സമുദ്ര ഗതാഗതം സുഗമമാക്കാനും വാണിജ്യ സുരക്ഷ വർധിപ്പിക്കാനും ലക്ഷ്യമിട്ട് ഇരു രാജ്യങ്ങളും തമ്മിൽ ധാരണയായി.
മസ്കറ്റ് : തന്ത്രപ്രധാനമായ ഹോർമുസ് കടലിടുക്കിലൂടെ പുതിയ വാണിജ്യ കപ്പൽപാത യാഥാർത്ഥ്യമാക്കുന്നതിനായി ഒമാനും ഇറാനും അന്തിമ കരാറിലേക്ക്. സമുദ്ര അതിർത്തി അതിർത്തി പങ്കിടുന്ന പ്രദേശങ്ങളിലെ കപ്പൽ ഗതാഗതം കൂടുതൽ സുഗമമാക്കുന്നതിനും സുരക്ഷ ഉറപ്പാക്കുന്നതിനുമുള്ള ചർച്ചകൾ പൂർത്തിയായി.
കപ്പലുകളുടെ സുരക്ഷിതമായ സഞ്ചാരം, പരിസ്ഥിതി സംരക്ഷണം, തത്സമയ വിവരശേഖരണം എന്നിവയുമായി ബന്ധപ്പെട്ട സാങ്കേതിക കാര്യങ്ങളിൽ ഇരുരാജ്യങ്ങളുടെയും പ്രതിനിധികൾ ധാരണയിലെത്തിയിട്ടുണ്ട്. നിർദ്ദിഷ്ട പാത നിലവിൽ വരുന്നതോടെ ഹോർമുസ് കടലിടുക്കിലൂടെയുള്ള ചരക്ക് ഗതാഗതത്തിന്റെ വേഗത വർധിക്കുകയും സമയനഷ്ടം ഒഴിവാകുകയും ചെയ്യും.
ലോകത്തിലെ ഏറ്റവും പ്രധാനപ്പെട്ട എണ്ണ ഗതാഗത പാതകളിലൊന്നാണ് പേർഷ്യൻ ഗൾഫിനെയും ഒമാൻ ഉൾക്കടലിനെയും ബന്ധിപ്പിക്കുന്ന ഹോർമുസ് കടലിടുക്ക്. പുതിയ സംവിധാനം നിലവിൽ വരുന്നതോടെ ഇരു രാജ്യങ്ങളിലെയും സമുദ്ര മന്ത്രാലയങ്ങൾ തമ്മിൽ മികച്ച ഏകോപനം സാധ്യമാകും. സാങ്കേതിക നടപടിക്രമങ്ങൾ പൂർത്തിയാകുന്നതോടെ മസ്കറ്റിൽ വെച്ച് കരാർ ഔദ്യോഗികമായി ഒപ്പുവെക്കും.
