ടെർമിനലുകളിൽ അത്യാധുനിക 3ഡി സ്കാനറുകൾ സ്ഥാപിക്കുന്നത് പുരോഗമിക്കുന്നു; യാത്രക്കാർക്ക് ഹാൻഡ് ബാഗേജ് തുറക്കാതെ തന്നെ പരിശോധന പൂർത്തിയാക്കാം.
ദുബായ് — ദുബായ് അന്താരാഷ്ട്ര വിമാനത്താവളം (DXB) വഴി യാത്ര ചെയ്യുന്നവർക്ക് ഇനി സുരക്ഷാ പരിശോധനകൾക്കായി നീണ്ട ക്യൂവിൽ നിൽക്കേണ്ടി വരില്ല. കൈവശമുള്ള ബാഗുകളിൽ നിന്ന് ലാപ്ടോപ്പുകൾ, മറ്റ് ഇലക്ട്രോണിക് ഉപകരണങ്ങൾ, ദ്രാവകങ്ങൾ (ലിക്വിഡ്സ്) എന്നിവ പുറത്തെടുക്കാതെ തന്നെ പരിശോധന പൂർത്തിയാക്കാൻ സഹായിക്കുന്ന അത്യാധുനിക 3ഡി സെക്യൂരിറ്റി സ്കാനറുകൾ വിമാനത്താവളത്തിൽ ഘട്ടംഘട്ടമായി സജ്ജീകരിച്ചു തുടങ്ങി.
ദുബായ് എയർപോർട്ട്സ് ചീഫ് എക്സിക്യൂട്ടീവ് ഓഫീസർ പോൾ ഗ്രിഫിത്സ് ആണ് വിവരങ്ങൾ വ്യക്തമാക്കിയത്. വിമാനത്താവളത്തിന്റെ അടിസ്ഥാന സൗകര്യങ്ങൾ വികസിപ്പിക്കുന്നതിനൊപ്പം യാത്രാനടപടികൾ കൂടുതൽ എളുപ്പമാക്കുന്നതിനാണ് പുതിയ സാങ്കേതികവിദ്യ നടപ്പിലാക്കുന്നത്.
“പുതിയ സാങ്കേതികവിദ്യയിലുള്ള സുരക്ഷാ മെഷീനുകൾ ഞങ്ങൾ ഘടിപ്പിച്ചു വരികയാണ്. ഇനിമുതൽ ബാഗുകളിൽ നിന്ന് ദ്രാവകങ്ങളോ ലാപ്ടോപ്പുകളോ പുറത്തെടുക്കേണ്ടതില്ല,” പോൾ ഗ്രിഫിത്സ് പറഞ്ഞു. “മുഴുവൻ സുരക്ഷാ പരിശോധനാ പ്രക്രിയയും കൂടുതൽ വേഗതയുള്ളതും ലളിതവുമാകും.”
കമ്പ്യൂട്ടഡ് ടോമോഗ്രഫി (CT) സാങ്കേതികവിദ്യ ഉപയോഗിച്ച് പ്രവർത്തിക്കുന്നതാണ് ഈ പുതിയ ഉപകരണങ്ങൾ. ബാഗിനുള്ളിലുള്ള സാധനങ്ങളുടെ വ്യക്തമായ 3ഡി ചിത്രങ്ങൾ സുരക്ഷാ ഉദ്യോഗസ്ഥർക്ക് ഇത് നൽകും. ബാഗ് തുറക്കാതെ തന്നെ ഉള്ളിലുള്ള വസ്തുക്കൾ എല്ലാ കോണുകളിൽ നിന്നും കൃത്യമായി പരിശോധിക്കാൻ ഇതിലൂടെ സാധിക്കും.
ടെർമിനൽ 1, കോൺകോഴ്സ് ബി ഉൾപ്പെടെയുള്ള പ്രധാന ഭാഗങ്ങളിലാണ് നിലവിൽ പുതിയ സ്കാനറുകൾ സ്ഥാപിക്കുന്നത്. ടെർമിനൽ 1-ൽ സുരക്ഷാ പരിശോധനയ്ക്കായി കൂടുതൽ ലെയ്നുകളും സജ്ജമാക്കുന്നുണ്ട്.
കഴിഞ്ഞ പത്ത് വർഷത്തിനിടെ വിമാനത്താവളത്തിന്റെ വലിപ്പം കൂട്ടാതെ തന്നെ യാത്രക്കാരുടെ എണ്ണത്തിൽ 20 ശതമാനം വർധന കൈവരിക്കാൻ ദുബായിക്ക് സാധിച്ചിട്ടുണ്ട്. സാങ്കേതികവിദ്യ പ്രയോജനപ്പെടുത്തി പ്രക്രിയകൾ വേഗത്തിലാക്കുക എന്ന തന്ത്രമാണ് ദുബായ് എയർപോർട്ട്സ് ഇതിനായി സ്വീകരിക്കുന്നത്. ഇമിഗ്രേഷൻ ഉൾപ്പെടെയുള്ള എല്ലാ യാത്രാഘട്ടങ്ങളും കൂടുതൽ സുഗമമാക്കാനാണ് എയർപോർട്ട് അധികൃതർ ലക്ഷ്യമിടുന്നത്.
