പരീക്ഷണ ഘട്ടം വിജയകരമായി പൂർത്തിയായതിനെ തുടർന്ന് ദുബായ് മാരിന, ജെ.എൽ.ടി ഉൾപ്പെടെയുള്ള പ്രമുഖ ഇടങ്ങളിലേക്ക് സേവനം വിപുലീകരിച്ചു.
ദുബായ്:ദുബായിലെ ഡെലിവറി മേഖലയിൽ ഇ-ബൈക്കുകളുടെ ഉപയോഗം പ്രോത്സാഹിപ്പിക്കുന്ന പദ്ധതി ഏഴ് പുതിയ പ്രദേശങ്ങളിലേക്ക് കൂടി വിപുലീകരിച്ച് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ.ടി.എ). കഴിഞ്ഞ ഫെബ്രുവരിയിൽ നാല് മേഖലകളിൽ ആരംഭിച്ച പരീക്ഷണ ഘട്ടം വിജയകരമായതിനെ തുടർന്നാണ് തീരുമാനം.
അൽ തവാർ 1, അൽ തവാർ 2, അൽ ഖുസൈസ് 1, ശൈഖ് മുഹമ്മദ് ബിൻ റാഷിദ് ബൊളിവാർഡ്, ദുബായ് മീഡിയ സിറ്റി, ജുമൈറ ലേക്ക് ടവേഴ്‌സ് (ജെ.എൽ.ടി), ദുബായ് മാരിന എന്നിവയാണ് പുതിയതായി ഉൾപ്പെടുത്തിയ പ്രദേശങ്ങൾ. നേരത്തെ പരീക്ഷണാടിസ്ഥാനത്തിൽ പദ്ധതി ആരംഭിച്ച അൽ കരാമ, അൽ ഹമ്രിയ, ഉമ്മു ഹുറൈർ, അൽ മൻഖൂൽ എന്നീ പ്രദേശങ്ങൾക്ക് പുറമെയാണിത്.
ദുബായ് കൊമേഴ്‌സ്യൽ ആൻഡ് ലോജിസ്റ്റിക്‌സ് ലാൻഡ് ട്രാൻസ്‌പോർട്ട് സ്ട്രാറ്റജി 2030, ഫസ്റ്റ് ആൻഡ് ലാസ്റ്റ്-മൈൽ സ്ട്രാറ്റജി എന്നിവയുടെ ഭാഗമായാണ് ആർ.ടി.എ പദ്ധതി നടപ്പിലാക്കുന്നത്. ഹരിത ഗതാഗതം പ്രോത്സാഹിപ്പിക്കുക, പ്രവർത്തനച്ചെലവ് കുറയ്ക്കുക, സുരക്ഷാ മാനദണ്ഡങ്ങൾ ഉറപ്പാക്കി സേവനങ്ങൾ ആധുനികീകരിക്കുക എന്നിവയാണ് ഇതിലൂടെ ലക്ഷ്യമിടുന്നത്.
സൈക്കിൾ ട്രാക്കുകളുടെ ലഭ്യത, വാണിജ്യ സ്ഥാപനങ്ങളുടെയും റെസ്റ്റോറന്റുകളുടെയും സാമീപ്യം, ഉയർന്ന ആവശ്യകത എന്നിവ പരിഗണിച്ചാണ് പുതിയ പ്രദേശങ്ങൾ തിരഞ്ഞെടുത്തത്. പൊതുജനസുരക്ഷ ഉറപ്പാക്കാൻ സ്വകാര്യ ഡെലിവറി ഓപ്പറേറ്റർമാരുമായി സഹകരിച്ചാണ് പദ്ധതി നടപ്പിലാക്കുന്നത്.
പരീക്ഷണ ഘട്ടത്തിൽ പദ്ധതിക്ക് 99 ശതമാനം ഉപഭോക്തൃ സംതൃപ്തിയും 90 ശതമാനത്തിലധികം ഡെലിവറി റൈഡർമാരുടെ സംതൃപ്തിയും രേഖപ്പെടുത്തിയതായി ആർ.ടി.എ അറിയിച്ചു. ഡെലിവറി മേഖലയിലെ ദ്രുതഗതിയിലുള്ള വളർച്ച കണക്കിലെടുത്ത് സുരക്ഷയും ഗുണനിലവാരവും ഉറപ്പാക്കാൻ കർശനമായ നിയമനിർമ്മാണങ്ങളും ലൈസൻസിങ് മാനദണ്ഡങ്ങളുമാണ് അതോറിറ്റി നടപ്പിലാക്കിവരുന്നത്.
