ആയിരത്തെണ്ണൂറ്റമ്പതടി ഉയരത്തിൽ ഇന്ത്യൻ, യുഎഇ ദേശീയ പതാകകൾ ഉയർത്തി നൂറിലധികം പ്രവാസികൾ.
അജ്മാൻ, യു.എ.ഇ:ഇന്ത്യയുടെ 80-ാം സ്വാതന്ത്ര്യദിനാഘോഷങ്ങളുടെ ഭാഗമായി അജ്മാനിലെ മസ്ഫൂത് മലനിരകൾ കീഴടക്കി പ്രവാസി സാഹസിക കൂട്ടായ്മയായ ‘എ4 അഡ്വഞ്ചർ’. പുലർച്ചെ നടത്തിയ പ്രത്യേക ട്രെക്കിംഗിനൊടുവിൽ സമുദ്രനിരപ്പിൽ നിന്ന് 1,850 അടി ഉയരത്തിൽ ഇന്ത്യൻ ദേശീയ പതാകയും യുഎഇ ദേശീയ പതാകയും അംഗങ്ങൾ ഒന്നിച്ചുയർത്തി.
ആഘോഷങ്ങളുടെ ഭാഗമായി പുലർച്ചെ നാല് മണിയോടെയാണ് നൂറിലധികം വരുന്ന സംഘം മലകയറ്റം ആരംഭിച്ചത്. ഇരു രാജ്യങ്ങളും തമ്മിലുള്ള സുദൃഢമായ ബന്ധവും സൗഹൃദവും വിളിച്ചോതിക്കൊണ്ടാണ് പർവതമുകളിൽ ദേശീയ പതാകകൾ പാറിച്ചത്.
ട്രെക്കിംഗിന് ശേഷം മലയടിവാരത്തിൽ പ്രത്യേകം തയ്യാറാക്കിയ വേദിയിൽ സ്വാതന്ത്ര്യദിന സന്ദേശം, പ്രതിജ്ഞ, ക്വിസ് മത്സരങ്ങൾ, കുടുംബങ്ങൾക്കും കുട്ടികൾക്കുമായുള്ള വിവിധ പരിപാടികൾ എന്നിവ സംഘടിപ്പിച്ചു.
പ്രവാസി സമൂഹത്തിനിടയിൽ ഐക്യവും സാഹോദര്യവും വളർത്താൻ ഇത്തരം കൂട്ടായ്മകൾക്ക് സാധിക്കുമെന്ന് എ4 അഡ്വഞ്ചർ സ്ഥാപകൻ ഹരി നോർത്ത് കൊട്ടച്ചേരി സ്വാതന്ത്ര്യദിന സന്ദേശത്തിൽ പറഞ്ഞു. സാഹസിക യാത്രകളിലൂടെ ജനങ്ങളെ ഒന്നിപ്പിക്കാനും നല്ല സൗഹൃദങ്ങൾ കെട്ടിപ്പടുക്കാനും കഴിയുമെന്നും അദ്ദേഹം കൂട്ടിച്ചേർത്തു.
ചടങ്ങുകൾക്ക് ഹരി നോർത്ത്, ജിബ്സ്, അഖിൽ, വിഷ്ണു എന്നിവരും എ4 അഡ്വഞ്ചർ ടീം അംഗങ്ങളും നേതൃത്വം നൽകി. കുട്ടികളും മുതിർന്നവരും അടക്കം നൂറിലധികം പേരാണ് പരിപാടിയിൽ പങ്കെടുത്തത്. അജ്മാന്റെ അതിർത്തി ഗ്രാമമായ മസ്ഫൂത് നിലവിൽ നിരവധി ട്രെക്കിംഗ് പ്രേമികളാണ് സന്ദർശിക്കുന്നത്.
