ദുബായ്: ഡിജിറ്റൽ സർക്കാർ സേവനരംഗത്തെ മികവിന് വീണ്ടും ശ്രദ്ധേയമായ അംഗീകാരം നേടി ജനറൽ ഡയറക്ടറേറ്റ് ഓഫ് ഐഡന്റിറ്റി
ആൻഡ് ഫോറിനേഴ്സ് അഫയേഴ്സ്–ദുബായ് (GDRFA Dubai). ഹംദാൻ ബിൻ മുഹമ്മദ് പ്രോഗ്രാം ഫോർ ഗവൺമെന്റ് സർവീസസിന്റെ ഭാഗമായി നടപ്പാക്കിയ ‘ഡൊമസ്റ്റിക് വർക്കർ മാനേജ്മെന്റ്’ സംരംഭത്തിനാണ് ‘ബെസ്റ്റ് ഡിജിറ്റൽ സിറ്റി എക്സ്പീരിയൻസ്’ പുരസ്കാരം ലഭിച്ചത്. വിവിധ സർക്കാർ സ്ഥാപനങ്ങളുടെ ഏകോപനത്തിലൂടെ ഗാർഹിക തൊഴിലാളി സേവനങ്ങളെ സമഗ്രവും തടസ്സരഹിതവുമായ ഡിജിറ്റൽ അനുഭവമാക്കി മാറ്റിയ പദ്ധതിക്കാണ് ഈ അംഗീകാരം.
പുരസ്കാരനേട്ടത്തിൽ പ്രതികരിച്ച ജിഡിആർഎഫ്എ ദുബായ് ഡയറക്ടർ ജനറൽ ലഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി, യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിനും, ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയും ദുബായ് എക്സിക്യൂട്ടീവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിനും നന്ദിയും കടപ്പാടും രേഖപ്പെടുത്തി.
ദുബായെ സർക്കാർ മികവിന്റെ ആഗോള മാതൃകയാക്കി ഉയർത്തുകയും, ജനങ്ങളുടെ ജീവിതനിലവാരം മെച്ചപ്പെടുത്തുന്ന ഭാവിദർശന സേവനങ്ങൾ വികസിപ്പിക്കുകയും ചെയ്ത ശൈഖ് മുഹമ്മദ് ബിൻ റാഷിദിന്റെ ദീർഘവീക്ഷണമാണ് ഈ നേട്ടങ്ങളുടെ അടിത്തറയെന്ന് അദ്ദേഹം പറഞ്ഞു. സർക്കാർ സേവനങ്ങളെ കൂടുതൽ സമഗ്രവും മുൻകൂട്ടി ചിന്തിക്കുന്നതുമായ ഡിജിറ്റൽ അനുഭവമാക്കി മാറ്റുന്നതിൽ ശൈഖ് ഹംദാൻ ബിൻ മുഹമ്മദിന്റെ തുടർച്ചയായ പിന്തുണയും നിർണായക പങ്കുവഹിച്ചുവെന്നും അദ്ദേഹം കൂട്ടിച്ചേർത്തു.
ദുബായ് ഹെൽത്ത്, യുഎഇ മാനവവിഭവശേഷി-എമിറേറ്റൈസേഷൻ മന്ത്രാലയം (MOHRE), ഡിജിറ്റൽ ദുബായ്, ദുബായ് ഇൻഷുറൻസ് എന്നിവയുടെ സംയോജിത പ്രവർത്തനഫലമായാണ് ഗാർഹിക തൊഴിലാളി നിയമനവുമായി ബന്ധപ്പെട്ട മുഴുവൻ നടപടിക്രമങ്ങളും ഒരൊറ്റ ഡിജിറ്റൽ സേവനയാത്രയായി മാറിയത്. അപേക്ഷ സമർപ്പിക്കൽ, സർക്കാർ അനുമതികൾ, ആരോഗ്യപരിശോധന, ഇൻഷുറൻസ്, തൊഴിൽ നടപടിക്രമങ്ങൾ തുടങ്ങി വിവിധ സേവനങ്ങൾ ഒരേ ഡിജിറ്റൽ പ്ലാറ്റ്ഫോമിൽ ഏകോപിപ്പിച്ചതിലൂടെ ഉപഭോക്താക്കൾക്ക് വേഗത്തിലും ലളിതമായും കാര്യക്ഷമമായും സേവനങ്ങൾ ലഭ്യമാക്കാൻ സാധിച്ചു. സർക്കാർ വകുപ്പുകൾ തമ്മിലുള്ള ഏകോപനം ശക്തിപ്പെടുത്തുകയും സേവനസമയം ഗണ്യമായി കുറയ്ക്കുകയും ഉപഭോക്തൃ അനുഭവം കൂടുതൽ മെച്ചപ്പെടുത്തുകയും ചെയ്ത മാതൃകാപരമായ സംരംഭമായാണ് പദ്ധതിയെ വിലയിരുത്തിയത്.
ഈ അംഗീകാരം ഒരു പുരസ്കാരം മാത്രമല്ലെന്നും, ഉപഭോക്താക്കൾക്ക് ഓരോ ഘട്ടത്തിലും ലഭിക്കുന്ന ലാളിത്യവും വിശ്വാസ്യതയും കാര്യക്ഷമതയുമാണ് ഒരു സ്ഥാപനത്തിന്റെ യഥാർഥ പ്രശസ്തി നിർണയിക്കുന്നതെന്ന വിശ്വാസത്തിൽ അധിഷ്ഠിതമായ ജിഡിആർഎഫ്എയുടെ ദീർഘകാല യാത്രയുടെ അംഗീകാരമാണെന്നും അൽ മർറി പറഞ്ഞു.
ഡിജിറ്റൽ പരിവർത്തനത്തെ യാഥാർഥ്യഫലങ്ങളാക്കി മാറ്റുന്നതിൽ ജിഡിആർഎഫ്എ ദുബായ് കൈവരിച്ച നേതൃത്വത്തിന്റെ തെളിവാണ് ഈ പുരസ്കാരമെന്ന് അദ്ദേഹം ചൂണ്ടിക്കാട്ടി. നടപടിക്രമങ്ങളെ കേന്ദ്രീകരിക്കുന്നതിനു പകരം മനുഷ്യകേന്ദ്രിത സമീപനത്തിലൂടെ സേവനങ്ങൾ പുനർരൂപകൽപ്പന ചെയ്യുകയും വിവിധ സർക്കാർ സ്ഥാപനങ്ങളുടെ ഏകോപനത്തിലൂടെ സമയം ലാഭിക്കുന്ന ഏകീകൃത സേവനാനുഭവം സൃഷ്ടിക്കുകയും ചെയ്തതിന്റെ അംഗീകാരമാണ് ഈ നേട്ടമെന്നും അദ്ദേഹം പറഞ്ഞു.
ആർട്ടിഫിഷ്യൽ ഇന്റലിജൻസ്, ബയോമെട്രിക് സാങ്കേതികവിദ്യ, സ്മാർട്ട് ബോർഡർ മാനേജ്മെന്റ്, ഏകീകൃത ഡിജിറ്റൽ സേവനങ്ങൾ എന്നിവ പ്രയോജനപ്പെടുത്തി കുടിയേറ്റ-അതിർത്തി സേവനങ്ങളിലും ഉപഭോക്തൃ സേവനങ്ങളിലും കഴിഞ്ഞ വർഷങ്ങളായി ജിഡിആർഎഫ്എ ദുബായ് കൈവരിച്ച മുന്നേറ്റങ്ങളുടെ തുടർച്ചയായാണ് പുതിയ പുരസ്കാരം. ഡിജിറ്റൽ സംയോജനത്തെ സമൂഹത്തിന് സ്ഥിരതയുള്ള മൂല്യമായി മാറ്റുന്ന സേവന നവീകരണത്തിനുള്ള പ്രതിബദ്ധതയാണ് ഈ അംഗീകാരം കൂടുതൽ ശക്തിപ്പെടുത്തുന്നതെന്നും അദ്ദേഹം വ്യക്തമാക്കി.
ജിഡിആർഎഫ്എയിലെ എല്ലാ ജീവനക്കാരെയും സഹപങ്കാളി സ്ഥാപനങ്ങളെയും അഭിനന്ദിച്ച അൽ മർറി, ‘വൺ ടീം’ എന്ന കൂട്ടായ പ്രവർത്തന സംസ്കാരത്തിന്റെ വിജയമാണ് ഈ അംഗീകാരമെന്നും, ദുബായുടെ ആഗോള പ്രശസ്തിക്കൊത്ത സർക്കാർ സേവനങ്ങൾ സൃഷ്ടിക്കുന്നത് കൂട്ടായ പരിശ്രമത്തിന്റെയും ഏകീകൃത കാഴ്ചപ്പാടിന്റെയും ഫലമാണെന്നും കൂട്ടിച്ചേർത്തു.
