയരുന്നത്.
