ദുബൈ: ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം ഇന്ന് ജബൽ അലി തുറമുഖം സന്ദർശിച്ച് ഡിപി വേൾഡ് ടീമുമായി കൂടിക്കാഴ്ച നടത്തി. തുറമുഖത്തിന്റെ പ്രവർത്തന കാര്യക്ഷമതയും റെയിൽ–റോഡ് ചരക്ക് ഗതാഗത വികസന പദ്ധതികളും അദ്ദേഹം വിലയിരുത്തി.
ജബൽ അലി റെയിൽ ടെർമിനൽ പദ്ധതിയുടെ ഭാഗമായി ഭാവിയിൽ വർഷംതോറും 1.6 മില്യൺ TEU (Twenty-foot Equivalent Unit) കണ്ടെയ്‌നറുകൾ കൈകാര്യം ചെയ്യാനുള്ള ശേഷിയാണ് ലക്ഷ്യമിടുന്നതെന്ന് അധികൃതർ അറിയിച്ചു. കഴിഞ്ഞ രണ്ട് മാസത്തിനിടെ മാത്രം റോഡ്, റെയിൽ ചരക്ക് ഗതാഗത മാർഗങ്ങളിലൂടെ 2 ലക്ഷത്തിലധികം കണ്ടെയ്‌നറുകൾ കൈകാര്യം ചെയ്തതായും റിപ്പോർട്ടുണ്ട്.
ലോക വ്യാപാരത്തിന്റെ ഏകദേശം 10 ശതമാനം ചരക്ക് നീക്കങ്ങൾക്ക് പിന്തുണ നൽകുന്ന ഡിപി വേൾഡ് ഇന്ന് ആറു ഭൂഖണ്ഡങ്ങളിലായി 80 രാജ്യങ്ങളിൽ പ്രവർത്തനം വ്യാപിപ്പിച്ചിരിക്കുകയാണ്.
“ആഗോള പങ്കാളിത്തങ്ങളും സമ്പന്നമായ പരിചയസമ്പത്തും കൈവശമുള്ള ഡിപി വേൾഡിന് ഏത് വെല്ലുവിളിയും അതിജീവിച്ച് വളർച്ചയും നവീകരണവും തുടരാനാകുമെന്ന് ഞങ്ങൾക്ക് ആത്മവിശ്വാസമുണ്ട്,” എന്ന് ഷെയ്ഖ് ഹംദാൻ ബിൻ മുഹമ്മദ് വ്യക്തമാക്കി.
ജബൽ അലിയെ ആഗോള ലോജിസ്റ്റിക്സ് ഭൂപടത്തിലെ കൂടുതൽ ശക്തമായ കേന്ദ്രമാക്കുന്നതിൽ റെയിൽ–റോഡ് ഗതാഗത വികസന പദ്ധതികൾ നിർണായകമാകുമെന്ന് അധികൃതർ ചൂണ്ടിക്കാട്ടി.
