ഈ മാസം 22 മുതൽ 31 വരെ നഗരവ്യാപകമായി വിനോദ-സാംസ്കാരിക പരിപാടികൾ; ആകർഷകമായ സ്റ്റേക്കേഷൻ പാക്കേജുകളുമായി പ്രമുഖ ആഡംബര ഹോട്ടലുകൾ.
ദുബായ്: ബലിപെരുന്നാൾ (ഈദ് അൽ അദ്ഹ) അവധിക്കാലം അവിസ്മരണീയമാക്കാൻ സ്വദേശികൾക്കും പ്രവാസികൾക്കുമായി വൻകിട ഓഫറുകളുമായി ദുബായിലെ പ്രമുഖ ഹോട്ടലുകളും റിസോർട്ടുകളും. ‘സീസൺ ഓഫ് വുൽഫ’ (ആർദ്രതയുടെ വസന്തം) എന്ന പ്രമേയത്തിലും ‘കുടുംബ വർഷം’ എന്ന ആശയത്തിന് അനുസൃതമായും ഈ മാസം 22 മുതൽ 31 വരെയാണ് ദുബായിൽ നഗരവ്യാപകമായ വിനോദ-സാംസ്കാരിക പരിപാടികൾ അരങ്ങേറുന്നത്.
ദുബായ് ഡിപാർട്ട്മെന്റ് ഓഫ് ഇക്കോണമി ആൻഡ് ടൂറിസത്തിന്റെ ഭാഗമായ ദുബായ് ഫെസ്റ്റിവൽസ് ആൻഡ് റീറ്റെയ്ൽ എസ്റ്റാബ്ലിഷ്മെന്റ് (ഡിഎഫ്ആർഇ) ആണ് ഈ വിപുലമായ ആഘോഷങ്ങൾക്ക് നേതൃത്വം നൽകുന്നത്. കുടുംബാംഗങ്ങൾക്കും സുഹൃത്തുക്കൾക്കും ഒത്തുകൂടാനും അവധിദിനങ്ങൾ ആനന്ദകരമാക്കാനും ലക്ഷ്യമിട്ട് ആകർഷകമായ സ്റ്റേക്കേഷൻ പാക്കേജുകളും വിനോദ പരിപാടികളും ഷോപ്പിങ് ഇളവുകളുമാണ് നഗരത്തിലുടനീളം ഒരുക്കിയിരിക്കുന്നത്.
പാം ജുമൈറയുടെ തീരഭംഗിയിൽ ആഡംബര താമസം
കുടുംബങ്ങൾക്കായി സമാനതകളില്ലാത്ത പാക്കേജുകളാണ് കടൽത്തീരത്തെ പ്രമുഖ റിസോർട്ടുകൾ പ്രഖ്യാപിച്ചിരിക്കുന്നത്:
- എൻഎച്ച് കളക്ഷൻ ഹോട്ടൽ (പാം ജുമൈറ): 350 ദിർഹം മുതൽ ആരംഭിക്കുന്ന പാക്കേജിൽ ഒരു രാത്രി താമസിക്കുമ്പോൾ രണ്ടാം രാത്രി തികച്ചും സൗജന്യമായി ലഭിക്കും.
- സോഫിറ്റെൽ ദുബായ് ജുമൈറ ബീച്ച്: 12 വയസ്സിൽ താഴെയുള്ള കുട്ടികൾക്ക് താമസം പൂർണമായും സൗജന്യമാണ്.
- ഫോർ സീസൺസ് റിസോർട്ട് (ജുമൈറ ബീച്ച്): മുറി വാടകയിൽ 30 ശതമാനം ഇളവും സൗജന്യ പ്രഭാതഭക്ഷണവും ചെക്ക്-ഇൻ, ചെക്ക്-ഔട്ട് സമയക്രമങ്ങളിൽ ഇളവുകളും ഒരുക്കിയിട്ടുണ്ട്.
- അഡ്രസ് ബീച്ച് റിസോർട്ട്: മുതിർന്നവർക്ക് മാത്രമായി അവധിക്കാലം ചെലവഴിക്കാൻ ആഗ്രഹിക്കുന്നവർക്കായി 35 ശതമാനം വരെ ഇളവുകൾ. ലോകത്തിലെ ഏറ്റവും ഉയർന്ന ഇൻഫിനിറ്റി പൂളായ ‘സീറ്റ 77’-ൽ വെച്ചുള്ള ഫ്ലോട്ടിങ് ബ്രേക്ക്ഫാസ്റ്റും ഇതിന്റെ ഭാഗമായി ആസ്വദിക്കാം.
- അനന്താര ദ പാം റിസോർട്ട്: മുറികൾക്കും വില്ലകൾക്കും 30 ശതമാനം ഇളവിനൊപ്പം പ്രതിദിനം 500 ദിർഹം വരെയുള്ള റിസോർട്ട് ക്രെഡിറ്റും ലഭിക്കും.
- റാഫിൾസ് ദ പാം: ക്ലബ് ലോഞ്ച് സൗകര്യവും പ്രത്യേക സ്പാ ഇളവുകളുമാണ് വാഗ്ദാനം ചെയ്യുന്നത്.
നഗരത്തിരക്കുകളിൽ നിന്ന് മാറി മരുഭൂമിയുടെ ശാന്തത ആഗ്രഹിക്കുന്നവർക്കായി മെലിയ ഡെസേർട്ട് പാം റിസോർട്ട് എല്ലാ മുറികൾക്കും വില്ലകൾക്കും 45 ശതമാനം ഇളവ് പ്രഖ്യാപിച്ചിട്ടുണ്ട്. ഇതിനൊപ്പം സൗജന്യ കുതിരലായം സന്ദർശനവും യോഗ ക്ലാസുകളും ഭക്ഷണത്തിനും സ്പാ സേവനങ്ങൾക്കും 100 ദിർഹം വീതം ക്രെഡിറ്റും ഇവിടെ ലഭിക്കും.
നഗരഹൃദയത്തിലെ വിസ്മയങ്ങളും സിറ്റി പാക്കേജുകളും
ഷോപ്പിങ്ങിനും നഗരക്കാഴ്ചകൾക്കും പ്രാധാന്യം നൽകുന്നവർക്കായി ദുബായിലെ പ്രമുഖ സിറ്റി ഹോട്ടലുകളും മികച്ച പാക്കേജുകൾ ഒരുക്കിയിട്ടുണ്ട്. ലോകത്തിലെ ഏറ്റവും ഉയരം കൂടിയ ഹോട്ടലായ ദുബായ് മറീനയിലെ സിയൽ ഹോട്ടലിൽ കടൽക്കാഴ്ചകൾ ആസ്വദിക്കാനാകുന്ന ഉയർന്ന നിലകളിലെ സ്യൂട്ട് മുറികളും പ്രത്യേക പ്രഭാതഭക്ഷണവും സമയക്രമത്തിൽ ഇളവുകളും ലഭിക്കും.
ഗ്രാൻഡ് മില്ലേനിയം ഹോട്ടലിൽ 11 വയസ്സുവരെയുള്ള കുട്ടികൾക്ക് സൗജന്യ താമസവും ഭക്ഷണത്തിനും സ്പാ സേവനങ്ങൾക്കും 30 ശതമാനം ഇളവും ലഭിക്കും. ബിസിനസ് ബേയിലെ ഇന്റർകോണ്ടിനെന്റൽ റെസിഡൻസസിൽ മൂന്ന് രാത്രി താമസിക്കുമ്പോൾ രണ്ട് രാത്രികളുടെ തുക മാത്രം നൽകിയാൽ മതിയെന്നതാണ് പ്രത്യേകത.
വിഡ ക്രീക്ക് ഹാർബർ ഹോട്ടൽ സൗജന്യ റൂം അപ്ഗ്രേഡും കുട്ടികൾക്ക് സൗജന്യ താമസവും ഭക്ഷണത്തിന് 30 ശതമാനം ഇളവും നൽകുമ്പോൾ, ഷാംഗ്രി-ലാ ദുബായ് സ്പാ സേവനങ്ങൾക്കും ഭക്ഷണത്തിനും പ്രത്യേക ഇളവുകൾ വാഗ്ദാനം ചെയ്യുന്നു. മാൻഡറിൻ ഓറിയന്റൽ ഡൗൺടൗൺ ആരോഗ്യസംരക്ഷണത്തിന് മുൻഗണന നൽകുന്ന പ്രത്യേക പാക്കേജുകളിൽ 20 ശതമാനം വരെ ഇളവുകളാണ് പ്രഖ്യാപിച്ചിരിക്കുന്നത്. ചരിത്രപ്രസിദ്ധമായ അൽ സീഫ് സന്ദർശിക്കാൻ ആഗ്രഹിക്കുന്നവർക്കായി ഹാംപ്ടൺ ബൈ ഹിൽട്ടൺ, കാനോപി ബൈ ഹിൽട്ടൺ ഹോട്ടലുകളും ആകർഷകമായ പാക്കേജുകൾ ഒരുക്കിയിട്ടുണ്ട്.
താമസസൗകര്യങ്ങൾക്ക് പുറമെ, വൈവിധ്യമാർന്ന ആഗോള രുചികളും ആകർഷകമായ കലാപരിപാടികളും കോർത്തിണക്കിയുള്ള വിപുലമായ പെരുന്നാൾ ആഘോഷങ്ങളാണ് ഈ ദിവസങ്ങളിൽ ദുബായിൽ വിരുന്നുകാരെ കാത്തിരിക്കുന്നത്.
