കുവൈത്ത് സിറ്റി: കുവൈത്തിലെ സായുധ സേനാ ക്യാമ്പിന് നേരെയുണ്ടായ ആക്രമണത്തെ തുടർന്ന് ഗൾഫ് മേഖലയിൽ ആശങ്ക ഉയരുന്നു. സംഭവത്തിൽ പത്ത് സൈനികർക്ക് പരിക്കേറ്റതായി സ്ഥിരീകരിച്ചു.
ഈ പശ്ചാത്തലത്തിലാണ് ജി.സി.സി സെക്രട്ടറി ജനറൽ ജാസിം അൽ ബുദൈവി ശക്തമായ പ്രതികരണവുമായി രംഗത്തെത്തിയത്. കുവൈത്തിനും മറ്റ് ജി.സി.സി രാജ്യങ്ങൾക്കും എതിരായ ഇറാന്റെ ശത്രുതാപരമായ നിലപാടിന്റെ വ്യക്തമായ തെളിവാണ് ഈ ആക്രമണമെന്നാണ് അദ്ദേഹം പ്രസ്താവനയിൽ വ്യക്തമാക്കിയത്.
അതേസമയം, ഈ നടപടി കുവൈത്തിന്റെ പരമാധികാരത്തിന്മേലുള്ള ഗുരുതരമായ ലംഘനമാണെന്നും സൈനിക സ്ഥാപനങ്ങളെ നേരിട്ട് ലക്ഷ്യമിട്ട അപകടകരമായ നീക്കമാണെന്നും അദ്ദേഹം ചൂണ്ടിക്കാട്ടി. ഇതോടെ മേഖലയിൽ സുരക്ഷയും സ്ഥിരതയും ഗുരുതരമായി ബാധിക്കപ്പെടാൻ സാധ്യതയുണ്ടെന്ന ആശങ്കയും ഉയരുന്നു.
ഇതിനൊപ്പം, പരിക്കേറ്റ സൈനികർ വേഗത്തിൽ സുഖം പ്രാപിക്കട്ടെയെന്നും കുവൈത്ത് ജനതയുടെ സുരക്ഷക്കും ക്ഷേമത്തിനും ആശംസകൾ നേർന്നതായും അൽ ബുദൈവി പറഞ്ഞു.
കൂടാതെ, ബാഹ്യ ഭീഷണികളിൽ നിന്ന് അംഗരാജ്യങ്ങളെ സംരക്ഷിക്കാനും മേഖലയിൽ സമാധാനവും സ്ഥിരതയും നിലനിർത്താനും ജി.സി.സി പ്രതിബദ്ധമാണെന്നും അദ്ദേഹം വ്യക്തമാക്കി.
