പ്രഭാതത്തിലെ ആരോഗ്യപരിശോധനകൾ മുതൽ ഭിന്നശേഷി സൗഹൃദ സന്ദർശനങ്ങൾ വരെ, 220-ഓളം ജീവിവർഗ്ഗങ്ങൾക്കായി ഒരുക്കുന്ന ദൈനംദിന പരിചരണ രീതികൾ വ്യക്തമാക്കി അബുദാബിയിലെ മൃഗശാല.
അബുദാബി, യുഎഇ — നവംബർ 13-ന് ആചരിക്കുന്ന ലോക ദയാദിനത്തോടനുബന്ധിച്ച്, സന്ദർശകർ എത്തുന്നതിന് മുൻപും മടങ്ങിയ ശേഷവും മൃഗശാലയിൽ നടക്കുന്ന ദൈനംദിന പരിചരണ പ്രവർത്തനങ്ങൾ അവതരിപ്പിച്ച് അബുദാബി അൽ ബാഹിയയിലെ എമിറേറ്റ്സ് പാർക്ക് സൂ ആൻഡ് റിസോർട്ട്.
പുലർച്ചെ ആരംഭിക്കുന്ന ആരോഗ്യപരിശോധനകളിലൂടെയാണ് മൃഗശാലാ ജീവനക്കാരുടെ ദിനം തുടങ്ങുന്നത്. ഓരോ ജീവിവർഗ്ഗത്തിനും അനുയോജ്യമായ പോഷകാഹാരം തയ്യാറാക്കുകയും, മൃഗങ്ങൾ ശാന്തരും സുരക്ഷിതരുമാണെന്ന് ഉറപ്പാക്കാൻ എല്ലാ ആവാസവ്യവസ്ഥകളിലും പരിശോധന നടത്തുകയും ചെയ്യുന്നു. മൃഗശാലയിലുള്ള ഏകദേശം 220 ജീവിവർഗ്ഗങ്ങളുടെയും പ്രായം, സ്വഭാവം, പ്രത്യേക ആവശ്യങ്ങൾ എന്നിവയ്ക്ക് അനുസൃതമായാണ് ഈ പരിചരണ രീതികൾ ക്രമീകരിച്ചിരിക്കുന്നത്.
മൃഗങ്ങളുടെ സ്വാഭാവിക സ്വഭാവരീതികൾ പ്രോത്സാഹിപ്പിക്കുന്നതിനായി പ്രത്യേക പ്രവർത്തനങ്ങളും ജീവനക്കാർ ദിവസേന ആസൂത്രണം ചെയ്യുന്നുണ്ട്. ഒളിപ്പിച്ചുവെച്ച ഭക്ഷണം കണ്ടെത്തുന്ന പസിലുകൾ, പുതിയ ഗന്ധങ്ങൾ, വ്യത്യസ്ത പ്രതലങ്ങൾ എന്നിവയിലൂടെ ഇരതേടൽ, മരംകയറ്റം, വിനോദം തുടങ്ങിയ സ്വാഭാവിക ചലനങ്ങൾ സജീവമാക്കുന്നു. പ്രതിരോധ ചികിത്സകളും കൃത്യമായ ആരോഗ്യപരിശോധനകളുമായി വെറ്ററിനറി വിഭാഗവും ഒപ്പമുണ്ട്. മൃഗങ്ങളുടെ പെരുമാറ്റവും ക്ഷേമവും കൂടുതൽ സൂക്ഷ്മമായി നിരീക്ഷിക്കുന്നതിനായി നിർമ്മിതബുദ്ധി (AI) അധിഷ്ഠിത സംവിധാനങ്ങൾ ഉടൻ നടപ്പിലാക്കാനും മൃഗശാല തയ്യാറെടുക്കുന്നു.
സന്ദർശകർക്കും ഇതേ കരുതൽ മൃഗശാല ഉറപ്പാക്കുന്നുണ്ട്. സർട്ടിഫൈഡ് ഓട്ടിസം സെന്റർ™ എന്ന നിലയിൽ, നിശ്ചയദാർഢ്യമുള്ളവർ (People of Determination) ഉൾപ്പെടെയുള്ള എല്ലാ അതിഥികൾക്കും സുരക്ഷിതവും ശാന്തവുമായ അന്തരീക്ഷത്തിൽ മൃഗങ്ങളെ അടുത്തറിയാൻ പരിശീലനം ലഭിച്ച ജീവനക്കാരുടെ സേവനം ലഭ്യമാണ്. പ്രതിവർഷം 300-ലധികം സ്കൂളുകളാണ് ഇവിടം സന്ദർശിക്കുന്നത്. ജീവജാലങ്ങളെ സ്നേഹിക്കാനും സംരക്ഷിക്കാനുമുള്ള ആദ്യ പാഠങ്ങൾ കുട്ടികൾക്ക് ഇവിടെ നിന്നും ലഭിക്കുന്നു.
“ദയ എന്നത് ഞങ്ങളുടെ ടീമിന് ഒരു ദിവസത്തെ ആചരണം മാത്രമല്ല, മറിച്ച് ഞങ്ങളുടെ ദൈനംദിന പ്രവർത്തന രീതിയാണ്. ഇവിടുത്തെ ഓരോ ജീവിയും അതിനെ ആശ്രയിച്ചാണ് കഴിയുന്നത്. വീട്ടിലും പ്രകൃതിയിലുമുള്ള മൃഗങ്ങളോട് ഇതേ കരുതൽ കാണിക്കാൻ ഓരോ സന്ദർശകനും പ്രചോദനമാകുമെന്ന് ഞങ്ങൾ പ്രതീക്ഷിക്കുന്നു,” എമിറേറ്റ്സ് പാർക്ക് സൂ ആൻഡ് റിസോർട്ട് സിഇഒ ഡോ. വാലിദ് ഷാബാൻ പറഞ്ഞു.
ലോക ദയാദിനത്തിൽ ലളിതമായ ശീലങ്ങൾ പിന്തുടരാൻ മൃഗശാല കുടുംബങ്ങളോട് അഭ്യർത്ഥിച്ചു. വളർത്തുമൃഗങ്ങളോടും വന്യജീവികളോടും സൗമ്യമായി പെരുമാറുക, വന്യമൃഗങ്ങൾക്ക് മനുഷ്യർ കഴിക്കുന്ന ഭക്ഷണം നൽകാതിരിക്കുക, യുഎഇയിലെ തദ്ദേശീയ ജീവിവർഗ്ഗങ്ങളെക്കുറിച്ച് കൂടുതൽ മനസ്സിലാക്കുക എന്നിവയാണ് ഇതിൽ പ്രധാനം.
