ദുബായ്: ഈദ് ആഘോഷങ്ങളുടെ തിരക്കിലും ആഘോഷപരിപാടികളിലും കുട്ടികളുടെ സുരക്ഷയിൽ പ്രത്യേക ശ്രദ്ധ പുലർത്തണമെന്ന് രക്ഷിതാക്കൾക്ക് മുന്നറിയിപ്പ് നൽകി ദുബായ് പോലീസ്. കുടുംബസമേതം പാർക്കുകൾ, മാളുകൾ, വിനോദകേന്ദ്രങ്ങൾ, പൊതുസ്ഥലങ്ങൾ എന്നിവിടങ്ങളിലേക്ക് വലിയ തിരക്ക് അനുഭവപ്പെടുന്ന സാഹചര്യത്തിലാണ് സുരക്ഷാ നിർദേശങ്ങൾ പുറത്തിറക്കിയത്.
കുട്ടികളെ ഒരിക്കലും ഒറ്റയ്ക്ക് വിടരുതെന്നും തിരക്കേറിയ സ്ഥലങ്ങളിൽ കുട്ടികളുടെ കൈപിടിച്ച് തന്നെ നടത്തണമെന്നും പോലീസ് നിർദേശിച്ചു. ആഘോഷങ്ങളുടെ ആവേശത്തിൽ കുട്ടികൾ വഴിതെറ്റാനോ അപകടങ്ങളിൽപ്പെടാനോ സാധ്യത കൂടുതലാണെന്നും അധികൃതർ ചൂണ്ടിക്കാട്ടി.
കുട്ടികൾക്ക് പ്രായത്തിന് അനുയോജ്യമായതും സുരക്ഷിതവുമായ കളിപ്പാട്ടങ്ങൾ മാത്രം നൽകണമെന്നും മുന്നറിയിപ്പിൽ പറയുന്നു. ചെറിയ ഭാഗങ്ങൾ വേർപെടുന്ന കളിപ്പാട്ടങ്ങൾ, മൂർച്ചയുള്ള വസ്തുക്കൾ എന്നിവ അപകടങ്ങൾക്ക് കാരണമാകാമെന്നും പോലീസ് വ്യക്തമാക്കി.
അതേസമയം, നീന്തൽക്കുളങ്ങൾ, റോഡുകൾ, ഉയരം കൂടിയ സ്ഥലങ്ങൾ, എസ്കലേറ്ററുകൾ തുടങ്ങിയ അപകടസാധ്യതയുള്ള ഇടങ്ങളിൽ കുട്ടികളെ പ്രത്യേകം നിരീക്ഷിക്കണമെന്നും നിർദേശമുണ്ട്. ഈദ് ആഘോഷങ്ങൾ സന്തോഷകരവും സുരക്ഷിതവുമാക്കാൻ രക്ഷിതാക്കൾ ജാഗ്രത പാലിക്കണമെന്ന് ദുബായ് പോലീസ് അഭ്യർഥിച്ചു.
