ദുബൈ: കുവൈത്തിന്റെ ദേശീയദിനാഘോഷങ്ങളുടെ ഭാഗമായി ദുബൈ അന്താരാഷ്ട്ര വിമാനത്താവളത്തിൽ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (GDRFA) ദുബൈയുടെ നേതൃത്വത്തിൽ പ്രത്യേക സ്വീകരണപരിപാടികൾ സംഘടിപ്പിച്ചു. യു.എ.ഇയും കുവൈത്തും തമ്മിലുള്ള സഹോദരബന്ധത്തിന്റെ ദൃഢതയും സൗഹൃദവും വിളിച്ചോതുന്നതായിരുന്നു പരിപാടികൾ.
വിമാനത്താവളത്തിലെത്തിയ കുവൈത്ത് യാത്രക്കാരെ ദേശീയപതാക നൽകി സ്നേഹപൂർവ്വം വരവേറ്റു. സ്മാർട്ട് ഗേറ്റുകൾ കുവൈത്ത് ദേശീയപതാകയുടെ നിറങ്ങളിൽ അലങ്കരിച്ചും പ്രത്യേക പ്രവേശനപാത ഒരുക്കിയും ആഘോഷഭാവം സൃഷ്ടിച്ചു. യാത്രക്കാരുടെ പാസ്പോർട്ടിൽ ദേശീയദിനത്തിന്റെ ഭാഗമായി പ്രത്യേക സ്മാരക സ്റ്റാമ്പ് പതിക്കുകയും പ്രതീകാത്മക സമ്മാനങ്ങൾ വിതരണം ചെയ്യുകയും ചെയ്തു.
കുട്ടികൾക്കായി ‘സാലം’ , ‘സലാമ’ എന്നീ കഥാപാത്രങ്ങളുടെ സാന്നിധ്യം ആഘോഷത്തിന് നിറവും ഉല്ലാസവും പകർന്നു. കുടുംബങ്ങളുമായി എത്തിയ യാത്രക്കാരും പരിപാടിയിൽ പങ്കുചേർന്നു സന്തോഷം പങ്കിട്ടു.
എമിറേറ്റ്സ് ഇന്റഗ്രേറ്റഡ് ടെലികമ്മ്യൂണിക്കേഷൻസ് കമ്പനി (du) യുമായി സഹകരിച്ചാണ് ജിഡിആർഎഫ്എ ദുബൈ പരിപാടി സംഘടിപ്പിച്ചത്. സൗഹൃദം, ഐക്യദാർഢ്യം, പരസ്പര ആദരവ് എന്നീ മൂല്യങ്ങൾ ഇരുരാജ്യങ്ങളുടെയും ജനങ്ങൾ തമ്മിൽ ശക്തമായി നിലനിൽക്കുന്നതിന്റെ പ്രതീകമാണ് ഈ ആഘോഷമെന്ന് അധികൃതർ വ്യക്തമാക്കി.
ദുബൈ വിമാനത്താവളത്തിലെ ഈ പ്രത്യേക സ്വീകരണം, ഗൾഫ് രാജ്യങ്ങൾ തമ്മിലുള്ള സൗഹൃദബന്ധം കൂടുതൽ ശക്തിപ്പെടുത്തുന്ന സാംസ്കാരിക നിമിഷമായി മാറി.
English Summary
Dubai International Airport marked Kuwait’s National Day with a special reception organised by the General Directorate of Identity and Foreigners Affairs (GDRFA) Dubai. Kuwaiti passengers were welcomed with national flags, commemorative passport stamps, and symbolic gifts. Smart gates were illuminated in the colours of the Kuwaiti flag, and special entry lanes were arranged to honour the occasion. The event, organised in collaboration with du, highlighted the strong brotherly ties, unity, and mutual respect between the UAE and Kuwait.
