വിമാനത്താവളങ്ങളിലെ യാത്രാ നിരീക്ഷണവും അതിർത്തി നിയന്ത്രണവും കൂടുതൽ വേഗത്തിലാക്കാൻ ദുബൈ താമസ കുടിയേറ്റ വകുപ്പിന്റെ നീക്കം.
ദുബൈ — ഓഗസ്റ്റ് 24, 2026:സർക്കാർ സേവനങ്ങൾ കൂടുതൽ വേഗത്തിലും സുതാര്യമായും ലഭ്യമാക്കുന്നതിനായി കൃത്രിമബുദ്ധിയുടെ അത്യാധുനിക സാധ്യതയായ ‘ഏജന്റിക് എഐ’ പ്രയോജനപ്പെടുത്താൻ ജിഡിആർഎഫ്എ ദുബൈ. ഡിജിറ്റൽ സൊല്യൂഷനുകളിലും ഡാറ്റാ അനലിറ്റിക്സിലും ആഗോള മുൻനിരക്കാരായ എസ്എഎസുമായി (SAS) സഹകരിച്ച് പുതിയ സാങ്കേതികവിദ്യകൾ നടപ്പാക്കാൻ ഇരു സ്ഥാപനങ്ങളും ധാരണയായി.
സഹകരണത്തിന്റെ ഭാഗമായി ജിഡിആർഎഫ്എ ദുബൈയുടെ ഉന്നതതല സംഘം എസ്എഎസ് കേന്ദ്രം സന്ദർശിച്ച് സാങ്കേതിക നിർദേശങ്ങൾ വിലയിരുത്തി. നൽകുന്ന നിർദ്ദേശങ്ങൾ സ്വയം മനസിലാക്കി, ആവശ്യമായ പ്രവർത്തനങ്ങൾ ആസൂത്രണം ചെയ്യാനും ഘട്ടംഘട്ടമായി നിർവ്വഹിക്കാനും ശേഷിയുള്ള സ്വയംപ്രേരിത എഐ സംവിധാനമാണ് ഏജന്റിക് എഐ. സങ്കീർണമായ നടപടിക്രമങ്ങൾ ലളിതമാക്കാനും വേഗത്തിൽ തീരുമാനങ്ങൾ കൈക്കൊള്ളാനും ഇത് സഹായിക്കും.
വിമാനത്താവളങ്ങളിൽ യാത്രക്കാരുടെ നീക്കം തത്സമയം വിശകലനം ചെയ്യുന്ന സംവിധാനങ്ങൾ, കടൽ രക്ഷാപ്രവർത്തനങ്ങൾക്കുള്ള എഐ ഡ്രോണുകൾ, ഡിജിറ്റൽ ട്വിൻ സാങ്കേതികവിദ്യ, ഇന്റലിജന്റ് നോളജ് ബേസുകൾ എന്നിവ ജിഡിആർഎഫ്എ സംഘം നേരിട്ടു കണ്ടു വിലയിരുത്തി. ഇവയുടെ പ്രായോഗിക സാധ്യതകൾ പരിശോധിച്ച ശേഷം ഘട്ടംഘട്ടമായി വിവിധ മേഖലകളിൽ നടപ്പിലാക്കും.
ഡിജിറ്റൽ പരിവർത്തനം കേവലം പുതിയ സാങ്കേതികവിദ്യകൾ സ്വീകരിക്കുന്നതിൽ മാത്രം ഒതുങ്ങുന്നതല്ലെന്ന് ജിഡിആർഎഫ്എ ദുബൈ ഡിജിറ്റൽ സർവീസസ് അസിസ്റ്റന്റ് ഡയറക്ടർ ജനറൽ കേണൽ എക്സ്പേർട്ട് ഖാലിദ് അഹമ്മദ് ബിൻ മാദിയ അൽ ഫലാസി വ്യക്തമാക്കി. ഭാവിയിലെ ആവശ്യങ്ങൾ മുൻകൂട്ടി തിരിച്ചറിഞ്ഞ് സർക്കാർ സേവനങ്ങൾ കൂടുതൽ കാര്യക്ഷമമാക്കുകയാണ് തങ്ങളുടെ ലക്ഷ്യമെന്നും അദ്ദേഹം കൂട്ടിച്ചേർത്തു.
പദ്ധതിയുടെ അടുത്ത ഘട്ടമായി തിരഞ്ഞെടുത്ത മേഖലകളിൽ പ്രൂഫ് ഓഫ് കോൺസെപ്റ്റ് (PoC) വികസിപ്പിക്കും. ഇതിനായി പ്രത്യേക ശിൽപശാലകൾ സംഘടിപ്പിച്ച് ആവശ്യങ്ങൾ തരംതിരിക്കും. വിജയകരമായി പൂർത്തിയാക്കുന്ന പദ്ധതികളുടെ ഫലങ്ങൾ ജിടെക്സ് ഗ്ലോബൽ 2026-ൽ (GITEX GLOBAL 2026) ഔദ്യോഗികമായി പ്രദർശിപ്പിക്കും.
