ദുബായ് സ്‌കൂൾസ് ഗെയിംസ്: ജെംസ് മോഡേൺ അക്കാദമിയും ക്രെഡൻസ് ഹൈസ്‌കൂളും ജേതാക്കൾ

195 സ്കൂളുകളിൽ നിന്നായി പതിനാലായിരത്തിലധികം വിദ്യാർത്ഥികൾ മാറ്റുരച്ച കായികമാമാങ്കത്തിനാണ് ദുബായ് വേൾഡ് ട്രേഡ് സെന്ററിൽ സമാപനമായത്.

ദുബായ്, ജൂലൈ 2, 2026: ദുബായിലെ യുവ കായിക പ്രതിഭകളെ ആദരിക്കുന്ന മിഡിയ (MIDEA) ദുബായ് സ്കൂൾസ് ഗെയിംസിന്റെ ആറാം പതിപ്പിന് ദുബായ് വേൾഡ് ട്രേഡ് സെന്ററിൽ നടന്ന പ്രൗഢഗംഭീരമായ ചടങ്ങോടെ സമാപനമായി. പ്രൈമറി വിഭാഗത്തിൽ ജെംസ് മോഡേൺ അക്കാദമിയും സെക്കൻഡറി വിഭാഗത്തിൽ ക്രെഡൻസ് ഹൈസ്കൂളും ഓവറോൾ ചാമ്പ്യന്മാരായി തിരഞ്ഞെടുക്കപ്പെട്ടു. ദുബായുടെ കായികരംഗത്തെ പുരോഗതി വ്യക്തമാക്കുന്നതായിരുന്നു ഇത്തവണത്തെ പങ്കാളിത്തം.

യൂത്ത് സ്പോർട്സ് മന്ത്രാലയത്തിലെ സ്പോർട്സ് ഡിപ്പാർട്ട്മെന്റ് അസിസ്റ്റന്റ് അണ്ടർസെക്രട്ടറിയും യുഎഇ സ്കൂൾ ആൻഡ് യൂണിവേഴ്സിറ്റി സ്പോർട്സ് ഫെഡറേഷൻ പ്രസിഡന്റുമായ ഷെയ്ഖ് സുഹൈൽ ബിൻ ബുട്ടി അൽ മക്തൂം, ദുബായ് ഡിപ്പാർട്ട്മെന്റ് ഓഫ് ഇക്കോണമി ആൻഡ് ടൂറിസം സിഇഒയും ദുബായ് സ്പോർട്സ് കൗൺസിൽ ബോർഡ് അംഗവുമായ അഹമ്മദ് അൽ ഖാജ എന്നിവർ ചേർന്നാണ് ജേതാക്കൾക്കുള്ള സമ്മാനങ്ങൾ വിതരണം ചെയ്തത്.

അണ്ടർ-9 മുതൽ അണ്ടർ-17 വരെയുള്ള പ്രായപരിധിയിലായി ആകെ 27 കായിക ഇനങ്ങളിലാണ് മത്സരങ്ങൾ നടന്നത്. 2021-ൽ ആരംഭിച്ച ഈ കായിക മേളയിൽ ഇത്തവണ 195 സ്കൂളുകളിൽ നിന്നായി 21,230 രജിസ്ട്രേഷനുകളും 14,654 സജീവ പങ്കാളിത്തവും രേഖപ്പെടുത്തി. ദുബായ് പ്ലാൻ 2033-ന് അനുസൃതമായി യുവ കായിക പ്രതിഭകളെ കണ്ടെത്തുന്നതിനും അവർക്ക് ദേശീയ തലത്തിലേക്ക് വളരാനുള്ള അവസരമൊരുക്കുന്നതിനും ഈ മേള വലിയ പങ്കുവഹിക്കുന്നു.

പ്രൈമറി വിഭാഗത്തിൽ ജെംസ് മോഡേൺ അക്കാദമി ഒന്നാം സ്ഥാനം നേടിയപ്പോൾ ജെംസ് ദുബായ് അമേരിക്കൻ അക്കാദമി, നോർഡ് ആംഗ്ലിയ ഇന്റർനാഷണൽ സ്കൂൾ എന്നിവർ യഥാക്രമം രണ്ടും മൂന്നും സ്ഥാനങ്ങൾ സ്വന്തമാക്കി. സെക്കൻഡറി വിഭാഗത്തിൽ ക്രെഡൻസ് ഹൈസ്കൂൾ ഓവറോൾ ചാമ്പ്യന്മാരായപ്പോൾ ജെംസ് മോഡേൺ അക്കാദമി, ജെംസ് മെട്രോപോൾ സ്കൂൾ എന്നിവർ തുടർന്നുള്ള സ്ഥാനങ്ങൾ നേടി. സെക്കൻഡറി വിഭാഗം ടീം ഇനങ്ങളിൽ ദി വിൻചെസ്റ്റർ സ്കൂൾ (ജെബൽ അലി) ഒന്നാമതെത്തി.

വിദ്യാർത്ഥികളുടെ കഠിനാധ്വാനവും സ്കൂൾ മാനേജ്‌മെന്റിന്റെ മികച്ച പിന്തുണയുമാണ് ഈ വിജയത്തിന് പിന്നിലെന്ന് ജെംസ് മോഡേൺ അക്കാദമി ശാരീരിക വിദ്യാഭ്യാസ വിഭാഗം മേധാവി കുശാൽ സച്ച്ദേവ പറഞ്ഞു. പരീക്ഷാ സമയങ്ങളിൽ പോലും കുട്ടികൾക്ക് പഠനവും കായിക പരിശീലനവും ഒരുമിച്ച് കൊണ്ടുപോകാൻ സ്കൂൾ അധികൃതർ പിന്തുണ നൽകിയതായി അദ്ദേഹം കൂട്ടിച്ചേർത്തു.

മികച്ച പ്രകടനം കാഴ്ചവെച്ച വിദ്യാർത്ഥികൾക്ക് ‘നെക്സ്റ്റ് ജനറേഷൻ ടാലന്റ്’, ‘റൈസിംഗ് സ്റ്റാർ’ പുരസ്കാരങ്ങൾ വിതരണം ചെയ്തു. ഫെൻസിങ്, അത്‌ലറ്റിക്സ്, ഫുട്ബോൾ, നീന്തൽ, ജൂഡോ തുടങ്ങിയ ഇനങ്ങളിലെ മികച്ച പ്രകടനങ്ങൾക്കാണ് പുരസ്കാരങ്ങൾ നൽകിയത്. ഇവിടെ മികച്ച വിജയം നേടിയ സ്കൂളുകൾക്കും കായികതാരങ്ങൾക്കും ഇനി യുഎഇ സ്കൂൾ ഗെയിംസിൽ ദുബായെ പ്രതിനിധീകരിച്ച് മത്സരിക്കാൻ അവസരം ലഭിക്കും.

മിഡിയ, അൽമറായി, വോക്സ്‌വാഗൺ അൽ നബൂദ ഓട്ടോമൊബൈൽസ് തുടങ്ങിയ പ്രമുഖ ബ്രാൻഡുകളുടെ പങ്കാളിത്തവും പിന്തുണയും ഈ മേളയുടെ വിജയത്തിന് കരുത്തേകി.