ദുബായ്: ഈദുൽ ഫിത്തർ ആഘോഷങ്ങളുടെ ഭാഗമായി നഗരത്തിലെ യാത്രാസൗകര്യങ്ങളിലും പൊതുസേവനങ്ങളിലും വിപുലമായ മാറ്റങ്ങൾ പ്രഖ്യാപിച്ച് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ). പെരുന്നാൾ അവധി ദിനങ്ങളിൽ ജനത്തിരക്ക് നിയന്ത്രിക്കുന്നതിനും യാത്രക്കാർക്ക് സുഗമമായ യാത്ര ഉറപ്പാക്കുന്നതിനുമായി ഈ മാസം 18 മുതൽ 22 വരെയുള്ള തീയതികളിലാണ് പുതിയ സമയക്രമം പ്രാബല്യത്തിൽ വരുന്നത്. പൊതു പാർക്കിങ് സൗജന്യം മുതൽ മെട്രോയുടെ അധിക സർവീസുകൾ വരെ നീളുന്ന പ്രഖ്യാപനങ്ങൾ പ്രവാസി മലയാളി സമൂഹമടക്കമുള്ള പതിനായിരക്കണക്കിന് യാത്രക്കാർക്ക് വലിയ ആശ്വാസമാകും.
നഗരത്തിലെ വാഹന ഉടമകൾക്ക് ഏറെ സന്തോഷം നൽകുന്നതാണ് സൗജന്യ പാർക്കിങ് പ്രഖ്യാപനം. മൾട്ടി-സ്റ്റോറി പാർക്കിങ്ങുകൾ ഒഴികെയുള്ള എല്ലാ പൊതു പാർക്കിങ് കേന്ദ്രങ്ങളും പെരുന്നാളിന്റെ ആദ്യ ദിവസം മുതൽ മൂന്നാം ദിവസം വരെ സൗജന്യമായിരിക്കും. നാലാം ദിവസം മുതൽ മാത്രമേ പഴയതുപോലെ പാർക്കിങ് നിരക്കുകൾ ഈടാക്കിത്തുടങ്ങുകയുള്ളൂ. എന്നാൽ അവധി ദിവസങ്ങളിൽ വാഹന പരിശോധനാ കേന്ദ്രങ്ങൾക്കും കസ്റ്റമർ ഹാപ്പിനസ് സെന്ററുകൾക്കും അവധി ബാധകമായിരിക്കും. അതേസമയം, ഉമ്മു റമൂലിലെ കേന്ദ്രവും ദെയ്റ, അൽ ബർഷ തുടങ്ങിയ ഇടങ്ങളിലെ സ്മാർട്ട് സെന്ററുകളും പതിവുപോലെ 24 മണിക്കൂറും പ്രവർത്തിക്കുമെന്ന് അധികൃതർ വ്യക്തമാക്കി.
മെട്രോ, ട്രാം സർവീസുകളുടെ സമയക്രമത്തിൽ വരുത്തിയ മാറ്റമാണ് മറ്റൊരു പ്രധാനപ്പെട്ട കാര്യം. ദുബായ് മെട്രോയുടെ റെഡ്, ഗ്രീൻ ലൈനുകൾ ഈ മാസം 18 മുതൽ 21 വരെ പുലർച്ചെ 5 മണി മുതൽ അടുത്ത ദിവസം പുലർച്ചെ 1 മണി വരെ തുടർച്ചയായി സർവീസ് നടത്തും. ഞായറാഴ്ച (മാർച്ച് 22) രാവിലെ 8 മുതൽ പുലർച്ചെ 1 വരെയാകും മെട്രോ ലഭ്യമാകുക. ട്രാമുകൾ 18 മുതൽ 21 വരെ രാവിലെ 6 മുതൽ പുലർച്ചെ 1 വരെ സർവീസ് നടത്തും. അവധി ദിവസങ്ങളിൽ നഗരത്തിലെ പ്രധാന വിനോദസഞ്ചാര കേന്ദ്രങ്ങളിലേക്ക് എത്തുന്നവർക്ക് ഈ നീട്ടിയ സമയക്രമം ഏറെ പ്രയോജനകരമാകും.
പൊതു ബസുകളുടെയും വാട്ടർ ടാക്സി, ഫെറി തുടങ്ങിയ മറൈൻ ട്രാൻസ്പോർട്ട് സംവിധാനങ്ങളുടെയും റൂട്ടുകളിൽ ഭാഗികമായ മാറ്റങ്ങളുണ്ട്. അബുദാബിയിലേക്കും മുസഫയിലേക്കുമുള്ള ബസ് റൂട്ടുകളിൽ (E100, E101, E102) ചില സ്റ്റേഷനുകളിൽ നിന്ന് സർവീസ് ഉണ്ടാകില്ലെന്ന് ആർടിഎ അറിയിച്ചു. യാത്രക്കാർ കൂടുതൽ വിവരങ്ങൾ അറിയാൻ ‘S’hail’ മൊബൈൽ ആപ്ലിക്കേഷൻ ഉപയോഗിക്കണമെന്നും നിർദ്ദേശമുണ്ട്. പെരുന്നാൾ അവധി ആഘോഷിക്കാൻ തയ്യാറെടുക്കുന്നവർ ഈ മാറ്റങ്ങൾ മുൻകൂട്ടി മനസ്സിലാക്കി യാത്രകൾ പ്ലാൻ ചെയ്യുന്നത് തിരക്കുകൾ ഒഴിവാക്കാൻ സഹായിക്കും.
