തിരുവനന്തപുരം: തിരുവനന്തപുരം ട്രിവാൻഡ്രം ക്ലബിന് മുന്നിൽ നടന്ന വാഹനാപകടത്തിൽ നടൻ മണിയൻപിള്ള രാജു ഓടിച്ച കാറിടിച്ച് രണ്ട് യുവാക്കൾക്ക് പരിക്കേറ്റതായി പരാതി. നിവേദിത് കൃഷ്ണയും സൂരജുമാണ് അപകടത്തിൽ പരിക്കേറ്റത്. ഇരുവരും സ്വകാര്യ ആശുപത്രികളിൽ ചികിത്സയിലാണ്.
ഇന്നലെ രാത്രി 10 മണിയോടെയായിരുന്നു സംഭവം. കെ.എൽ 01 സി.ജെ 04 നമ്പറിലുള്ള കാറാണ് അപകടത്തിൽപ്പെട്ടത്. അപകടശേഷം വാഹനം നിർത്താതെ പോയെന്നാണ് ആരോപണം.
ആദ്യമായി ലഭിച്ച വിവരങ്ങൾ പ്രകാരം സുധീർകുമാർ രാജുവാണ് വാഹനത്തിന്റെ ആർ.സി ഉടമസ്ഥൻ. നടന്റെ വാഹനമാണെന്നും ഡ്രൈവർ ആയിരിക്കാം വാഹനം ഓടിച്ചതെന്നുമായിരുന്നു പ്രാഥമിക സൂചനകൾ. എന്നാൽ ഇന്ന് രാവിലെ താൻ തന്നെയാണ് വാഹനം ഓടിച്ചതെന്ന് മണിയൻപിള്ള രാജു വ്യക്തമാക്കി.
സുബ്രമണ്യം ഹാളിലെ ഒരു ചടങ്ങിൽ പങ്കെടുത്ത് മടങ്ങുന്നതിനിടെയാണ് അപകടമുണ്ടായതെന്ന് അദ്ദേഹം പറഞ്ഞു. അപകടസമയത്ത് മദ്യപിച്ചിരുന്നില്ലെന്നും, ബൈക്ക് തന്റെ കാറിന്റെ പിന്നിലേക്ക് ഇടിക്കുകയായിരുന്നുവെന്നും അദ്ദേഹം അവകാശപ്പെട്ടു.
അപകടത്തിന് പിന്നാലെ മണിയൻപിള്ള രാജുവിന്റെ ഫോൺ സ്വിച്ച് ഓഫ് ആയിരുന്നുവെന്ന വിവരവും പുറത്തുവന്നു. കഴിഞ്ഞ രാത്രി തന്നെ പൊലീസ് അദ്ദേഹത്തെ അന്വേഷിച്ചെങ്കിലും കണ്ടെത്താനായിരുന്നില്ല. ഇന്ന് പൊലീസ് മുമ്പാകെ ഹാജരാകുമെന്നും അദ്ദേഹം അറിയിച്ചു. സംഭവത്തിൽ അന്വേഷണം തുടരുകയാണ്.
