യുദ്ധക്കെടുതികൾക്ക് ശേഷമുള്ള തിരിച്ചുവരവിന് രാജ്യങ്ങൾ തയാറാകണം; യാത്രാ കണക്റ്റിവിറ്റി അവശ്യ സേവനമായി കാണണമെന്ന് എടിഎം ഉച്ചകോടി.
ദുബായ്, സെപ്റ്റംബർ 16, 2026 : മിഡിൽ ഈസ്റ്റിലെ സംഘർഷാവസ്ഥകൾക്ക് അയവു വരുന്നതോടെ മേഖലയിലെ യാത്രാ-വിനോദസഞ്ചാര രംഗത്ത് വലിയ മുന്നേറ്റമുണ്ടാകുമെന്നും, ഇതിനായി വ്യോമയാന അടിസ്ഥാന സൗകര്യങ്ങളും ഡിജിറ്റൽ സംവിധാനങ്ങളും അടിയന്തരമായി ശക്തിപ്പെടുത്തണമെന്നും ദുബായിൽ നടക്കുന്ന അറേബ്യൻ ട്രാവൽ മാർക്കറ്റ് (എടിഎം 2026) ഉച്ചകോടിയിൽ വിദഗ്ദ്ധർ വ്യക്തമാക്കി.
ദുബായ് വേൾഡ് ട്രേഡ് സെന്ററിൽ നടക്കുന്ന മുപ്പത്തിമൂന്നാമത് എടിഎം ഉച്ചകോടിയിലാണ് മന്ത്രിമാരും എയർലൈൻ മേധാവികളും വ്യവസായ പ്രമുഖരും ഒത്തുചേർന്നത്. കോവിഡ് മഹാമാരിക്ക് ശേഷം ആഗോള യാത്രാരംഗം അപ്രതീക്ഷിത വേഗത്തിൽ കരകയറിയതുപോലെ, പശ്ചിമേഷ്യയിലെ നിലവിലെ പ്രതിസന്ധികൾ മാറുന്നതോടെ യാത്രാ ആവശ്യകതയിൽ വൻ കുതിച്ചുചാട്ടമുണ്ടാകുമെന്ന് ചർച്ചയിൽ പങ്കെടുത്തവർ ചൂണ്ടിക്കാട്ടി.
വ്യോമയാന ബന്ധം ഒരു ആഡംബരമല്ലെന്നും, മറിച്ച് ഏതൊരു രാജ്യത്തിന്റെയും അടിസ്ഥാന പശ്ചാത്തല സൗകര്യങ്ങളുടെ സുപ്രധാന തൂണാണെന്നും അറബ് എയർ കാരിയേഴ്സ് ഓർഗനൈസേഷൻ (AACO) സെക്രട്ടറി ജനറൽ അബ്ദുൽ വഹാബ് തെഫാഹ വ്യക്തമാക്കി. സർക്കാരുകൾ വ്യോമയാന മേഖലയെ അടിയന്തര പ്രാധാന്യത്തോടെ പരിഗണിക്കണമെന്നും അദ്ദേഹം ആവശ്യപ്പെട്ടു.
പശ്ചിമേഷ്യയിലെ അസ്ഥിരത മറ്റ് വിനോദസഞ്ചാര രാജ്യങ്ങളെയും ബാധിക്കുന്നുണ്ട്. സീഷെൽസിലേക്കുള്ള വിനോദസഞ്ചാരികളിൽ 60 ശതമാനത്തോളം പേരും ഗൾഫ് രാജ്യങ്ങളിലൂടെയാണ് യാത്ര ചെയ്യുന്നതെന്ന് സീഷെൽസ് ടൂറിസം-സാംസ്കാരിക മന്ത്രി നിക്കോള അമാൻഡ ബേൺസ്റ്റീൻ പറഞ്ഞു. മിഡിൽ ഈസ്റ്റിലെ സംഘർഷങ്ങൾ സർവീസുകളെ ബാധിച്ചപ്പോൾ പുതിയ വിപണികൾ കണ്ടെത്താനും എയർലൈൻ പങ്കാളിത്തം വൈവിധ്യവത്കരിക്കാനും രാജ്യം നിർബന്ധിതമായി.
പ്രതിസന്ധി ഘട്ടങ്ങളെ മറികടക്കാൻ കൃത്യമായ വിവര വിനിമയം അനിവാര്യമാണെന്ന് ലെബനൻ ടൂറിസം മന്ത്രി ലോറ എൽ ഖാസെൻ ലഹൂദ് പറഞ്ഞു. വിമാനക്കമ്പനികളും സർക്കാർ സംവിധാനങ്ങളും തമ്മിൽ തത്സമയ യാത്രാ വിവരങ്ങൾ കൈമാറുന്നത് സർവീസുകൾ കാര്യക്ഷമമായി നടത്താൻ സഹായിക്കും.
പ്രതിസന്ധികൾ ഉണ്ടാകുമ്പോൾ സ്വീകരിക്കേണ്ട അടിയന്തര നടപടികളെക്കുറിച്ച് എയർലൈനുകൾക്കും ബുക്കിംഗ് പ്ലാറ്റ്ഫോമുകൾക്കും കൃത്യമായ മുൻകൂർ കർമപദ്ധതി ആവശ്യമാണെന്ന് ട്രിപ്പ് ഡോട്ട് കോം സിഇഒ ഷുബർട്ട് ലൂ പറഞ്ഞു.
കഴിഞ്ഞ ആറുമാസമായി പശ്ചിമേഷ്യൻ യാത്രാമേഖല കടുത്ത വെല്ലുവിളികൾ നേരിടുന്നുണ്ടെങ്കിലും വ്യവസായത്തിന്റെ പ്രതിരോധശേഷി ശക്തമാണെന്ന് ആർഎക്സ് ഗ്ലോബൽ മിഡിൽ ഈസ്റ്റ് പോർട്ട്ഫോളിയോ ഡയറക്ടർ ഡാനിയേൽ കർട്ടിസ് ചൂണ്ടിക്കാട്ടി. ‘ട്രാവൽ 2040: ഇന്നൊവേഷനിലൂടെ പുതിയ ചക്രവാളങ്ങൾ’ എന്ന പ്രമേയത്തിൽ നടക്കുന്ന നാലു ദിവസത്തെ പ്രദർശനം സെപ്റ്റംബർ 17 വ്യാഴാഴ്ച സമാപിക്കും.
