തിരുവനന്തപുരം ∙ മുതിർന്ന സിപിഐ നേതാവും വൈക്കം മുൻ എംഎൽഎയുമായ കെ. അജിത്ത് ബിജെപിയിൽ ചേർന്നു. ബിജെപി സംസ്ഥാന ആസ്ഥാനമായ മാരാർജി ഭവനിൽ നടന്ന ചടങ്ങിൽ സംസ്ഥാന അധ്യക്ഷൻ രാജീവ് ചന്ദ്രശേഖരിൽ നിന്ന് അജിത്ത് അംഗത്വം ഏറ്റുവാങ്ങി. 2006, 2011 വർഷങ്ങളിൽ വിജയിച്ച് തുടർച്ചയായി രണ്ടുതവണ വൈക്കം മണ്ഡലത്തെ പ്രതിനിധീകരിച്ച എംഎൽഎയായിരുന്നു അജിത്ത്.
സിപിഐ വൈക്കം മണ്ഡലം കമ്മിറ്റി അസിസ്റ്റന്റ് സെക്രട്ടറിയായും കോട്ടയം ജില്ലാ കൗൺസിൽ അംഗമായും പ്രവർത്തിച്ചു വരികയായിരുന്നു അദ്ദേഹം. പെട്ടെന്നെടുത്ത തീരുമാനമല്ല ബിജെപി പ്രവേശമെന്ന് അജിത്ത് വ്യക്തമാക്കി. ദളിത് വിഭാഗങ്ങൾക്ക് സർക്കാർ നൽകേണ്ട അർഹമായ ആനുകൂല്യങ്ങൾ ലഭിക്കുന്നില്ലെന്നും, അവ നേടിയെടുക്കാൻ പ്രതിപക്ഷത്തിനും സാധിച്ചിട്ടില്ലെന്നും അദ്ദേഹം ആരോപിച്ചു. സിപിഐ നേതൃത്വത്തോട് ആറുമാസം മുമ്പ് തന്നെ അതൃപ്തി അറിയിച്ചിരുന്നുവെങ്കിലും കാര്യമായ നടപടിയൊന്നും ഉണ്ടായില്ലെന്നും അജിത്ത് പറഞ്ഞു.
ഇതിനിടെ, ബിഗ് ബോസ് താരം റോബിൻ രാധാകൃഷ്ണനും ബിജെപി അംഗത്വം സ്വീകരിച്ചു. ചടങ്ങിൽ ബിജെപി സംസ്ഥാന ജനറൽ സെക്രട്ടറി എസ്. സുരേഷ്, എൻഡിഎ ഉപാധ്യക്ഷൻ എ.എൻ. രാധാകൃഷ്ണൻ, ബിജെപി സംസ്ഥാന ഉപാധ്യക്ഷൻ കെ. സോമൻ എന്നിവർ പങ്കെടുത്തു.
Former CPI leader and two-time Vaikom MLA K Ajith joined the BJP at the party’s state headquarters in Thiruvananthapuram. Bigg Boss star Robin Radhakrishnan also took BJP membership during the same event.
