പ്രവാസികൾ നേരിടുന്ന പ്രധാന നിയമപ്രശ്നങ്ങളും പരിഹാരങ്ങളും പ്രതിപാദിക്കുന്ന പുസ്തകം രചിച്ചത് സുപ്രീം കോടതി അഭിഭാഷകൻ ഡോ. ജോസ് എബ്രഹാം.
ഷാർജ, യു.എ.ഇ — പ്രവാസി ലീഗൽ സെൽ ഗ്ലോബൽ പ്രസിഡന്റും സുപ്രീം കോടതി അഡ്വക്കറ്റ് ഓൺ റെക്കോർഡുമായ ഡോ. ജോസ് എബ്രഹാം രചിച്ച ‘ലീഗൽ ലാൻഡ്സ്കേപ്പ് ഓഫ് ഗ്ലോബൽ ഇന്ത്യൻസ്’ എന്ന പുസ്തകം ഷാർജ രാജ്യാന്തര പുസ്തകമേളയിൽ പ്രകാശനം ചെയ്തു. മുൻ അംബാസിഡർ ടി.പി. ശ്രീനിവാസനാണ് പുസ്തകത്തിന് ആമുഖം എഴുതിയിരിക്കുന്നത്.
എൻ.ടി.വി ചെയർമാൻ മാത്തുക്കുട്ടി കടോൺ, പ്രവാസി ലീഗൽ സെൽ ദുബായ് ചാപ്റ്റർ അധ്യക്ഷൻ ടി.എൻ. കൃഷ്ണകുമാർ, അക്കാഫ് (AKCAF) അധ്യക്ഷൻ പോൾ ടി. ജോസഫ് എന്നിവർക്ക് ആദ്യ പ്രതി നൽകിയാണ് പ്രകാശന കർമ്മം നിർവഹിച്ചത്. പ്രവാസി ലീഗൽ സെൽ ഷാർജ-അജ്മാൻ ചാപ്റ്റർ ജനറൽ സെക്രട്ടറി അൽനിഷാജ് ഷാഹുൽ, ഡൽഹിയിലെ മുതിർന്ന മാധ്യമപ്രവർത്തകൻ മെൽവിൻ വില്യംസ് എന്നിവർ ചടങ്ങിൽ ആശംസകൾ നേർന്നു.


പ്രവാസ മേഖലയിലെ ഇരുപത് വർഷത്തോളമുള്ള നിയമപരിചയത്തിന്റെ അടിസ്ഥാനത്തിലാണ് ഈ പുസ്തകം തയ്യാറാക്കിയതെന്ന് ഡോ. ജോസ് എബ്രഹാം വ്യക്തമാക്കി. ഒ.സി.ഐ (OCI) കാർഡ്, എൻ.ആർ.ഐ വിവാഹ രജിസ്ട്രേഷൻ, വിവാഹമോചന നടപടികൾ, വിൽപത്രം തയ്യാറാക്കൽ, വിവിധതരം പവർ ഓഫ് അറ്റോർണികൾ, വിദേശ കോടതി വിധികളുടെ നടപ്പാക്കൽ (Execution of Foreign Judgments) തുടങ്ങിയ പ്രവാസികൾക്ക് ഏറെ ഉപകാരപ്രദമായ വിഷയങ്ങളാണ് പുസ്തകത്തിൽ ഉൾപ്പെടുത്തിയിരിക്കുന്നത്.
ഇതുവരെ പത്തിലധികം പുസ്തകങ്ങൾ രചിച്ചിട്ടുള്ള ഡോ. ജോസ് എബ്രഹാമിനെ നിയമപുസ്തക രചനയ്ക്കുള്ള മികവിന് സുപ്രീം കോടതി ചീഫ് ജസ്റ്റിസ് പുരസ്കാരം നൽകി ആദരിച്ചിട്ടുണ്ട്. പ്രവാസികളെ നിയമപരമായി കൂടുതൽ ശാക്തീകരിക്കാൻ പുതിയ പുസ്തകത്തിന് സാധിക്കട്ടെയെന്ന് പ്രവാസി ലീഗൽ സെൽ ദുബായ് ചാപ്റ്റർ പ്രസിഡന്റ് ടി.എൻ. കൃഷ്ണകുമാർ പത്രക്കുറിപ്പിലൂടെ ആശംസിച്ചു.










