ദുബായ്: ആഗോളതാപനത്തിനെതിരെയുള്ള പോരാട്ടത്തിൽ പങ്കുചേർന്ന് പ്രമുഖ പാക്കേജിംഗ് നിർമാതാക്കളായ ഹോട്ട്പാക്ക് ഗ്രൂപ്പ്. അജ്മാനിലെ അൽസോറ കണ്ടൽക്കാട് റിസർവിൽ നടന്ന വിപുലമായ കണ്ടൽ നടീൽ യജ്ഞത്തിൽ യുഎഇയുടെ വിവിധ ഭാഗങ്ങളിൽ നിന്നുള്ള നൂറുകണക്കിന് ജീവനക്കാരാണ് പങ്കാളികളായത്. പരിസ്ഥിതി സംരക്ഷണത്തോടുള്ള കമ്പനിയുടെ സാമൂഹിക പ്രതിബദ്ധത വിളിച്ചോതുന്നതായിരുന്നു ‘ഹോട്ട്പാക്ക് ഹാപ്പിനസ്’ പദ്ധതിയുടെ ഭാഗമായി സംഘടിപ്പിച്ച ഈ പരിപാടി. കേവലമൊരു വൃക്ഷത്തൈ നടീൽ എന്നതിലുപരി, ഭാവി തലമുറയ്ക്കായി പ്രകൃതിയെ കരുതിവെക്കാനുള്ള സുസ്ഥിരമായ ഒരു ദൗത്യമാണിതെന്ന് അധികൃതർ വ്യക്തമാക്കി.
ദുബായ് ആസ്ഥാനമായ ‘കമ്പനീസ് ഫോർ ഗുഡ്’ എന്ന പ്രസ്ഥാനവുമായി സഹകരിച്ചാണ് ഹോട്ട്പാക്ക് ഈ സംരംഭം നടപ്പിലാക്കിയത്. കോർപ്പറേറ്റ് ഉത്തരവാദിത്തവും ജീവനക്കാരുടെ ക്ഷേമവും ഒത്തുചേരുമ്പോൾ അത് പ്രകൃതിക്ക് എപ്രകാരം ഗുണകരമാകുമെന്ന് ഈ യജ്ഞം തെളിയിച്ചതായി ഹോട്ട്പാക്ക് ഗ്രൂപ്പ് സിഇഒയും മാനേജിംഗ് ഡയറക്ടറുമായ അബ്ദുൽ ജബ്ബാർ പറഞ്ഞു. രാഷ്ട്രപിതാവ് ശൈഖ് സായിദ് ബിൻ സുൽത്താൻ അൽ നഹ്യാന്റെ പരിസ്ഥിതി ദർശനത്തോടുള്ള ആദരസൂചകമായാണ് ഈ പരിപാടി സംഘടിപ്പിച്ചത്. സുസ്ഥിരമായ പ്രവർത്തനങ്ങൾ ഹോട്ട്പാക്കിന്റെ അടിസ്ഥാന മൂല്യങ്ങളിൽ ഒന്നാണെന്നും അദ്ദേഹം കൂട്ടിച്ചേർത്തു.
സിഎസ്ആർ (CSR) പ്രവർത്തനങ്ങളുടെ മുഖ്യ അജണ്ടയായി കണ്ടൽ സംരക്ഷണത്തെ മാറ്റാനാണ് കമ്പനി ലക്ഷ്യമിടുന്നത്. ആദ്യ ഘട്ടമായി നടപ്പിലാക്കിയ ഈ പദ്ധതി വരും വർഷങ്ങളിലും തുടരുമെന്ന് ഗ്രൂപ്പ് സിഒഒ സൈനുദീൻ പി.ബി. വ്യക്തമാക്കി. സുരക്ഷാ സജ്ജീകരണങ്ങളോടെ കായക്കുകളിലും ഡ്രാഗൺ ബോട്ടുകളിലുമായി റിസർവിന്റെ ഉൾഭാഗത്തെ പ്രത്യേക സ്ഥലങ്ങളിലെത്തിയാണ് ജീവനക്കാർ തൈകൾ നട്ടുപിടിപ്പിച്ചത്. ജോലിസ്ഥലത്തിന് പുറമെ പ്രകൃതിയുമായി ഇണങ്ങിച്ചേരാനുള്ള ഈ അവസരം ജീവനക്കാർക്ക് വലിയൊരു പഠനാനുഭവമായിരുന്നുവെന്ന് സിടിഒ അൻവർ പി.ബി. അഭിപ്രായപ്പെട്ടു.
സാധാരണ ഉഷ്ണമേഖലാ വനങ്ങളെക്കാൾ കൂടുതൽ കാർബൺ ഡൈഓക്സൈഡ് ആഗിരണം ചെയ്യാൻ ശേഷിയുള്ളവയാണ് കണ്ടൽക്കാടുകൾ. തീരദേശ സംരക്ഷണത്തിലും ജൈവവൈവിധ്യം നിലനിർത്തുന്നതിലും ഇവ നിർണായക പങ്കുവഹിക്കുന്നു. യുഎഇയുടെ തീരപ്രദേശങ്ങളിൽ 150 ചതുരശ്ര കിലോമീറ്ററിലധികം വ്യാപിച്ചുകിടക്കുന്ന ഈ വനങ്ങൾ നഗരങ്ങളുടെ ‘പച്ച ശ്വാസകോശമായി’ (Green Lung) അറിയപ്പെടുന്നു. ഒരു പൂർണ്ണ വളർച്ചയെത്തിയ കണ്ടൽ വൃക്ഷത്തിന് പ്രതിവർഷം 12.3 കിലോഗ്രാം കാർബൺ ആഗിരണം ചെയ്യാൻ കഴിയുമെന്നിരിക്കെ, ഹോട്ട്പാക്കിന്റെ ഈ സംരംഭം കാലാവസ്ഥാ വ്യതിയാനത്തിനെതിരെയുള്ള പോരാട്ടത്തിൽ വലിയൊരു ചുവടുവെപ്പാണ്.
