ദുബായ്: ലോകത്തിലെ ഏറ്റവും വലിയ പുഷ്പ ഉദ്യാനമായ ദുബൈ മിറാക്കിൾ ഗാർഡൻ സന്ദർശകർക്ക് ആകർഷകമായ ഓഫറുമായി രംഗത്തെത്തി. ഇന്നു മുതൽ ഈ മാസം 31 വരെ പ്രവൃത്തി ദിവസങ്ങളായ തിങ്കൾ മുതൽ വെള്ളി വരെ കുടുംബങ്ങൾക്ക് സൗജന്യമായി ഉദ്യാനം സന്ദർശിക്കാനാകും. രാവിലെ 9 മുതൽ വൈകിട്ട് 6 വരെ ഗേറ്റ് നമ്പർ 3 വഴിയാണ് പ്രവേശനം അനുവദിക്കുക. എന്നാൽ ശനി, ഞായർ ദിവസങ്ങളിലും പൊതുഅവധി ദിനങ്ങളിലും ഈ സൗജന്യ ഓഫർ ലഭ്യമാകില്ല.
യു.എ.ഇയിൽ താമസിക്കുന്നവർക്ക് ഒറിജിനൽ എമിറേറ്റ്സ് ഐഡി ഹാജരാക്കിയാൽ 30 ദിർഹം നിരക്കിൽ പ്രവേശനം അനുവദിക്കും. 12 വയസ്സിന് താഴെയുള്ള കുട്ടികൾക്ക് സൗജന്യ പ്രവേശനമാണ്.
15 കോടിയിലധികം പൂക്കൾ വിരിഞ്ഞുനിൽക്കുന്ന മിറാക്കിൾ ഗാർഡന്റെ ഈ സീസൺ ഈ മാസം 31ന് അവസാനിക്കും. തുടർന്ന് അടുത്ത സീസണിനായുള്ള നവീകരണ പ്രവർത്തനങ്ങൾ ആരംഭിക്കുന്നതിനാൽ ഉദ്യാനം താൽക്കാലികമായി അടയ്ക്കും.
സീസൺ 15-ലേക്ക് കടക്കുന്നതിനുമുമ്പ് സന്ദർശകർക്ക് നൽകുന്ന സ്നേഹസമ്മാനമാണ് ഈ പ്രത്യേക ഓഫറുകളെന്ന് മിറാക്കിൾ ഗ്രൂപ്പ് സിഇഒ മുഹമ്മദ് സാഹിർ ഹമ്മാദി വ്യക്തമാക്കി.
ഉദ്യാനം ദിവസേന രാവിലെ 9 മുതൽ രാത്രി 9 വരെയാണ് പ്രവർത്തിക്കുന്നത്. പൂക്കളുടെ വൈവിധ്യവും മനോഹരമായ ഡിസൈനുകളും കൊണ്ട് ലോകമെമ്പാടുമുള്ള വിനോദസഞ്ചാരികളെ ആകർഷിക്കുന്ന ഈ ഉദ്യാനം അവസാന ദിവസങ്ങളിൽ വലിയ തിരക്കാണ് പ്രതീക്ഷിക്കുന്നത്.
